تعويذة الشافعى

بداية الطريق

فى احدى مكاتب الهندسة بمحافظة بنى سويف تعلو اصوات النقاشات بين الجميع فى يوم حار جدا بمنتصف اليوم ويصمت الجميع حالما يدخل رجل يبدو عليه الوقار ويدخل الى مكتبه ويغلقه خلفه بهدوء فيعود الجميع الى اماكنهم ويعم الهدوء ارجاء المكان ثم يهمس احدهم قائلا لزميله :يا ترى فيه ايه النهارده .
فيرد الاخر وهو يطفىء السجارة بغل على سطح مكتبه:هيكون فيه اييه ،كله زى بعضه .
فيسمع اخر حديثهم ويقول وهو يخفض صوته بحذر :اكيد هينادى على واحد مننا دلوقتى بس احنا نسكت ونشوف هينادى على مين .
ويضحك احدهم بسخرية قائلا بعد ان نفس دخان سجارته : كلنا عارفين هينادى مين بس عمرنا ما هنروح نقول .
ويُفتح الباب سريعا فيصمت الجميع ويخرج الرجل من الغرفة فيعتدل الجميع فى جلسته وينظر اليه باهتمام فيسحب كرسيا بهدوء ويقول :اكيد انتو عرفتوا ان عندنا شغل جديد وطبعا عارفين ان بقالنا فترة كبيرة مش بنشتغل كويس بس الحمد لله جاتلنا الفرصة اننا نشترك فى احياء حى فى بنى سويف والمحافظ بذات نفسه كلمنى ،انا عاوز كل واحد فيكم يستعد ويعملى رسم هندسى للحى وانا هختار افضل رسم واطبقه ،عاوز تميز كده من تانى ،،عاوز الشغف يرجع باقصى سرعة عاوزكم تطفوا السجاير دى بقى وتشتغلوا ،هااا حد عنده اى استفسار ؟؟ .
رفع احدهم يده فأذن له بالحديث فقال متسائلا :يا ترى فين القياسات والملف الى هنشتغل عليه علشان نبدا من داوقتى يا بشمهندس عبد الرحمن .
عبد الرحمن بابتسامة :تعجبنى روحك يا محمود ،الملف يا هندسه هيبقى قدامك كمان ساعة انا بعت المهندسة شروق النبرواى تجيبه وتشوف الدنيا هناك .
تأفف احدهم  وسحب سجارة ثم اشعلها بضيق فلاحظ عبد الرحمن ذلك وقال بحدة :من الواضح انى قلت بلاش تدخين وانا بتكلم يا بشمهندس احمد ،،، على العموم  لينا كلام بعدين فى الشغل .
وابتسم عبد الرحمن حين طرق احدهم الباب ودخلت احدى الفتيات بمرح ثم استاذنت بالجلوس فأذن لها باسما ثم ابتسمت للجميع وجلست وهى تلتقط انفاسها قائلة بتعب وانفاس مضطربة : الملف اهو يا بشمهندس عبد الرحمن ،كل حاجه تمام بس فيه واحد بس مش راضى يسيب البيت ،باين عليه واحد من الجماعه المشعوذين دول والناس بتخاف منه بس ولا يهمك انا هتصرف معاه .
التقطت عبد الرحمن الملف من يدها وقال بهدوء :على العموم هيبقى معاكى زملاء متتصرفيش لوحدك ولو مرضاش يسيب البيت هنكلم حد من المحافظة يبعت قوات .
فأومات برأسها ايجابا وفوضع عبد الرحمن الملف امامهم وقال وهو يدخل الى مكتبه مجددا :الملف معاكم اهو معاكم ٢٤ساعة ،يلا يا شباب .
اقبل الجميع ينظرون الى الملف باهتمام وابتسمت احدى الفتايات الزميلات لشروق قائلة بابتسامة :ايوه مين قدك الشغل ظبط معاكى وفرحك قرب كمان .
شروق بضحك :ههههه هو انا هعمله لوحدى ،،على العموم مقبوله منك .