أمك دعيالك
فى مصر عندنا الجيش اجبارى والنظام الاجبارى فى الجيش موجود فى دول كتير لكن كمان فى دول تانيه كتير دخول الجيش اختيارى .
وبما اننا ماشيين بمبدأ متقولش ايه اديتنا مصر قول هاندى أيه لمصر فلازم نخدم مصر هانم طبعا
المهم انك لازم بعد ما تخلص دراسه تبدأ فى الخدمه العسكريه والخدمه العسكريه عندنا إما سنه أو سنتين أو تلاته ده راجع لتعليمك سواء عالى أو متوسط أو مش متعلم .
انا أسمى أحمد مجدى وبما أنى كان تعليمى متوسط فالجيش بتاعى كان سنتين ، فى فترة تعليمى انا كنت بشتغل بساعد نفسى فى المصاريف وفى نفس الوقت بشيل حمل مصاريفى والشغلانه الى حبيتها واشتغلتها كانت السواقه وبسرعه بقيت سواق بريمو زى ما بيقولوا حتى قبل ما أطلع رخصة السواقه كنت بعرف أسوق .
وفضلت بشتغل سواق لحد ما خلصت دراسه وجه وقت التقديم فى الجيش وجه اليوم الى هعرف فيه هدخل الجيش ولا لا .. وطبعا كنت حاطط أيدى على قلبى وقولت لأمى تدعيلي وانا نازل رايح بس تقريبا أنى مكنتش متوضيه وهى بتدعى ولبست فى الجيش .
وروحت مركز التدريب لحد ما يوزعونا على أماكن الخدمه بتاعتنا .. ووجودك فى مركز التدريب ده بتكون أصعب أيامك فى الجيش مش عشان الخدمه فيها بتكون صعبه لكن عشان دى أول أيام بتكون ليك فى الجيش واول أيام بعيد عن اهلك وبتعمل كل حاجه بنظام .. وقتها بتعرف أنك العيشه مع اهلك كانت نعمه وانك كنت ملك فى بيت أهلك وان حياتك فى بيت أهلك كانت نعمه وانك كنت جحش كبير وانت مش عجبك حياتك مع اهلك أو بتشتكى .
طبعا فى الجيش عرفوا أنى سواق وجه مندوب من مديرية الأمن واختار اكتر من سواق وخد الملفات بتاعتهم وانا كنت واحد منهم .. روحت هناك المندوب خادنى ودخلنا للعسكرى الى هيستلمنا
وانا واقف دخل رتبه وبصلى وقالى
*انت جى جديد
-اه يا فندم
*سواق مش كده
-اه يا فندم
*تعالى معايا
وفعلا روحت معاه لحد ما وصلنا للعربيه بتاعته
قالى
*اركب
ركبت وركب جنبى وسوقت شاف سواقتى قالى
*انت خلاص هتبقى السواق بتاعى انا المقدم شريف
-تمام يا فندم
وفى أول يوم ظبطت العربيه وأستنيته بالليل عشان أروحه وانا واقف جنب العربيه لقيت واحد معدى لابس بدله وشكله كبير فى السن يصلى وقالى
•انت جديد يا بنى
-اه يا فندم
•بتعرف تسوق
-اه يا فندم
•طيب تعالى أركب العربيه دى
-بس انا مستنى شريف بيه
•شريف بيه ..! تعالى تعالى أركب العربيه
-حاضر يا فندم (وبعدين فى ميتين أبوكوا بقى هو كل شويه حد يركبنى عربيه )
بص للسواق بتاعه وقاله
•أركب انت ورا يا حمزه
وفعلا السواق ركب ورا .. ركبت معاه وسوقت وقتلى خلاص انت هتبقى بديل حمزه انزل أركب ورا وخلى حمزه يسوق ..ساق حمزه ووصله احد البيت وانا راكب ورا زى الحمار مش فاهم حاجه .. واحنا راجعين ركبت جنب حمزه .
-بقولك ايه يا معلم أنا حاسس أنى زى الحمار مش فاهم حاجه وبعدين المقدم شريف أكيد لما نزل ملقنيش هيغشخنى
*شريف مين يا عم بلا شريف بلا رغيف انت خلاص بقيت البديل بتاعى .. انت عارف انت بقيت سواء مين
-مين يعنى
*العميد عبد الهادى مدير مكتب رئيس مباحث العاصمه يعنى انت بقيت من رجالته ومحدش من النهارده يعرف يتكلم معاك
-طيب وهبقى البديل بتاعك ازاى
*بص يا معلم أول كام يوم هاتركب معانا وانا الى هسوق تاخد بالك من الطريق وتحفظه كويس وبعد كده هتسوق كام يوم وانا هقعد ورا أول ما احس انك تمام هاخد اجازه وزى ما انا هاخد أجازه انت كمان هتاخد اجازه خدت عشر ايام هرجع هتنزل انت أجازه عشر ايام خدت عشرين هتاخد زى
-دى كده مراجيح
*هههههه ايوه بالظبط مبروك عليك المرجيحه يا معلم .. انت امك دعيالك
-(وانا الى ظلمتك يا أما وقولت انك كنتى مش متوضيه وانتى بتدعيلى )
وفعلا بدأت اركب ورا واركز فى الطريق عشان احفظه وبعد كام يوم حمزه قالى من بكره انت الى هتسوق بس قالى كام معلومه مهمه قالى ان الراجل ده بيخاف من كبسة الفرامل وانه اول كام يوم هيركب جنبى لوحده هيفضل فايق وصاحو واول ما يطمن ليك هتلاقيه بينام جنبك .. وفعلاً بدأت أسوق وبعد كام يوم نزل حمزه أجازه ومعدات أسبوع وانا سايق الا ولقيته بينام جنبى .. عرفت انه خلاص اطمن ليه
وبعد خمسة عشر يوم رجع حمزه ونزلت اجازه زيه بالظبط وفضل جيشا كده لحد ما حمزه جه الوقت الى هيسلم فيه .. عبد الهادى بيه قالى هتنزل مع المندوب مركز التدريب وتختار سواق يبقى بديلك عشان حمزه هيسلم خلاص ، وفعلا نزلت مع المندوب عشان اختار السواق الى امه دعياله.
تمت
