دا بقا احسن بوست فى الميديا كلها نا دمعت ونا بقرا ❤❤
الحكايات دي حقيقية..وحصلت لصحابي.. بس باختلاف شوية..
*اتجمعنا زي عادتنا كل يوم جمعة وسألتهم ابتديتوا ازاي؟!
كل واحدة تقول بدأت في طريق الإلتزام ازاي..! *
_ إيمان : كان ليا بنت عمي أصغر مني بسنة... كنا بنتخانق كتير وبنهزر أكتر..كانت أختي.... كل أسرارنا مع بعض... وتايهين احنا الاتنين.. بين اغاني.. وحب... ولبس ضيق... وفجأة بدون اي مقدمات سابتني..
ماتت 💔
فضلت اكتر من شهر مصدومه ومبتكلمش مع حد... عمي جابلي تلفونها.. وفي يوم قررت أفتحه...
لقيتها كاتبه في النوته
" نفسي أنا وإيمان بنت عمي نقرب من ربنا.. أنا بحب ربنا والله، بس مبعملش حاجه ترضيه، نفسي نلبس الخمار، ونحفظ القرآن، نفسي ربنا يرضي عننا وندخل الجنة سوا "
جالي انهيار عصبي يومها زي اللي جالي يوم وفاتها.. الكلام اللي كتباه كان قبل وفاتها بيومين..
لما هديت قررت أحقق أمنيتها.. فوقتني.. وماتت هيا..
روحت لأبرار وقولتلها عوزه أقرب من ربنا.. وساعدتني..
حافظت علي الصلاة..
كنت بصلي جماعة انا ومحمود ومحمد اخوات اسراء.. ونفضل بعد الصلاة ندعيلها بالرحمة والمغفرة.. محدش فينا بقا بيسيب فرض.. بدأت في حفظ القرآن في المسجد.. ودلوقتي باقيلي عشر أجزاء.. كنت لبست الخمار علي طول بعد وفاة اسراء.. بس لما التزمت وبقيت احضر دروس حبيت النقاب اكتر.. ولبسته بفضل الله.. والحمدلله الذي هدانا لهذا والله *
_ صمت تام.. وكلنا بنعيط... ايمان كانت بتعيط وهيا مبتسمة.. بصت لينا وقالتلنا..
خلاص بالله... أنا طمعانه في كرم ربنا انه يغفرلها..وتكون بتشاركني ثواب كل حاجه بعملها... هيا في مكان أحسن انا متأكدة..
بعد شوية..
_ آية : أنا كنت بحب واحد زميلي... مكناش بنتكلم... بس ليل نهار دماغي مشغولة بيه.. وفي أجازة أولي ثانوي كنت بدور علي رواية أقرأها.. لقيت رواية اسمها " أنا أنتِ " انشكحت للاسم اوي واللي هو حصل هو انا وانا هو...متتريقوش..كنت تفلة مراهقة... المهم.. قرأت الرواية.. لقيت فيها حاجات غريبه...
قيام الليل؟!
الأغاني حرام؟!
حلقات في المسجد؟!
غض البصر؟!
الحب الحلال؟!
انا كنت بلبس خمار وقتها بس بدافع الحياء.. مش انه لبس شرعي... بدأت أفكر كتير وادور ورا كل معلومة بسيطة أقابلها..اكتشفت اني معرفش حاجه في الدين.. ومن هنا بدأت أول رحلتي... لازم قلبي يفضي ويكون خالص لله..
كنت بعيط كتير اوي وانا بصلي القيام علشان ربنا يخرجه من قلبي.. وبدعي أقرب من ربنا...كنت حاسه اني بعمل ذنب كبير اوي..ازاي قلبي مش خالص لله ولا مخلص لحبه...
في يوم دعيت بصدق شديد ان ربنا يجعل قلبي خالص لوجهه ويتقبلني بقبول حسن... كنت بعيط في السجود بشدة.. انا مش عوزه غير ربنا والله... عوزه حبه ورضاه وجنته... قومت من السجود.. حاسه اني واحدة تانية... مش فاكرة انا كنت بعيط ليه... أول مره احس بالخشوع كده..
بدأت حياتي تتغير بجد من اليوم ده... زي ما ايمان عملت بالظبط.. الصلاة، والقرآن، ودروس المسجد.. وانتو ❤️
