معيد ف الجامعه بيقول نزلت أتمشى شوية في صحن الجامعة، لقيت طالب بيقولى ممكن حضرتك ناخد البريك وقت الصلاة؟
فعلا كان اول مرة اسمع الطلب ده و وافقت لانه كدة كدة كان قريب من وقت البريك اللى انا محدده
المهم إن مرة بعد مرة حبيت الولد ده جداااا هو واتنين صحابه و على فكرة سننا كان لسة قريب جدا من بعض
بقيت فى البريك بنزل اصلى معاهم و نرجع المحاضرة
عجبنى جدااا روحهم الحلوة و ابتسامتهم على طول.
فى آخر الترم واحد منهم جه قالي اطلع معانا عمرة ، حبيت الفكرة ، قالى بس هنطلع برى ! قلتله ليه كدة بس مفيش طيران؟ قالى فيه و فى نفس اليوم و نازلين نفس الفنادق بس احنا هناخدها رحلة نستمتع بالصحبة و الثواب باذن الله اكبر !
بصراحة انا مكنتش فاهم صحبة ايه و احنا رايحين عمرة، إيه هنقعد فى الاتوبيس نغنى و نرقص و نعمل مقالب فى بعض و نلعب افلام يعنى و فى نويبع ننزل المية على ما العبارة تيجى مثلا؟! ما علينا المهم وافقت .
ركبنا الاتوبيس بعد شوية واحد مسك الميكروفون و عرفنا بنفسه وكذا واحد طلعوا يعرفونا بنفسهم، اللى قرأ قرآن و اللى قال أذكار واللى هزر شوية و اللى بص على الجبال و قالنا "خواطر" لما بيتامل فى خلق الله ! انا كنت قاعد مش فاهم ايه ده فين التسقيف و الرقص طيب كنت بتفرج على اللى بيتكلم و على الناس اللى قاعدين كلهم كنت مستغرب نفسى قوى فى وسط الناس دي بس مش عارف ليه كنت حاسس انى مبسوط جداااا
وصلنا الميناء قبل العبارة صاحبى خدنى يعرفنى على واحد قاعد مربع على الارض مع سواق الاتوبيس و اتنين كمان و بياكلوا و قاللى ده فلان صاحب شركة السياحة اللى طالعين معاها !!!
-هو مطلعش مع رحلة الطيران؟ --لا هو بيحب يطلع البرى علشان لو الناس احتاجوا حاجة !!! مش هعرف اقول حسيت بإيه و لا الراجل ده بإبتسامته و تواضعه أثر فيا إزاي.
ركبنا العبارة لا الكباين صالحة للنوم و لا السطح ينفع حتى نفرد ضهرنا عليه لان كان فيه طبقة غريبة لزجة شوية مغطية السطح كنا بنعانى حرفيا بس الناس دى فى كوكب تانى بيتكلموا و يضحكوا و يهزروا واحد مرة واحدة بص للسما، وقال: احنا متبهدلين أهو ، مش عارفين نمدد جسمنا حتى ، كان ممكن نطلع طيارة ، الثواب يا رب، والله قالها بطريقة كلنا فطسنا على روحنا من الضحك بس أنا لسة فى حالة اللاوعي اللى أنا فيها، حاجات كتير مش مستوعبها و لا شفتها قبل كدة هو بيكلم ربنا؟ بحب كدة؟ بهزار محترم قوى كدة؟ برضه كانت لحظة غريبة عليا جدااا.
المهم وصلنا بعد يومين معاناة تاااامة، دخلنا فندق المدينة بعد نص الليل طبعا دخلت الاوضة على السرير هموت وأنام لقيت صاحبى بيقولى يلا يلا ايه ؟ ننزل نسلم على الرسول صلى الله عليه و سلم و نصلى قيام عند الحرم !!! يا عم انت مش طبيعى أنا هنام شوية علشان أفوق كدة بعدين أعمل كل ده انزلوا أنتم، فعلا نزلوا و نمت كنت تقريبا بقعد فى الاوضة لوحدى، كل فترة يرجعوا يناموا ساعة و لا اتنين و هوب يفزوا من السرير ينزلوا الحرم يكملوا !!! صاحبى ده كان نايم مرة، سمعت صوت بصيتله لقيته فى سابع نومة و بيقول لا يا " عمر" ... "أبو بكر" ذهب إلى ...... !!! انت بتحلم بايه؟ انت بتكلم مين طيب؟ طب بالله عليك دخلنى معاك فى الحلم ده يا أخى 😀
و احنا فى الحرم قبل الصلاة واحد منهم بيقول النهاردة آخر يوم فى المدينة و الإمام ده بعشق صوته يا رب يقرأ سورة الرحمن، و ابتدينا الصلاة و بعد الفاتحة بدأ الامام "الرحمن.. علم القرآن..." !!! أنا فى اللحظة دى بكيت، بكيت على نفسى جدااا ،هما ازاى الشباب دول كدة ،هما ازاى وصلوا لكدة مع ربنا، و ازاى ربنا مراضيهم كدة و الفرحة و ابتسامة الرضا مش بتروح من على وشهم كدة، طب هو ليه انا مكنش صحابى زى دول كانت حاجات كتير اتغيرت، انا كنت فاكر انى عايش كويس و مبسوط، بس معاهم فهمت الفرق بين انى "أعيش" و إنى "أحيا" ...
" مَنْ عَمِلَ صَالِحًا مِّن ذَكَرٍ أَوْ أُنثَىٰ وَهُوَ مُؤْمِنٌ فَلَنُحْيِيَنَّهُ حَيَاةً طَيِّبَةً ۖ وَلَنَجْزِيَنَّهُمْ أَجْرَهُم بِأَحْسَنِ مَا كَانُوا يَعْمَلُونَ " ...
" وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكًا ونحشره يوم القيامةِ أعمى"💙
الصحبة الصالحة كنز
الشاهد من القصة دي كلها إنك مش شرط علشان ملتزم يبقى كل حاجه بتقفيل وكل حاجه بتعقيد لا عادي في وقت لدنيتك في وقت تهزر وتضحك وتمارس هواياتك وتتبسط مع عيلتك وأصحابك طالما مش هتغضب ربنا+شوفوا في حياتكم صحبة صالحة لأن العيشة من غير الصحبة الصالحة دي وحشة أووي وحاجات كتيير بتفرق بعد ما يكون فيه في حياتك صحبة صالحة، صحبة فاهمين الإلتزام صح مش فاهمينه تشدد وتعقيد طيعوا ربنا يا جماعة وافصلوا عادي بحاجات تبسطكم طالما مش هتغضبوا ربنا💙
#لعلها_المنجية.
