صُــدفــة الــقــدر " الجزء الأول "

🖤الفصل الأول🥀

" الوحده زي القهوة الساده مُره بس تشدك عشان تشربها وتدمنها رغم انها مُره! .. الوحده موجعه اوي .. بس حلوة ان مفيش مشاكل وحوارات وكذب وخداع لاكن بتوجع وبتقتل انا مختارتش الوحده هي الي اتفرضت عليا من غدر الناس .. بس انا تعبت ومحتاجه حد يسمعني ويحتويني .. عايزه ابطل اخاف من الناس والعلاقات .. عايزه حد يطمني "

رفيدة بهدوء :
- كارمن .. كفاية كتابة يا حبيبتي إنتِ بقالك ساعتين بتكتبي..

لتنهض هي تضع الدفتر علي الرف زافرة بقوه وتهتف في هدوء :
-وحتي ملجأى الوحيد حرام أقضي معاه وقت..

رفيده بحنو :
- أنا ماقلتش كدا أنا بس عايزاكي تغيري جوك ماتقعديش لوحدك دايمًا..

كارمن بهدوء :
- ما حضرتك اللي قلتيلي آخد الكتابه صحبة ليا من صغري ليه عايزه تغيري ده لما كبرت..

رفيده بحب :
- علشان كبرتي زي ما بتقولي يا نن عيني إنتِ قدامك مستقبل طويل قعدتك دي مش هتنفعك..

كارمن بحزن :
- وعايزاني أعمل إيه يماما !!

رفيدة بلطف :
- عايزاكي تخرجي وتغيري وتعملي علاقات تنفعك في شغلك .. إنزلي شغلك يا كارمن ، مش علشان مديرك مديكي أجازه مفتوحة تستهبلي فيها..

كارمن بهدوء :
- حاضر يا ماما..

رفيده مبتسمه :
- دلوقتي بقي تاخدي أختك وصحابها وإخرجوا غيروا جو سوا..

كارمن بهدوء :
- حاضر يا ماما..

حبيبة بضحك :
- والله فجأة لاقيناه واخد السلم كله زحلقه وبيصوت ولا كإنه بيولد وفطس الدفعه كلها..

كارما بضحك :
- يخرب عقلك يحبيبة كل ده ضحك..

رؤى بضحك :
- يخرب دي دفعة أصلا أنا ماشفتش دفعه ولاد بتضحك بالمنظر ده..

هنادي بهدوء :
- إحم .. إحم ، جمااعه !!

لينظروا لها فتشير بأعينها لكارمن فتهتف رؤي بلطف :
- كوكي ..!!

كانت ضائعة هي في عالمها فالتفت لها فجأة هاتفه بهدوء :
- نعم ..!!

رؤي بهدوء :
- طنط قالت إنك تعبانه و عايزه تغيري جو ، مالك ؟!

كارمن بهدوء :
- كويسه ماتشغلوش بالكم..

كارما بحزن :
- كارمن اللي إنتِ فيه ده بقالك سبع سنين جواه..

كارمن بهدوء :
- ١٦سنه وست شهور وأسبوع وتلت أيام و١٢ ساعة..

هنادي بحزن :
- حرام .. حرام اللي بتعمليه في نفسك..

كارمن بإنكسار :
- ومش حرام اللي هما عملوه فيا..

كارما بحزن :
- كارمن إحنا كلنا جنبك..

كارمن بحزن :
- ماعدتش تفرق .. أنا مابقاش هاممني حد أنا بس كل اللي مضايقني إني هنت عليها هي بالذات .. أنا شرحت ليها أكتر من مرة إن لو هي خانت ثقتي هتخليني أفقد شغفي في الحياه كلها وهتخلي ثقتي في الناس تضيع وده اللي حصل..

رؤى بإنكسار :
- حصل وتلاقيها هي عايشة حياتها دلوقتي .. وإنتِ لسه عائشه علي ذكرياتكم..

هنادي بهدوء :
- ياما حذرتك يا كارمن قلتلك هتاخدك من الدنيا كلها وهتحسسك إنك كل حاجه في حياتها وهتسيبك زيها زيهم ، إنت كنت في كل مره بقول لك فيها كده كنت بتدافعي عنها وبتقولي إنها استحاله تعمل كدا..

كارمن بهدوء :
- وأهي غدرت بيا فعلا .. إنتِ كان معاكي حق ، إنت واحد وأنا صفر..

لتنهض وتأخذ حقيبتها مغادرة أما هن فينظرون إلي هنادي بعتاب لتهتف هي :
- جماعه كارمن بقالها سبع سنين وبالذات من ساعة ما حصل الموضوع ده و هي لا بتتكلم ولا بتعيط كنت فاكرة إني لما أبرد عليها هتتخنق فتعيط ماكنتش أقصد أضايقها أنا خايفه عليها بس..

كارما بهدوء :
- طب يلا بينا نلحقها و نبقي نتكلم في الموضوع ده بعدين..

أما هناك فكانت تسرع هي من خطواتها متجهة للجراج لتصطدم بأحدم فيمسك بيدها قبل أن تسقط أرضًا لتقف هي مرة أخري هاتفه بضيق :
- شكرًا شكرًا ليك..

و من ثم تذهب بسرعه أما هذا الشخص فتابعها بأنظاره حتي إختفت من أمامه..

يتبع ..🔜
رأيكم ..!! 🖤🥀