الفهد الأسود

الفصل الحادي عشر

رواية| الفهد الاسود |
( الباشا )
الفصل الفصل الحادي عشر ...
_________________________________________________

_ سديم اتفاجئت بخروج حسن من العربية مش عمران وتقريباً جمعت حالة ليلي سببها ايه ، حسن قرب منهم بخوف :-
_ في ايه حصلها ايه ؟

_ سديم هزت دماغها بخوف :-
_ معرفش معرفش مش بتاخد نفسها ..

_ سديم قعدت ليلي علي الأرض وفضلت تهدي فيها :-
_ ليلي اهدي خدي نفسك ، مفيش حاجة اهدي عشان خاطري

_ ليلي بدأت تهدي تدريجياً ، حسن جبلها مية وشربتها بمساعدة سديم ، رجعت لطبيعتها بس برده لسه متوترة وده باين عليها جدا ..

_ سديم مسكت أيدها وسألتها بإهتمام :-
_ انتي كويسة ؟

_ ليلي هزت راسها وحاولت تبعد عينها عن حسن بكل الطرق :-
_ الحمد لله

_ سديم افتكرت منظر ليلي وهي مدخلة راسها جوة العربية وبتصرخ في وش حسن وتخيلت منظر حسن وقتها ومرة واحدة انفجرت في الضحك ومعرفتش تسيطر علي ضحكها بأي طريقة ..

_ ليلي بصتلها بغيظ ووشها أحمر لأنها عارفة سبب ضحكها وضربتها في كتفها جامد ، حسن واقف مش فاهم سر ضحك سديم وليلي اللي ملامحها اتحولت للغضب منها ،

_ عمران كان خارج وقرب من العربية واتفاجئ بمنظر ليلي وسديم وهما قاعدين علي الأرض اللي طمنه شوية ضحك سديم اللي سيطرت علي نفسها أول لما شافته ، بصلهم بإستغراب :-
_ هو في ايه وقاعدين علي الأرض كده ليه ؟

_ ليلي برقت لسديم عشان متحكيش الموقف اللي حصل وسديم افتكرته تاني وفضلت تضحك بطريقة هيستيريا ، نفس الوضع كان عند حسن اللي افتكر منظر ليلي وهي بتصرخ في وشه وانفجر في الضحك لدرجة أن عمران اتعصب منهم وزعق :-
_ انتوا بتضحكوا علي إيه ما تفهموني في ايه بدل الضحك ده ؟

_ سديم ساعدت ليلي تقف وبمجرد ما وقفت فتحت باب العربية وركبت تداري إحراجها شوية ، سديم بصت لعمران اللي واقف مستني رد منهم :-
_ آسفة بس ليلي نفسها راح فجاءة واتخضينا عليها بس هي بقت كويسة ..

_ عمران فتح الباب بسرعة وبصلها :-
_ حبيبتي أنتي كويسة ؟

_ ليلي ابتسمت عشان تطمنه وهزت راسها وربطت علي أيده بحب :-
_ أنا كويسة متقلقش ..

_ عمران قفل بابها وبص لسديم وحسن بغيظ :-
_ مش شايف يعني حاجة تضحك أوي كده ..

_ سديم حست أنه اضايق ومقدرتش تتكلم وركبت بهدوء وكذلك حسن اللي شكله كان وحش جدا قدام عمران لأنه فاهم أنه بيضحك علي تعب أخته ، عمران طول الطريق ساكت وسديم كانت متابعة ملامحه في المرايا واتاكدت أنها غلطت وأكيد مش هيعدي اللي حصل بسهولة ، خدت نفس طويل تستعد علي اللي هي داخلة عليه ، ليلي كانت متبعاهم وفهمت خوف سديم واضايقت من نفسها لأنها كانت السبب بس لازم تصلح اللي حصل ..