بك غفراني 🥀

بك غفراني 🥀
بقلمي : ميساء إبراهيم 💜
                                 {4}

"مجاهد سكت مسافة وأشر ليها بعيونو وقال ليها"
مجاهد : عايني صحبتك.. نفيسة : صحبتي؟!.. "لمن نفيسة التفتت شافت إيمان قاعدة مع ولد معاهم في الدفعة في مصطبة جمب محل الاسكريم وبضحكوا وجاارين الونسة.. نفيسة عاينت ليهم وسكتت مسافة حتى عاينت ل مجاهد ".. مجاهد : اها صدقتي انو دي ما زولة بتتصاحب ولا لسسة.. نفيسة : حسي انت شايف اني زولة ما بتتصاحب؟!.. مجاهد : حاشاك والله.. اكيد لا.. نفيسة : طيب حسي الفرق بيني وبينها شنو.. مش انا وانت طلعنا سوا و بناكل اسكريم؟!.. مجاهد سكت مسافة وغلبو الرد.. نفيسة : حاول دايما تشوف الحاجة من كم جانب يا مجاهد وما تتسرع في الحكم.. حسي كدي عاين ل إيمان تاني .. ما ملاحظ انها خاتة شنطتها بينها وبين الولد؟!.. لو كانت زي ما فاكر انت كانت حتتلصق فيهو زي اللبانة.. مجاهد : لكن يا نفيسة.. نفيسة : معليش يا مجاهد بس ما تجيب السيرة دي تاني وانا موجودة لو سمحت.. مجاهد : خلاص طيب بعتزر وحقك علي ولو عايزة حسي بمشي بعتزر ليها قدامك.. نفيسة : دي حاجة بينك وبين نفسك.. لو اقتنعت بكلامي حتحس بالذنب وحتعتزر.." مجاهد سكت تاني وبعد ما لملم كل الشجاعة العندو مشى ل إيمان وقال ليها.." مجاهد : السلام عليكم يا ايمان.. من دون ااي مقدمات انا بعتزر منك عشان ظنيت فيك ظن السوء.. "إيمان والولد المعاها استغربوا وفجأة الولد المع إيمان بقى بضحك بطريقة مستفزة!!.. وبصوت عالي وقال ل مجاهد : لالا يا صحبي الفهم الفي راسك وظن السوء دا صاح وماف داعي للإعتزار ورجع يضحك تاني.. إيمان ما ردت عليهم وفجأة دموعها نزلت وقامت سريع ومشت.. نفيسة لحقتها سريع ووقفتها وقالت ليها : إيمان ما تعملي كدا في نفسك.. ما تشتغلي بيهم عليك الله ما تبكي ولو احتجتي لي في ااي وقت انا موجودة.. أيمان وهي لسسة بتبكي : شكرا ليك يا نفيسة.. بس ماف زول حيفهمني.." وطوالي مشت.. نفيسة رجعت ركبت العربية واستنت مجاهد لحدي ما جا وركب وقال ليها".. مجاهد : سمعتي الولد قال شنو؟!.. نفيسة : لالا ما سمعت شي بس شفت دموع جارية من عيون بريئة وما ليها ذنب.. مجاهد : انتي البريئة والله يا نفيسة.. انتي.. نفيسة : خلينا نرجع البيت عشان الوقت اتأخر...

" بعد نفيسة وصلت البيت مجاهد استناها لحدي ما دخلت وبعد دخلت اتصل عليها وقال ليها".. مجاهد : بعتزر لأنو بسببي مزاجك اتعكر بدل تنبسطي.. نفيسة : ولا يهمك والله.. بالعكس انبسطت وشكرا على الاسكريم.. مجاهد : اقفلي الباب بالمفتاح وما تفتحي ل زول كان ما اتأكدتي دا فارس ولا تمنة.. نفيسة : ااي قفلتو.. مجاهد : بس تمام.. يلا مع السلامة وخلي بالك من نفسك.. نفيسة : وانت كمان.. "مجاهد ما صدق السمعو وبعد المكالمة انتهت قال جواتو : انتي كان خليتي بالك من نفسك ياهو كدا انا خليت بالي من نفسي 💜
*وقفة*
سمحة الريدة الجد عفيفة.. الواضحة وبتتحسى لو العين كانت كفيفة 💜
الما فيها لا مصالح لا خداع لا أطراف كتيرة.. بس بين قلبين منتظرين العشم يبقى حقيقة 💜
ميوس 💜

"بعد فارس وصل البيت اتصل على نفيسة عشان تفتح ليهو الباب.. نفيسة كانت دايرة تحكي ليهو الحصل بس شافتو تعبان وما قالت ليهو شي وخلتو ينوم.... فارس بعد صحى انتظر تمنة لحدي ما رجع البيت وقال ليهو".. فارس : لقيت شغل ولا لسسة.. تمنة : لسسة والله لكن ما حيأس وحلقى أن شاء الله.. فارس : إن شاء الله تلقى في أقرب وقت عشان الايام دي مدروش شديد مع القراية وقصة الشغل دي صعبة ياخ.. يلا مع السلامة طالع على الشغل خليك مع نفيسة وما تفوتها عليك الله.. تمنة : ربنا يعينك أن شاء الله.. دايما بتحسسني انك الكبير ما انا.. نفيسة ما محتاج ليها توصية يا فارس يلا امشي عشان ما تتأخر.. بعد فارس طلع تمنة مشى ل نفيسة وسالها عن النتيجة وبعد ما ورتو حكت ليهو الحصل معاها.. تمنة لمن سمع كلامها عصب شديد وعيونو حممرت وقام طوالي من جنبها.. نفيسة استغربت شديد من تمنة ومشت وراهو وقالت ليهو ".. نفيسة : انت زعلان مني يا تمنة.." تمنة ما كان مركز معاها وما سمع كلامها.. بعد ما شافها قدامو قال ليها : اسمها إيمان؟!!.. إيمان؟!!.. نفيسة : ااي إيمان.. تمنة : شكلها كيف.. ولا اقول ليك خلاص انسي خليني انوم تعبان.. نفيسة : طيب تصبح على خير.. يتبع