- اسمك اللي تحب تتعرف بيه؟
- أنا اسمي عمر، لكن بفضل ايكاروس
- بما إن العمر مجرد رقم، هل تفوقت على عمرك؟
- اه بسهولة، و لكن أعتقد ده مش شئ كويس
- ليه؟
- لإن العمر فترات، الفترة اللي بتعدي منها بسرعة و تطلع على اللي بعدها غالبًا بتعمل مشكلة.. ناس كتير بتواجه مشكلة انها معاشتش طفولتها كويس مثلًا. ف أنا أعتقد إن الحاجة الاحسن من إنك تتفوق على عمرك هي إنك تعيش فتراته كما يجب.. لضمان السلامة النفسية على الأقل.
- رأيك في سوق الكتابة؟
- الكتابة سوق؟
- بمعنى تاني، رأيك في الكتّاب دلوقتي؟
- أي حاجة بتدي الحرية لأي حد إنه يعملها بتبوظ
- كاتب الروايات يقدر يكتب كتب بنفس الكفائة و العكس؟
- لأ طبعًا
- هل الكاتب اتظلم بسمعة الكئابة؟
- بص، هو الموضوع زي ما قولت لك فوق، أي حاجة بتبقى ممارستها مكفولة لأي حد بتبوظ.. الفايب العام هو الكآبة، الناس بتتشد للكآبة، الاكتئاب بقى تريند مش مرض، فأي حد " مبيعرفش يكتب" و عايز يكتب هيعمل إيه؟ هياخد أكبر تريند و يكتب فيه. فده ظلم ناس طبعًا تستحق النجاح
- ايه الأفكار اللي بتفضل نشرها؟
- كشغل، أي حاجة ليها علاقة بالعلم، من أول الميثيولوجي مرورًا باللوحات لحد الفيزياء النظرية و الرياضيات البحتة. كهواية، اللي عايز أنشره بنشره.. نسبة قليلة يعني
- نوع القراء المفضلين ليك؟
- اللي عايز يعرف أكتر من اللي أنا بديهوله
- الروايات ليها فوايد ولا كلام فارغ؟
- طيب.. مبدئيًا، خبط رزع كدا.. الروايات لا تقل أهمية عن الفيزياء مثلًا، و أي حد بيقول غير كدا فهو غالبًا مش مدرك كويس للي هو بيقوله. ليه؟ لإن تعالى معايا نشوف الشخص اللي لسه بيبدأ في العالم الجديد اللي اسمه قراءة.. تفتكر ينفع أديله كتاب بيتكلم عن المادية الجلدية مثلًا و أقول له " اقرا يسطا الكتاب دا و هتحب القراءة"؟ لأ طبعًا، أنا كده هخليه يلعن سنفسفيل اللي كتب حرف في كتاب يوم من الأيام و يحرق الكتاب و ينسى الفكرة. فلازم تخليه يبدأ بروايات، و مش أي روايات كمان.. يعني مينفعش قارئ مبتدئ يقرأ لنجيب محفوظ على طول كده، لإن أسلوب نجيب مش سهل في تذوقه.. فالقارئ محتاج ينمي تذوقه الفني الأول عشان لما يقرأ لنجيب يعرف هو ليه واخد نوبل.. تخيل واحد كان بيقرأ لأي روائي من بتوع اليومين دول و مرة واحدة مسك ثرثرة فوق النيل مثلًا.. هيقول ايه العبط دا. هو دا نجيب محفوظ اللي الناس بتقول عليه جامد؟ فالروايات مرحلة أساسية للناس اللي بتبدا في القراءة. طب و اللي فعليًا بيقرأوا كتير؟ أيوة برضه الروايات مهمة ليهم، الروايات قادرة إنها تفتح لك مجال تاني تمامًا من التفكير، مش مجرد إنك بتجري عينك على كلمات و بتتخيل مشاهد .. القارئ المحترم بيدي لكل كلمة حقها في أي سطر بيشوفه و أظن واضح أقصد ايه. بس عندنا مشكلة هنا، إن فيه ناس بتقرأ في مبحث واحد بس.. يعني إيه؟ يعني ناس بتقرأ روايات بس، و ناس بتقرأ كتب علمية بس، و كل طرف من الأطراف بيتريق على التاني.. و الحقيقة إن الطرفين مثيرين للشفقة جدًا والله. الأدب مهمته الاساسية إنه يلعب في حاجة جواك، الأدب مش موجه لعقلك في المقام الأول .. شغلته في قلبك مش عقلك، و بعد ما قلبك يتم أسره، بيتسحب عقلك له عشان يخدم اللي انت حاسس بيه. لو الادب معملش فيك كدا، يبقى انت مبتقرأش أدب.. أو مبتعرفش تقرا أصلا.
- الشخصية السيئة بتبقى جزء من روح الكاتب؟
- مش شرط طبعًا، قمة الاحترافية في الكتابة إنك تكتب اللي مجربتوش او محسيتوش.. سارتر في مجموعته القصصية "الجدار" كتب عن مشاعر أشخاص في زنزانة الإعدام، رغم إنه عمره ما عدى على قسم أول الزقازيق حتى.
- الكتابة محتاجة تفرغ ولا هي حبيبة تنتظر حبيبها في أي وقت
- على حسب إنت هتمارسها كمهنة بعدين ولا لأ.
- مشاريعك القادمة؟
- أعدي الشهرين الجايين دول
- وعد للقراء؟
- لأ موعدش بحاجة الصراحة أنا مش ملتزم و مش هلتزم
- نصيحة للكتاب؟
- الكتابة حلوة للي يفهمها، اقرأ و بعدين اكتب
- استمتعت؟
اه و دي حاجة مبتحصلش كتير
أنت تقرأ
داخل عقل الكاتب
Randomداخل عقل الكاتب تكمن حياوات، أحداث، أكوان موازية، مشاعر متدفقة، شخصيات كثيرة لا حصر لها، براكين و زلازل، ضحك و بكاء، حروب تخر لها الجبال، و عصور طال عليها العمر. آن الأوان أن ندخل هذا العقل و نتحدث معه قليلًا #1🥇interview #1🥇 حوارات
