ناضت روطار كيف العادة العطلة تاع الصيف الكل وهي راقدة عين مغمضة ووحدة محلولة وتسيي تلقا التيليفون لي كان فوق لاطابل دو نوي شافت الساعة لقاتها 12:05 ناضت هزت بوكلاث تطم بيها شعرها وخرجت تمشي وتكر على رجليها وتستغرب كيفاه مانوضتهاش يماها اليوم وعايرتها بنتاجاتها رايحة تثاوب للدوش وفطريقها فاتت على الكوزينة سمعتهم متجمعين على طابلة تاع الغذاء(ديما مايستناوهاش ثالمون تنوض روطار)كانت داخلة تصبح عليهم كيف كل يوم شدتها جملة خلاتها تقعد مكوانسيا فالباب
سليم:صفاء راح تتصدم بالخبر راح تكون صعيبة عليها تتقبلو
اسلام:صح هي اكثر وحدة متعلقة بالحومة هاذي وناسها ماتقدرش تبعد عليهم
وسيم:پاپا لاح يثون ثاين تماك جعلولة ثيما تاعنا (بابا راح يكون كاين تماك جعلولة(ارجوحة للي جاتو الكلمة بيزار😹) كيما تاعنا
سليم:نخدملكم تماك وحدة ساهلة ههه
حليمة:واش راح نقول خدمتك تقول هاكدا حنا واش راح نديرو
دور وسيم للباب شاف ختو واقفة وعينيها مرغرغين بالدموع
وسيم: ثثاء لايحين لدال جديييدة ويديلنا باپا جعلولة ثيما تاعنا
دورو كامل يشوفو ردة فعلها لي كانت متوقعة واقفة مصدومة ماش قادرة تتحرك راح تروح من حومتها لي تربات فيها لي عاشت فيها17 سنة وعاشرت ناس ونااس وتعلقت بيها وتخلي صحابها لي هنا اسامة رأى واكرم وسلاف وعمها موحة لي من صغرها مكسرتلو راسو يديرلي ساندويتش تاع ڨرانطيطة ويكون كبير ومعمر على تاع الناس وتخلي كل ركن من هاذيك الحومة لي معتبرتها جزء من حياتها حركة راسها من ومن وطلعت تجري لبيتها الدرجة تطلعها بزوج درجات وعينيها مضببين بالدموع طلع اسلام وراها بالصح ماوصلش عليها وغلقت الباب فوجهو
(((;ꏿ_ꏿ;)))(((;ꏿ_ꏿ;)))(((;ꏿ_ꏿ;)))(((;ꏿ_ꏿ;)))
علابالي تحمستو تعرفو أبطالنا اللولين والباقي تعرفوهم مع الوقت
صفاء(●__●)(●__●)
بطلة القصة طفلة حلوة زينها عادي اما مسرارة وتدخل للقلب خمرية متوسطة فالطول ماسمينة مارقيقة عينيها بنيين غامقين شعرها نوار حنينة بزاف وتتقلق بالخف مين تتقلق هي وماتعرفش واش تقدر دير عندها باك من ناحية شخصيتها قوية وماش لي يجي يبكيها رزينة قدام الناس ومهبولة مع دارهم متحجبة ومتربية وخاطيها الخروج والعلاقات
اسلام:(●__●)(●__●)
خو صفاء الكبير مداصرين بعضهم وديما يدابزو كيما القط والفار بالصح فالحلوة و المرة كيف كيف اخوتهم مثالية
عندو صحبتو وصفاء شاكة فيه وراهي تسيي تتأكد عمرو 22 سنة عينيه نوازات وسمر وطويل يتشابهو هو وصفاء بزاف ماربحش الباك راح يقرا فالتكوين
وسيم(●__●)(●__●)
خوها الصغير عمرو عامين ونص تقول غمسوه فالعسل مين زاد حلوو وشباب وهو لي يفضحهم الكل فالدار ويفضح خرايبهم ويحشمهم🙂
سليم و حليمة والدين صفاء مبعد نتعرفو على عقليتهم
(((;ꏿ_ꏿ;)))(((;ꏿ_ꏿ;)))(((;ꏿ_ꏿ;)))(((;ꏿ_ꏿ;)))
غلقت الباب ورمات روحها على السرير وتبكي ماتخيلتش هاذ النهار يجي مالڨري تعرف طبيعة خدمة باباها أصلا قبل ما يسكنو فهاذ الدار قبل ماتخلق صفاء كانو فولاية اخرى
اسلام يدق فالباب
اسلام:صفااء ماتصغريش عقلك راكي كبيرة وتعرفي تروحي لتماك تدير صحاب جدد وتتعرفي على ناس جدد وتحبيهم وتحمدي ربي على لي عرفتيهم مانعاودش هدرتي دوك ونوضي اغسلي وشربي حليبك ووجدي حوايجك وعاوني يما فتخمال القش غدوة مبكرين وماتنسايش تودعي صحابك
عند هاذ الكلمة قواو دموعها وتفكرت لي souvenirs لي فوتت معاهم فاتت عليها ساعة وهي تبكي فاللخر استقوات على روحها وناضت وقفت قدام المراية ومسحت دموعها صح مين داك تصغر عقلها وتغلبها العاطفة بالصح بالخف ترجع تقوي روحها وترزن روحها ماعليها غير تتعايش مع الوضع لمت شعرها وحزمت الڨندورة وبدات تجمع فحوايجها فلي فاليز وتحط فادواتها فالكراطن كملت بيتها وهبطت تعاون يماها مين شافتها ضحكت معاها
حليمة:تاع الصح وليت نحسك كبرتي ورزنتي وبديتي ديري العقل يعيش بنتي هاكا نحبك ودي روحك لكل حاجة فهاد الدنيا ماتعرفي واش مخبيتلك
راحت باستها على جبينها وبدات تخمل معاها وصلت 1:00 تاع الليل وهوما مازال ماكملو ظهورهم تكسرو دخل اسلام لي كان يودع فصحابو
اسلام:واشش كعبوشة صافا
صفاء:خير عليك وقلتلك بطل تكنيني عيطلي باسمي
اسلام:يما كيفاش كان سمها بنتك بعدا؟
ضحكت عليه علابالها يحب يهبلها
اسلام:هاتو نعاونكم فواش قعد
صفاء:هاتو نعاونكم فواش قعد (تعكي عليه)كتر خيرك سي شباااب رانا كملنا جيت بكري
اسلام:عندك باك هاذ العام سينو كنت عطبتك وربي كبير
هي:ما شفتيه يغير مني😹😹
هو:كاين ناس معطوبين وجوزو الباك نرمال🙂
وراح يجري وراها وحليمة تتأفأف منهم راح يهبلوها جامي كمل نهار وهوما متفاهمين
وصل بيها عطاها طريقة عوقها
اسلام:ماتودعيهمش؟
هي:تعرفني
هو:تكرهي لحظات الوداع
هي:مممم
هو:براحتك بالصح راح يزعفو
هي:ومبعد يرضاو
هو:اوكي روحي ترتحي ارقدي شوية غدوة على 4:00 تاع الصباح
هي:اوكي
خرجت من شومبرتو وهو جبد التيليفون
هو:الو ...صافا...
حتى يلقاها زدمت عليه التيليفون طار من يدو
صفاء:ههههيهيهيهيي عرفتهاا عرفتهااا
هو:وش لي عرفتي ياالهم
هي:من وين هي شابة؟ طويلة رقيقة؟ وين عرفتها تقرا معاك؟؟
هو:اتنفسي ماكان والو من لي في بالك كنت نهدر مع وحد صاحبي راح نسكن حداهم مين نرحلو
هي:ممممم اوكيي جاي نهارك
هو:ماتداصريينييش
هربت تجري لبيتها لقات وسيم راقد فرشو فالأرض باسكو اغلبية الفراش جمعوه تسطحت جنبو وتبوس فيه وتعاود وتلعبلو بشعرو هزت قطها "بيشو"(تموت عليه وتعيطلو وليدي) قعدت تلعب معاه حتى جاها الرقاد رقدت
صباح جديد مخبيلنا احداث جدد ناضت على صوت وسيم يبكي يحوس على يماه
هي:حبيبي ارواح عند ختيتو تديك عند ماما ماتبكيش اعمري
هزتو وهبطتو تعطيلو الحليب لقاتهم كامل ناضو ويفطرو كلات بالواقفة وشربت وسيم حليبو وطلعت تلبس لبست عباية خفيفة ودارت خيمارها ولبست كلاكاث باش تكون آلاز فالفواياج وهبطت لبست لوسيم وستناتهم يوجدو رواحهم فهاديك الأثناء طلعت تتفقد دراهم وشمبرتها وكل ركن فيها للمرة اللخرة غلقتها ومسحت الدمعة السخونة لي هبطت
هبطت لقاتهم كملو تبسمتلهم وهزت بيشو غلقو الباب وخرجو قعدت تشوف من ومن فحومتها لي كبرت فيها كانت حابة تشوف صحابها بالصح علابالها كيفاه راح يكون الوداع وهي تكره هاذ الشئ الوغ هبطت راسها وركبت فاللوطو وركبت العائلة الكل
صفاء:راح نرقد ونتا يا وسيم يا ويلك ويا سواد ليلك وتنوضني
وسيم:ننن نودثش(مانوضكش)
هي:مين نوصلو نوضوني
دخلت فسبات تاع اهل الكهف حتى قربو يوصلو باش نوضها صوت تاع البكا تاع وسيم
صفاء:وسيييم واش كاين فحلقك يا زح ثوجوور تنوح واش خصصك
زاد ناض يبكي كتر
صفاء:اوو خلاص وسييمو سمحلي
جبدتو من يدين يماه وسكتتو ورقدتو شوية ووصلو هبطو قدام دارهم الجديدة طلعت راسها دار شابة فيها 2 ايطاج وتشبه للديور لي فداك الحي خدات نفس ودورت شافت فاسلام ووسيم وبداو يجريو شكون يوصل لأول وصل اسلام قبلهم كان المفتاح فيديو سما وفتح الباب
صفاء:وسيم ادخل برجلك اليمنى
ضحكلها ودارلها براسو ايه ودخل بلاڨوش
صفاء:وسييييم ارواح
حكمتو من الكابيش تاع التريكو وجبدتو
هي:عاود ادخل باليمنى ولوكان تدخل باليسرى نعاود نخرجك حتى تبان برا
ناض يبكي
سليم: ياطفلة علاه تحطي فعنادك مع الطفل صغيرر خليهم يدخل بركاي من الديڨات الجيران جدد ومانعرفوهمش يتقلقو
هي:خلاص بابا اسمحلي
دخلو الكل يستكشفو فارجاء الدار ريحو شوية وكلاو وبداو يهبطو فالباڨاج
لتحت منين كانو اسلام وسليم يهبطو
.....:اوووووو شكون شرفناا مرحبا بيكم فحومتنا
اسلام:ايي صاحبي
مهدي:ليك وحشة صديقي
ناضو يتعانقو وزاد خمس مهدي مع سليم وسلم على راسو
مهدي:عمي سليم صافاا واش حوالك ؟
سليم:بخير وليدي ونتا وباباك وين راه
مهدي:راه غير هنا خليتو يصلي باين عرف صاحبو وعشيرو جا راه مليح مين ما ناضش من فوق السجادة😹
ضحك عليه هوما ماكملوش هدرتهم وهو جا
أحمد:هههه جاابك الزمان تسكن حدايا يا سي سليم هههه
ناضو يتعانقو واسلام سلم على أحمد وناضو يعاونهم فالتهباط تاع القش حتى لآخر حاجة
سليم:تدخلو تشربو حاجة الله غالب الماكلة مانضنش توجد
أحمد:واش هاد الهدرة واش من ماكلة
مهدي:يهديك ربي عمي حنا نروحو نخلوكم تريحو تعبتو
سليم:لالا والله غير تدخلو تشربو حاجة
دخلوهم بالسيف قعدو فالصالون واسلام راح للكوزينة
اسلام: كعبوشة نوضي وجدي حاجة لصاحب بابا ووليدو
صفاء:شكون هادو
هو:وين تعرفيهم نتي كنتي دايرة ليكوش
هي:ممم صحا
هو:وديري خيمارك وليدو كبير ولا نقولك هاتي انا نديلهم ريحي نتي تعبتي
هي: صاحا خويا الزين 😒
وجدتلو وهو دالهم ضيفوهم وقعدو ڨسرو شوية وراحو
المهم جاز هاذاك النهار تاع تعب حتى رقدت روطار
ناضت الصباح تتململ على 12 لمت شعرها وجات خارجة ضربتها ريحة البغريير من بعيد
(حنا عندنا مين يرحلو لكاش دار ولا يديرو فال تاع اي حاجة البغريير مايخطيش)
غسلت وتوضات وصلات وزدمت للكوزينة كلات حتى ماقدرتش تنوض
حليمة:اليوم تدي الفال توزعيه على الجيران وتيجي لهنا كي الفحلة اليوم عندنا ميناج علابالك
هي:اوكي هاتي يلاكان واجد
وجدتلها طبسي تاع بغرير على حقو وطريقو
صفاء: بشكون نبدا بالصح
حليمة:لي تحبي
بدات توزع فالفال على الجيران رجليها طابو
صفاء:ماما تعيشي قوليلي هاذا اللخري
سليم:ايه هاذا وصاي هاذا سبيسيال لدار أحمد صاحبي
صفاء:وين جاية
سليم:شفتي دارنا احسبي 3 ديور وراها الدار لي اونفاص فالدار الثالثة هاذيك هي
صفاء:صاحا فهمتك
زادت هزت الطبسي وخرجت ديراكسيون لدار أحمد تاكدت بلي هي وصونات فتحتلها طفلة قدها فاللاج
منار:على السلامة مااامااا راهي جات بنت عمي سليم نورمالمون هي
وئام:ايه هي
منار:ادخلي مالكي واقفة
نجاة:اهلا ببنتي جوزي
هي:لالا مزروبة عندنا ميناج هه
نجاة:أواه لالا ادخلي
حكمو عليها الطبسي وداوها للصالون ضيفوها ورحبو بيها احسن ترحيب عائلة مااشاء الله بسيف خلاوها تجي وبعتو معاها منار تعاون فالميناج
صفاء هبطت سبقتها وتمشي بالعقل نستنى فيها تلحقها مهبطة راسها وتخمم فحياتها الجديدة وواش خلات وراها حتى تسمع صوت تاع كلاكصون خلاها تطير بالفجعة حلت عينيها على وسعهم بالخلعة وقعدت مكوانسيا ماقدرتش تتحرك
.....:يااربيي الواحد مكرز للخر يخرجولو هوايش فالطرييق
هبط يدابز و ويشوف واش بيها قرب شوية طلعت عينيها لي ولاو يلمعو يلمعو بالدموع من الخلعة شاف فعينيها و الدموع لي بللو رموشها خلاو قلبو يدق بلا مايحس
هي:عماااا نتا وااقييل(خرجت ڨاع الخلعة فديك العيطة ماش من عاداتها ترفع صوتها على الناس )
شارلها بيدو لبلاصة دورت تشوف لقاتها پلاكا مرسومة فيها بقرة( الپلاكا معنتها احذر حيوانات المهم شئ من هاذا القبيل عرفتوها نورمالمون نلقاوها فالطرييق)
هو:ااه اسمحيلي الغلطة فيا ماشفتش الپلاكا
وارواحو نتوما وايماجينيو حالتها والغش لي كان فيها بعد الكلاش لي داتو بدات تهدي فروحها بالكلام
هي:ماصرا والو ههه ايه راه يسيي يلعبلك على المورال باينة ماتتغششيش احكمي فأعصابك
فيقها بضربة بصبعتيه لجبهتها حست الدنيا دارت(كيشغل صرفق صباعو فجبهتها😂نشالله نكونوا فهمتو)
هو:بعدي من الطريق تشو وغمزلها وضحك بالشط
غمضت عينيها تتمالك روحها وسيات ترزن روحها وبعدت وهو فات وخلا الغبرة وراه قعدت تخبط فرجليها ميتة بالغزول 2 دقايق وجات منار
منار:صفااء وشبيك
هي:وحد الهايشة قريب دارلي الكوبي كولي على الارض
منار:سلامة راسك تولهي
هي:نشالله
مشاو وراحو للدار سلمت منار على حليمة وبداو فالميناج الدار قلبوها على راسها مين خلصو قعدو يڨسرو
اسلام داخل في أمان الله يلقا بليغة طاخت فراسو اسمو نساتو فيه طلع راسو لقاها صفاء من الدوزيام ايطاج رماتها عليه
هو:ابداي تجري
طلع ناوي على خلاها الدرجة بزوج درجات مايشوفش من الزعاف غير وصل للدرجة اللخرة حكمها من شعرها ناضت تعيط
اسلام:اصبرو هادا الصوت ماش تاع صفاء وحتى الشعر هاذا قصر من تاع صفاء😧(كانت نحات خيمارها باش تسيق آلاز)
دورت ليه منار تسيي تجبد شعرها من يديه وتتوجع غير شاف وجهها طلق شعرها ورجعت بزوج ميثرات للور من الخلعة وبدا يفرفط😂
اسلام:يا لطيف شكون نتي اسمحيلي حسبتك هاذيك الهايشة والله ماتولهت من الزعاف 😧😧
قعدت تشوف فيه وماسامعاش كامل بواش راه يقول وهو مين حبس وشاف فيها فاق بلي ماهيش تسمع فيه قاعدة غايسة حبس الهدرة ويشوف معاها ويفوت فيديه قدام وجها باش فاقت
منار:ااااه يالطييف واش بيه هاذا يڨطر بالزين
هو:انعم
هي:هااا واش ااه واش قلت هدرت معايي؟
هو:ايه قلتلك اسمحيلي حسبتك صفاء
هي:هي من لي هربت كي رماتها
هو:حسابها مبعد
راح وخلاها واقفة ومازالها تشوف فيه طيرلها عقلها دورت تحوس على صفاء لقاتها تشوف من الشق تاع الباب يلا راح خوها باش تخرج
منار:انا نروح صفاء
صفاء:اصبري اقعدي شوية نڨسرو
منار:لالا نروح طولت دوك يتقلقو لعشية ارواحي تسهري عندنا ماناش برانيين رانا عايلة وحدة بابا النهار الكل يحكيلنا عليكم كيما تعرفي راهم عشرة طويلة هو وعمي سليم وكانو عايشين فدار وحدة قبل مانخلقو حنا تسما ديرينا عايلتك التانية ماتحسيش روحك غريبة وكل ما تديقي ارواحي هاكا
صفاء:نشالله صحيتي
وصلتها للباب وهي راحت لدارهم وبالها غير مع اسلام بالصح ماسياش مامبا يسقسي شكون هي ..
كان مبحر مع صحابو لحقت العشية رجع للدار الطريق الكل يضحكو ومشعلين الغنا ويتمهبلو هو وصحابو وصلهم لديورهم (هوما كامل زواولة وماعندهمش وحتى هو شرا اللوطو بعرق جبينو ماش باباه شراهالو مايحبش هو لي يصرف عليه سورثو حاجة كيما الطوموبيل المهم ماتفهموهاش عندو طوموبيل الله الله عندو505 مبعد نحط تصويرتها يلا تفكرت المهم النهار الكل يهرد فيها 😂كل ساع وين يدخل بيها يمشيها فكل بلاصة تقول ثراكثور ماش طوموبيل😂 ايه حقا تانيك عايلتهم ماش من النوع المرفه يعني على قد الحال ماش فقراء وماش اغنياء وعايلة صفاء تانيك نفس الشي)
وصل للدار فتح الباب لقا الطابلة واجدة يبانو عندهم ضيوف
مهدي:يما شكون جايين؟
نجاة:ييي كون نقوولك جايا صحبتي عندي اليوم عايلة عمك سليم عرضناهم للعشاء
مهدي:ااه مرحبا بيهم انا ميت بالعيا نروح نرقد ماكاتباش نتلاقاهم مرة أخرى
نجاة:اوكي كيما تحب
راح دوش وراح لبيتو وتسطح على سريرو هاذ المرة على غير الافكار المعتادة لي مولفين يجوه قبل مايرقد جاو دوك العينين فبالو مزالهم مترسخين فذهنو تبسم بلا مايحس وحط يديه تحت رقبتو ويشوف مع السقف
مهدي :اول مرة نشوفها فالحومة بالصح زعما منين جات بفف ياخي حالة ماشي كنت تعبان
استغفر ورقد
