بك غفراني 🥀

بك غفراني 🥀
بقلمي : ميساء إبراهيم 💜
                                   {14}

"في اليوم التاني نفيسة حكت ل مجاهد قصة إيمان ومجاهد قرر يسوق فارس شارع النيل عشان يروق شوية ويصفي بالو من التفكير الزايد.. فارس ما بقدر يرفض ل مجاهد طلب و بالليل طلعوا ومجاهد ساق فارس بعربيتو واتحركوا.. فارس كان سرحان وبفكر فيها 😉.. مجاهد : وصلنا ارح انزل ولا ناوي تقضيها سرحان كدا 🙂؟.. فارس : ارح ارح انزل وانا بلحقك.. بعد مجاهد نزل فارس قعد شوية في العربية ولسسة سرحان لحدي ما مجاهد ناداهو"
مجاهد : يا روميو تعال ياخ الشاي حيبرد.. فارس : جيت جيت 😂.." أثناء ما مجاهد وفارس بتونسو وكدا فجأة فارس سكت وقال ل مجاهد ".. فارس : مجاهد قول لي ماف شي وراي.. مجاهد : مالك؟؟ في شنو ما فهمتك.. فارس : قول لي الصوت الوراي دا ما صوت إيمان!!!!!!!.." مجاهد عاين للناس الورا فارس  وكانت الصدمة انو شاف إيمان قاعدة مع ولد وبتضحك!!."مجاهد : لالا ماف زول وراك بتتخيل يا فارس.. فارس : أنا لو قبلت  ولقيتها ما حيحصل خير!!.. مجاهد : فارس استهدي بالله.. البت دي ما تمام!.. "فارس اول ما سمع الكلمة دي قام من كرسيهو ومسك مجاهد من قميصو وبقى بكورك فيهو وزعل من كلمة "ما تمام" وكأنها اتقالت ليهو!!.. مجاهد نزل يد فارس من القميص براحة وقال ليهو : دي جزاتي اني داير مصلحتك!!.. انت بس قبل وراك عشان ترجع لوعيك.. مجاهد مشى طوالي بعد قال كلامو بس فات بعيد ب دون العربية وخلى فارس متسمر في مكانو لا قادر يتقدم لا قادر يرجع ل ورا ولا داير يلتفت عشان بعد يشوفها مع الولد ما حيقدر يكذب عيونو!!.. إيمان بقت بتنده ليهو : فارس فارس.. وفارس ما قادر يتحرك من مكانو ومدنقر وشو بس 💔.. لحدي ما شاف زول وقف قدامو وكانت إيمان وقالت ليهو : فارس الحصل شنو بينك وبين مجاهد؟.. فارس لسسة مستمر في مكانو وما رد عليها لحدي ما جا الولد الكان مع إيمان ومسكها من معصمها وقال ليها : ياخ انتي مالك ومالهم تعالي خلينا نكمل ونستنا.. "فارس لمن شاف المنظر دا قلبو ولع نااار 🔥🔥وبدون ما يحس بقى بضرب في الولد ضرب شديد لحدي ما الولد رعف و كب الدم.. لحدي ما جو اولاد وحجزو بيناتهم والولد بقى بهدد في فارس : والله الليلة لو ما بت في القسم ما يبقى اسمي وليد" وليد دا من نوع الاولاد المدلعين وواحد عن امو وابو قام اتصل على ابوهو وجابو الشرطة وساقو فارس.. إيمان : فارس فارس اديني رقم مجاهد عشان يجي يلحقك.." طبعا فارس ما رد عليها واستسلم للأمر الواقع واتقبض.. إيمان اتصلت على نفيسة وحكت ليها الحاصل ونفيسة كلمت تمنة بس ما عرفو يمشوا ياتو قسم لحدي ما اتصلو على مجاهد ومجاهد ساق إيمان بعد تحنيس ومشوا علىَ القسم وتمنة ونفيسة لحقوهم.. مجاهد دفع كفالة بس قالو ما حيمرقو فارس الا اليوم التاني.. الوقت اتأخر ومجاهد ساق الباقين بيوتهم وجا راجع وبات في عربيتو وتمنة ما قدر يرجع مع مجاهد عشان ما يخلي نفيسة براها..
"الصباح جا ومجاهد تم باقي الإجراءات وكتبو فارس تعهد ما يضرب وليد تاني والا حيتحاكم.. بعد فارس ركب في العربية كان ساكت ساي ومجاهد قال ليهو : معليش ي صحبي ما تزعل نفسك .. فارس : أنا البعتزر منك بسبب موقف امبارح..مجاهد : ولا يهمك يا صحبي" مجاهد دور العربية كدا فجأة لقى إيمان واقفة قدام العربية..".. مجاهد : اها وريني اتصرف كيف عشان ما تزعل مني.."إيمان جات واتكلمت مع فارس" .. إيمان : فارس انا بعتزر منك والله.. فارس بقى بعاين فيها بس وما أداها ااي رد.. شاف في عيونها كمية ندم وحزن ودموعها اتجمعوا وبدت تبكي.. وطبعا فارس ماف شي بأثر فيهو اكتر من دموع بت.. واتخيلوا كمان تكون دموع بت بحبها! 💔.. فارس فتح باب العربية ونزل وقال ليها : الندم الشايفو في عيونك دا ندم على الواقع العايشاهو بالغصب وما بشبهك ولا ندم على اني دخلت السجن؟!.. إيمان : ما حأقدر اديك إجابة عشان ما حتفهمني!.. فارس : ومنو القال ليك ما حافهمك!!.. انتي فسري الحاصل عشان افهمك.. حاولي تثقي فيني ولو ذرة بس.. إيمان : كلكم بتقولو نفس الكلام.. فارس : كلنا منو يا ايمان كلنا منو!!.. دا بس الجواب العندك كل ما أسألك؟!.. إيمان : أنا جيت هنا عشان اعتزر منك بس وان شاء الله ما تكون زعلان مني ومع السلامة.. فارس : استني دقيقة.. اتزكري اني حأبقى ليك في حلقك لحدي ما افهم الحاصل حتى لو عاندتي لأني اعند منك!!.. " إيمان استغربت شديد لمن سمعت الكلام دا وشافت الإصرار الغريب في عيونو.. فرحت شديد من جواها وما قدرت تخفي الفرحة دي وابتسمت ابتسامة صغيرة ودست باقي الفرحة جواها.. فرحت لانو اول مرة تلقى زول بهتم بتفاصيلها للدرجة دي!!.. ما ردت عليهو ومشت طوالي...فارس ناداها : يا ايمان اتفضلي نوصلك في طريقنا مع نفيسة.. إيمان بإبتسامة : شكرا بقدر اصل ما تخاف ومشت طوالي... "
مجاهد : شايف البسمة رجعت في وشك ما شاء الله.. فارس :انت لا عاجبك سكاتي لا عاجباك ضحكتي!!.. مجاهد : الحب عذاب يا صحبي الله يعينك.. فارس : الله يعيننا الاتنين 😉😂.." فارس ومجاهد بقوا بضحكوا لحدي ما وصلوا ودقوا الباب عشان نفيسة تطلع.. تمنة فتح الباب وسلم على فارس وجات نفيسة سلمت عليهو وقالت ليهو : اشتقت ليك يا اخوي.. والله البيت بدونك مسييخ!!.. تمنة : اصلا انا قاعد سااي زي الحيطة مش 🙂.. فارس : انت اجمل حيطة في التاريخ! 😂.. تمنة : ااي اتريقوا كويس 🙂.. نفيسة : دا تكسير تلج ساي يا تمنة 😉.. تمنة : أنا زاتي داير تكسير تلج 🙂😂.. مجاهد : أنا زاتي داير.. "الناس كلها قعدت تضحك وبعد شوية فارس مشى استحمى وغير هدومو عشان يمشي الجامعة.. نفيسة : انت ما تعبان؟؟.. أحسن ما تمشي الجامعة الليلة انتي خليك و انا ومجاهد بنمشي.. فارس : كلامك دا عشان مصلحتي ولا عشان مصلحتك 😉.. نفيسة قعدت تضحك وقالت ليهو : عشان مصلحتك يا اخوي مصلحتك! 😂.. فارس : ولا يهمك اتعودت على الشقا الزي دا.. نفيسة : ولسسة كمان شقا الحب داك براهو وانت في بداية الطريق.. فارس : الله الله على الخبيرة 😉.. نفيسة وهي بتضحك: والله لو كنت عارفة الحب بخليك ظريف للدرجة دي كنت زماان وريتك إيمان 😂.. فارس : اخس عليك والله ليه كنت مخلياني بارد ومسيخ السنين دي كلها!!.. نفيسة : هوي بديت اغير خلاص 🙂.. تمنة : شنو شنو.. سمعت لي كلمة اغير هنا.. شفتي دا احساسي اليوم داك!!.. نفيسة : إحساس حار والله 🙂.. "فارس حضن نفيسة وقال ليها : انتي العشق الأول يا بتي 💜.. ضحكت وقالت ليهو : العشق الأول ااي بس ما الأخير 😂".. يتبع