- الاسم اللي تحبي تتعرفي بيه؟
- جولي، مليش ألقاب يعني
- بما إن العمر مجرد رقم، هل تفوقتي على عمرك؟
- لا، بالعكس شايفة إن ناس كتير أصغر مني عملوا حاجات أكتر مني.
- بس زي ما أنت قلت، العمر مجرد رقم يعني أنا مش فارق معايا عمري قد ما فارق معايا إني أحقق اللي أنا عايزاه
- رأيك في سوق الكتابة؟
- بصراحة شايفة إنه مستواه عمّال يقل مؤخرًا، مش تقليل من جهود الكتّاب اللي أنا مجيش جنبهم حاجة لكن مبقاش في أي اهتمام بالمحتوى أو القضايا اللي بتتناقش في الأعمال الأدبية ولا أي حاجة، كله بيكتب اللي يرضي الجمهور سواء حلو أو وحش.
- بتكتبي بقالك قد ايه؟
- سنة تقريبًا
- ايه سر إقحام البطل السايكو في أعمال كتير؟
- سر إقحامه هو مفهوم الشر الطفولي اللي مترسَّخ في عقول ناس كتير،
مفهومهم عن الشر طفولي وسطحي جدًا وبالتالي السايكو بيناقش فكرة الشر على نحو أعمق وأكثر ظلمة.
مش كل الناس بتقدر ترسم شخصية السايكو صح، يعني أنا مش مؤمنة بفكرة الشر المُطلق وإن الشخص يتولد شرير من غير ذرة خير وبالتالي مبحبش الأعمال اللي بترسم شخصية السايكو بالطريقة دي والناس اللي بتحب السايكو كدة مش شايفالهم أي مبرر لحبهم ليه بصراحة.
الرسمة المثالية لشخصية السايكو بالنسبالي هي مزيج من الخير والشر بس الشر غالب، شخصيته تخليك تحبه عشان شوية الخير اللي جواه ويخليك تتعاطف معاه وتتمنى إنه يسمع للجزء الخيّر جواه لكن دايمًا شره بيغلب.
- تطور الكاتب بالوقت ولا المجهود؟
- الاتنين، من غير واحد منهم مش هيحصل تطور
- نوعية القراء المفضلين ليكي؟
- اللي بيتفاعلوا مع الأحداث ومشاعر الشخصيات سواء التفاعل دة يكون على شكل كومنتات أو بين القارئ ونفسه يعني.
- ايه اللي دخلك مجال الكتابة؟
- بدايتي كانت مخزية اوي بصراحة، يعني بدأت أكتب بمبدأ «ليه لا» وكدة.
- الروايات المدرسية ليها قبول اكتر عند القارئ؟
- مش شرط يعني هي أذواق، ومش كل الروايات المدرسية حلوة ولا كلها وحشة يعني التصنيف دة حاجة عامة اوي منقدرش نقيّم الرواية على أساسه.
يمكن هي اه بتشد قراء كتير لأن أغلبهم مراهقين وعايزين شخصيات نفس سنهم وعايشين ظروف مشابهة ليهم.
- احنا اللي بنختار الكتاب ولا هو اللي بيخترنا؟
- هو اللي اللي بيختارنا.
- مشاريعك القادمة؟
- رواية فانتازيا، رواية اجتماعية
- وعد للقراء؟
- هكون دايمًا عند حسن ظنكم وعمري ما هستخف بعقولكم في أي حبكة
- نصيحة للكتاب؟
- الكتابة ليها وجهين -من وجهة نظري-، وجه فني ووجه جوهري.
الفني هو السرد والوصف والحبكة واختيار الألفاظ وطريقة سير الأحداث
الجوهري هو المشالك اللي بتتعرض والقضايا اللي بتتناقش.
نصيحتي للكتاب، يا ريت متهملوش أي جانب من الاتنين أو تهتموا بواحد على حساب التاني.
- استمتعتي؟
- جدًا جدًا وحسيت اني شخصية مهمة وكدة
أنت تقرأ
داخل عقل الكاتب
Randomداخل عقل الكاتب تكمن حياوات، أحداث، أكوان موازية، مشاعر متدفقة، شخصيات كثيرة لا حصر لها، براكين و زلازل، ضحك و بكاء، حروب تخر لها الجبال، و عصور طال عليها العمر. آن الأوان أن ندخل هذا العقل و نتحدث معه قليلًا #1🥇interview #1🥇 حوارات
