~~~~~~~~~~~~~~~~~~~~~~~~~~~~~~~~~~
Subah ke 5 baj rahay thay aur Hoor apnay kamray mein apna bag pack kar rahi thi , woh apnay kamray ki khirki ki taraf ayi aur parday khol diye , halki si hawa kamray ke andar anay lagi woh ankhein band karke hawa ko mehsoos karnay lagi , woh kitni hi dair aisay hi ankhein band karkay khari rahi jab pheechay se Asiya begum ayi aur ussay mukhatib kiya.
"Hogayi packing hooriya"
Hooriya ko Hoor sirf liza aur Aaryan hi bulatay thay aur koyi nahi.
Hoor ne pheechay mur kar dekha aur apni maa ke qareeb ayi."G mama hogayi packing"
"Apnay canvas rakh aur doosri zaroori cheezain rakh di hai na ? Kuch bhooli toh nahi"
Asiya begum ki ankhein aur awaz dono nam thi , jissay hoor ne bhi mehsoos karliya tha.
Usnay unka hath apnay hath mein liya."Sab rakh diya hai mein ne aap fikar na karein mama"
Asiya begum ne usskay hathon ko zara mazbooti se tham liya."Hooriya dekho mein nahi janti tumharay aur tumharay baba ke beech mein achanak itni dooriyan kiun agayi hain , aur na hi tum dono mein se koyi mujhay kuch batata hai magar itna kahoongi ke apnay baba se naraz hokar mat jana , agar unse koyi ghalti hogayi ho toh unhein maaf kardo , unse achay se milna woh neechay lounge mein bethay tumhara hi intezar kar rahay hain"
Hoor phichlay kuch salon mein waqayi bohat badal gayi thi , najanay dil pe kitna bojh liye huay thi. Ussne apni maa ko muskura kar dekha magar muskurahat bhi aisi jiske pheechay ceer ke rakh dekhnay wala gham chupa tha.
"Neechay chalein?"
Asiya ne sar kham kiya.
Woh neechay ayi toh Sher Khan dono hath pant ki jebon mein diye huay thay , aur kisi gehri soch mein thay jab pheechay se hoor apnay suitcases ko uthatay huay neechay agayi.
Asiya begum kisi kam se apnay kamray mein chali gayi thi."Agaya mera bacha janay ki tayari hogayi hai lagta"
Sher Khan usski taraf rukh karke bolay."G"
"Chalo mein driver se kehkar saman gaari mein rakhwata hun , mein apni beti kesath Airport tak jaonga"
"G nahi"
Hoor ki nazrein neechay carpet ka pehra kar rahi thi aisa kya tha ke woh apnay baap ki ankhon mein bhi nahi dekh sakti thi ab."Hooriya kya hogaya hai , tum abhi tak uss baat ko lekar soch rahi ho , abhi tak tumharay dil se apnay baap keliye shak mita nahi , aur kitni safaiyan dun mein tumhein"
"Kisi safayi ki zaroorat hi nahi baba , kisi safayi ki zaroorat hi nahi nahi , sab paani ki tarah saaf hi toh hai , mein jarahi hun bas thak gayi hun mein har roz apka samna kartay kartay , aur han ek baat sun lein aap meri shayad iss bat se hi apka murda zameer jag jaye ......
Apnay ek nahi char zindagiyan barbad ki hain , char zindagiyan baba"
Hoor mein itni himmat agayi thi ke woh yeh baat apnay baap ki ankhon mein ankhein dal kar bolsaki.Sher Khan wahi khara reh gaya , besusudh sa , khamosh sa , alfaz khatam hogaye thay shayad.
Ya phir alfaaz ada karnay ki taqat khatam hogayi thi.Hoor Asiya begum se mil kar ab ghar se bahar arahi usske hath mein usska luggage tha , Aaryan aur Liza bahar hi thay Hoor ka intezar kar rahay thay.
Hoor ke kadam gate ki taraf jatay jatay ek dam bhaari par gaye , ankhein bhar ayi , in ansooyon ko akhir aur kitna rokti woh , woh luggage ke ooper jhuk kar dhar o dhar ronay lagi , woh aisi khamosh siskiyan lerahi thi ke koyi unhein sun nahi paya , ronay wala kamzor nahi hota balkay woh insan kamzor hota hai jiske ansoo hi na nikal paye.
Hoor ne foran khud ko compose kiya , ansoo saf kiye aur chehray par muskurahat liye gate ke bahir ayi toh Liza back seat par bethi ussay muskura kar dekh rahi thi , hamesha ki tarah agay wali seat hoor keliye hi bacha rakhi thi ussne , Hoor ne ek lambi sans li aur agay beth gayi. Aaryan ne hoor ko ek nazar dekha , zair e lab muskuraya aur gari Airport ki taraf mor di.
![](https://img.wattpad.com/cover/248152707-288-k674626.jpg)
YOU ARE READING
MALAL E YAR | ON HOLD
Romance"Tumhein muhabbat hogayi hai uss se?" "Agar umar bhar sirf usske saath ko chahna muhabbat hai toh han shayad hogayi hai mujhay uss se muhabbat" _______________________________ "Agar mein kahun ke mein thak gaya hun apnon se bhagtay bhagtay toh?" "To...