#كسرة قلب
البارت 18
حيان
بعد ما سديته من امي رجعت كعدت يم ابو صكر ضلينه اني ويا وقسم من الضباط نخطط شلون راح نتوسط الميناء ونتوزع عليهه بحيث محد يكدر يمر منهه الا واحنه ندري بي
ضلينه على هالحال لحد ما صار الليل طلعنه ونمشي حسب الخطه كل ضابط ويا مجموعة جنود ويترأسون جزء صارت اربع اجزاء لاربع ضباط لأبع مقرات من مقراتنه كل مقر منهه ضابط ووياهم جنود اني جنت عالجزء الأيسر ووياي الضابط محمد وابو صكر والضابط فرات عالجزء الأيمن كلمن ياخذله جهه
ضلينه ع هالحال لمدة اسبوعين وماكو شي الليل كله واجبنه بلميناء والنهار ايضاً استراحه جنت اخذ بس اربع ساعات هم يالله انام بيهه وارتاح حته اهلي قطعت عنهم ما عندي مجال بس بالي يمهم ويم ڤيان حبيبتي مشتاقلهه كد الكون اريد بس يخلص الواجب حته ارجع واروي عطش كلبي بشوفتهه واخطبهه واخليهه تصير حلالي وافرح امي بجنتهه اللي صار تلاث اسنين انتضرهه بشوق
بيوم كملنه الواجب الساعه 2 الضهر رجعنه للمقر الربع الوياي كلهم يبقون بلمقر بس اني وابو صكر بهالساعات حاجزين جناح بفندق كلمن اله غرفه وبي حمام وطبخ .... مجهز كامل قريب ع المقر
رحت للمقر وذبيت السلاح والجهاز بلغرفه وقفلتهه وطلعت
رجعت للفندق دخلت للغرفه الحاجزهه غسلت وبدلت وطلعت لكيت ابو صكر جاي
دخل غسل وبدل وطلع حجه
اياد "' ول يابه ميت تعب وميت جوع "'
ضحكت وحجيت
"' اني مثلك علوا تسوي وخل ناكل لعبت نفسي من المطاعم مشتهي اكل بيت "'
اياد "' يواشك يواشك عليه احد كالك خدامتك واسويلك اكل عجل الله المن خلالك ادين ورجلين متعرف تسوي اطلع جيب وتعال ناكل سوه "'
"' مصلحجي تريد تاكل براسي يوميه اطلع اجيب وتتربع وياي كلف نفسك وروح ابويه انته "'
اياد "' حجي يفيدك مثل كل يوم جيب خل ناكل ونرتاح شوي "'
"' راح اطلع اكل واجي وضل انته علي كعدتك ماشي اغااتي "'
دا اطلع ضحك وحجه
اياد "' ول يابه ماا اوصيك فد صحن قوزي زيين "'
صديتله وباوعتله بطرف عيني
"' هہ تدلل ابو صكر الغالي متريد بعد مندي نفر كباب شاورما "'
ضحك وحجه
اياد "' لا يابه خلهه يوميه اكله شكل "'
عفته وطلعت بلسياره واخذت البدله مالتي وديتهه غسل وكوي ورحت للمطعم اللي يوميه اجيب منه
ركنت السياره ونزلت كعدت بلمطعم مطعم حلو مرتب البصره جنه هنيال من ساكن بيهه بس ياا ويل بلصيف تسمط سمط همزين هسه شتاا
