- اسمك اللي تحبي تتعرفي بيه
- دي لوحدها حكاية طويلة... بحب مريم لأنه اسمي وحلمي ان مجموعة كبيرة من الناس يبقوا عارفينه بس أچيرا انا اللي اختارته وبحبه جدًا... فهحب اتعرف كمريم حسام وأچيرا
- بما ان العمر مجرد رقم، هل تفوقتي على عمرك؟
- نوعًا ما ومن تجارب ناس كتير حواليا اكتشفت ان تفكيري مختلف جدا عنهم وبطريقة ما اكثر نضجًا... واني بحاول استخدم دا مع الكتابة وللنشر بيزود احساس اني تفوقت على عمري
- رأيك في سوق الكتابة؟
- في مرحلة هبوط مستمر .... سواء الواتباد اللي كلنا عارفين ايه اللي بيتنشر عليه او ورقيًا... السوق الورقي فيه مجموعة أسماء كدا لولاهم كنا في الحضيض... دكتور محمد طه مثلا... دكتور أحمد خالد توفيق ربنا يرحمه... وامثالهما من الناس اللي تفكيرها جميل وبتستثمره في كتب او روايات تعليمية لينا
- ليه في كتاب بيفضلوا يكتبوا فانفيكشن عن باقي الأنواع
- يمكن عشان بيحبوا التصنيف دا اكتر من غيره.... ويمكن عشان هدفهم شهرة سريعة رغم اني مش حاسة ان في فرق بين التفاعل على الفانفيكشن وغيره.... واعرف ناس تاني بيحبوا الشخص لدرجة انهم شايفينه في كل ابطالهم... حتي لما بيكتبوا عن شخص خيالي بيبقا نفس مواصفات الشخص دا... في النهاية هي اذواق
- هل الكاتب اتظلم بسمعة الكئابة؟
- بنسبة بسيطة جدًا جدًا اه اتظلم... بس الشطارة انه يثبت قدرته على كتابة أنواع تاني غير الكئابة
- ايه العيب اللي عايزة تغيريه في المجتمع؟
- الحُكم السريع على الناس قبل ما يعرفوا وجهات نظره وحتى بعد ما يعرفوا وجهات نظره... انت مش من حقك تحكم على اي حد قدامك ولا تحاكمه انه غلطان انت مسئوليتك تتعامل مع كل الناس بهدوء ولُطف وحُب مش تمشي ترمي أحكام ذي القاضي على كُل من هب ودب
- حياتك اتغيرت بعد ما بقيتي كاتبة؟
- يااااه كتير... بس مش من الأول ... يعني انا بكتب من 3 سنين منهم أول سنة دي كتبت فيها روايتين عبارة عن عبث بس مقدرش انكر انهم ساعدوا في تطوري كتير.... بعدها يعني من حوالي سنتين بدأت شخصيتي تتغير بقيت أكثر جُرأة وقدرة على التعبير عن رأيي... اجتماعية اكتر حتى لو بنسبة بسيطة جدًا بس في اختلاف... واهم حاجة بقيت بقرأ كتير عشان اجيب معلومات صحيحة للحاجات اللي هكتبها... يعني آخر رواية بكتبها دي قعدت قبلها شهرين أقرأ عن أحوال فلسطين وأهلها والتاريخ كله وكلمت اكتر من حد فلسطيني سواء من الضفة او غزة.... واهم حاجة ان الكتابة عرفتني على صحابي كلهم ودي حاجة هفضل ممتنة ليها لآخر يوم عالارض
- القضية الفلسطينية مظلومة كتابيا؟
-القضية الفلسطينية مظلومة عالميًا من كل حاجة فمجتش عالكتابة تظلمها... مظلومة من جهة المعلومات اللي مش متوافرة على جوجل ولا أي موقع من مواقع التواصل دا حتى بنترست لما جيت أدور على صور للغلاف كتبت فلسطين جابلي صور ارهابيين... مظلومة ان محدش لاقي معلومات عشان يكتب حاجة صح عنها
- هل الكاتب الروائي قادر انه يكتب كتاب بشكل كويس
و العكس صحيح
- الكاتب قادر انه يكتب اي حاجة بشكل كويس طالما اتعلم الطريقة كويس... تعلُم الطريقة بيبقا انه مثلا يقرأ كتابين لو هو روائي او يقرأ روايتين لو هو كاتب مقالات.... بس في المجمل انا مؤمنة أن طالما الكاتب بيعرف يستخدم الكلمات يبقا هيعرف يتكلم بشكل لبق ويكتب اي حاجة هو عاوزها
- كاتب إلكتروني و ورقي يستحقوا نوبل للأدب
- انا عامةً مش بقرأ لناس كتير بس إلكتروني عندك روان المصري أو چينا البرمبالي، روان أسلوبها الأدبي جميل جدًا... وچينا مواضيعها أكثر من رائعة
ورقي دكتور أحمد خالد توفيق طبعًا... دكتور محمد طه.... كريم اسماعيل... في معالج نفسي اسمه إيهاب ماجد دا كتبه عظيمة برضو
- الأدب العربي في مستوى متدني؟
- ولازال... من حيث اللغة والمحتوى وبصراحة كل حاجة
دلوقتي لما ألاقي رواية لغتها عامية فيها أخطاء إملائية ونحوية اكتر من الحاجات الصح جواها ومستواها عن أب اظطر يجوز بنته اللي عندها 19 سنة لواحد عنده 30 سنة.... يبقا أحنا كدا بننشر عبث بصراحة
ليه مفيش رقابة على اي حاجة هتتنشر مثلا
-مشاريعك القادمة؟
- بعاني عشان محطش خطط جديدة قبل ما أخلص القديمة.... عندي 4 أعمال عاوزين يخلصوا منهم قصة قصيرة بحط عليها اللمسات الأخيرة
والرواية القصيرة بتاعت فلسطين ورواية طويلة هتاخد فترة.
- وعد للقراء؟
- وعدي للقراء: أوعدكم هخلص كل حاجة بعد امتحاناتي قبل ما تقتلوني
- نصيحة للكتاب
- نصيحة للكُتاب... رجاءً رجاءً يا جماعة اختاروا مواضيعكم اختاروا حاجات تستحق الكتابة.... عشان القراءة متبقاش مضيعة الوقت والجهد
- استمتعي؟
- جدًا حدًا الاسئلة مبدعة وجميلة اوي
أنت تقرأ
داخل عقل الكاتب
Diversosداخل عقل الكاتب تكمن حياوات، أحداث، أكوان موازية، مشاعر متدفقة، شخصيات كثيرة لا حصر لها، براكين و زلازل، ضحك و بكاء، حروب تخر لها الجبال، و عصور طال عليها العمر. آن الأوان أن ندخل هذا العقل و نتحدث معه قليلًا #1🥇interview #1🥇 حوارات
