Jena_ElBrembally500
- عامية أم فصحى؟
- عامية
- الاسم اللي تحبي تتعرفي بيه
- چينا،اسمي الحقيقي،مش بحب إن الـ nicknames تبقى معروفة أكتر من اسمي يعني
- بما إن العمر مجرد رقم، هل تفوقتي على عمرك؟
- ده شيئ مش أنا اللي أحدده أكيد، الحاجات اللي أنا عملتها هي اللي تشرح نفسها وتوضح الأمر ده. ومن ناحيتي كـ چينا فأنا فخورة بنفسي، مع إن أيًا كان اللي وصلتله مش أحسن حاجة فـ أنا فخورة بيه
- رأيك في سوق الكتابة؟
- كل حاجة فيها الحلو وفيها الوحش، مقدرش أعمم
- بشكل عام يعني ايه السائد أو الغالب
- برده أنا عند رأيي، الكتابة حاجة أعلى من مجرد هواية بالنسبة لي، وبالتالي مش بحصر نفسي ناحية كاتب/ة معين طول الوقت، بحيث أشوف جميع الأساليب والأفكار والطرق والخيالات وكده، كل واحد له طريقته وله طريقة تفكيره، فـ مقدرش أقولك كله حلو/ وحش. وهكذا. يعني زي ما بيبقى حاجات فيها إسفاف وطرق تفكير قميئة في الخيال أو العقل العظيم اللي يخليك مش عارف تعبر عن مدى إعجابك أو انبهارك ازاي
- هل مع دخول التكنولوجيا الورق هيندثر؟
- بنسبة كبيرة ده حصل، وبقى في ناس بتفضل الإلكتروني، بس من الناحية التانية في ناس لسه بتقدس الورق، وبالنسبة لها متعة تانية وإحساس تاني (اللي هم أنا يعني)
- الكتابة هواية ولا وظيفة؟
- على حسب تفكير الشخص فيها، كل واحد له دماغ مختلفة عن التاني، فالبني آدم هو اللي يحدد
- بالنسبة لك؟
- ميولي الأكبر ليها هواية،بس مين عارف؟يمكن تفكيري يتغير
- هل كل من يجيد اللغة العربية يصلح للكتابة؟
- الحقيقة هو أنا مش شكسبير عشان أقول مين يصلح للكتابة ومين لا يصلح، حتى شكسبير نفسه مينفعش يقول كده، الكتابة أنواع وفئات كتير جدًا جدًا، يعني هي بحر ممكن يحتوي كل الناس،لو هم حبوه،وبيستخدموه صح
- ايه الأفكار اللي بتفضلي نشرها؟
- كل المشاكل اللي بتواجه كل الفئات في المجتمع وممكن تبقى مستخبية ومش مديينها الأهمية المطلوبة
- ايه السبب في إظهار بعض الكتاب شخصية المرأة ضعيفة و محتاجة الراجل دايمًا؟
- عقم تفكير مثلًا؟ أفكار متأصلة جواهم من ساعة ما اتولدوا عن طريق البيئة المحيطة بيهم، الموضوع كبير جدًا، والأفكار ديه للأسف بتبقى جزء رئيسي منهم ومن شخصيتهم.
- اكتر موقف الكتابة خدمتك فيه؟
- لما أحب أعبر عن حبي لحد،هنا ببقى سعيدة إني كاتبة،عشان عندي القدرة ديه
- بتقبلي الفانفيكشن ولا مش دايمًا؟
- هو أنا بقبله وبقرأه عادي جدًا،بس بواجه مشكلة في كتابته كـ چينا،بس برده ممكن أكتبه في يوم من الأيام
- الفانفيكشن نوع أدب؟
- اه،نوع أدب معترف بيه (على حسب معلوماتي يعني)
- مشاريعك القادمة؟
- هكمل الرواية اللي أنا بكتبها ( إن شاء اللّٰه يعني) وفي قصة قصيرة هكملها وفي قصة مع مجموعة أصدقاء قمامير
- وعد لقرائك؟
- اااا، ايه الإحراج ده؟مهما أتأخرت في الكتابة يعني عمري ما أفكر إني أبعد عنها بشكل كامل،استحالة
- نصيحة للكتاب؟
- متتأثروش بكلام حد،طوروا من نفسكم،بس خليكم فخورين باللي بتعملوه
- استمتعتي؟
- يب
أنت تقرأ
داخل عقل الكاتب
De Todoداخل عقل الكاتب تكمن حياوات، أحداث، أكوان موازية، مشاعر متدفقة، شخصيات كثيرة لا حصر لها، براكين و زلازل، ضحك و بكاء، حروب تخر لها الجبال، و عصور طال عليها العمر. آن الأوان أن ندخل هذا العقل و نتحدث معه قليلًا #1🥇interview #1🥇 حوارات
