في المطار كانت العيلة كلها مجتمعه يعني والدة هيفاء ووالدها ونفس الشي مع العنود اللي كانت مرة متوترة من الرحلة لان بيني وبينكم عنود فيها خوف من الطيارة على كثر مايسافرون بس تخاف،وهيفاء كانت مخططه تخلي الرحلة جهنمية لعنود انتقام لذاك اليوم وهيفاء مب من النوع اللي ينسى،فلما اعلنوا بالمايك ان على كل الركاب المتوجهين للندن الحضور للبوابه رقم 32 عنود انقلب وجها الوان فتمسكت بامها خايفة
عنود:يمه قولي ثاني مرة ايش هو دعاء ركوب الطيارة.
ام حمد:عنود ماله دعوه هالخوف كله سمي بالرحمن.
العنود واهي متنرفزة من برود امها:يمه بنركب الطيارة وانتي لسه ماقلتيلي الدعاء....
ام حمد:سبحان الذي سخر لنا هذا وماكنا له مقرنين وانا الى ربنا لمنقلبون...حفظتيه ؟
العنود :اصلا انا حافظته بس الخوف خلاني انساه..
حمد اخوها قاعد يطالع امه والعنود اللي متمسكه فيها من الخوف يمشون قدامه فقام يبي يخوف العنود شوي.
حمد:يمه...مادريتي؟
ام حمد: لا مادريت ..
حمد:تعرفين ليه تاخرنا...؟
ام حمد:لا والله ليه؟
حمد بخبث:لان الطيارة كانت عطلانه فلما صلحوها نادونا..
العنود هنا التفت على حمد وهي مبققه عيونها :حمد بجد تتكلم؟
هيفاء فهمت حركة حمد فكملت معه:ايه صحيح كلام حمد انا كمان عرفت بس ماحبيت اخوفك.
حمد قمز لهيفاء على اللعبة اللي يلعبونها على العنود:اف نسيت انك تخافين من الطيارة... بس خلاص يالعنود انتي كبرتي على هذا الخوف ..وبعدين الطيارة خلاص صلحوها ..
هيفاء تبتسم بخبث:ايه كلش اللي يسمعك يقول الطيارة بطيح علينا..
العنود هنا ماستحملت فطقتها صيحة،وقعدت تقول انا مب راكبة الطيارة وشكلها كان يكسر الخاطر فحزن شكلها هيفاء فقامت قربت منها..
هيفاء:عنوده يالخبلة تبكين ...انا وحمد قاعدين نمزح معك الطيارة مافيها شي...
العنود وهي ترفع وجهها اللي صاير احمر:يالكذابه .. اللحين تكذبون علي عشان اركب الطيارة..
حمد وهو يضحك على اخته:هههههههههههه والله انك سخيفة وما عندك سالفة .. اقولك ترا احنا كنا نمزح معك ويله قومي و خلي منك هالحركات ..
العنود وهي اطالعهم الاثنين بحمق : صدق انكم اسخف ناس قد شفتهم بحياتي...والتفتت على هيفاء..وانتي لاتقعدين جمبي بالطيارة فاهمه؟
تركتهم العنود وركبت الطيارة وخلت مها اخت هيفاء تقعد جمبها بالطيارة.
وحمد قعد مع امه وابوها قعد مع خالها ومحمد المسكين قاعد جمب واحد اجنبي وهيفاء يوم شافت ان العنود من جدها ماتبيها راحت وقعدت جمب امها.
هيفاء..وهي قاعده في الطائره تذكر اللي صار قبل اسبوعين واللي غير مجرى حياتها ..كان اخر شى توقعه..بس هذا نصيبها..كانه صارلها بالامس ..
(في ذاك اليوم اللي رجعت العنود وهيفاء فيه من السوق..كانت هيفاء قاعده على الماسنجر تكلم رفيقتها ..الا امها داخله عليها ..وجهها يعبر عن شى ..جلست على السرير مقابلتها
ام فهد:يما هيفاء..ابيك تسمعين كلامي زين وتركزين ولاتكلمين ليمن اخلص كلامي..
هيفاء:خير يما عسى ماشر روعتيني
ام فهد:خير يايمه مافي الا العافيه بس انت لا تستعجلين
هيفاء:تستعجلين وتركزين لا السالفه كبيره
ام فهد:امس بعد المغرب كانت عندنا خالتك لطيفه وكلمتني في موضوع يخصك
هيفاء:والله يالبى قلبها والله مشتاقه لها حيييل.. بعدين ليش ماقلت لي اجي اسلم عليها ..لحظه لحظه ..قلتي موضوع يخصني..اي موضوع ..؟
ام فهد وهي معصبة:خلصت .. خليني اتكلم ولا تقاطعيني..خالتك جات امس عشان تطلب يدك حق عيال اخوها منصور
هيفاءوبنظرة خوف :لا مستحيل اخذ تركي ..تركي لا ..لوتفضى الدنيا من الرجاجيل ماخذه
امها وقفت ومسكتها من كتوفها :من اللي قال انك بتاخذين تركي ..وش فيك نسيت نواف اخوه
هيفاء وبنظرة دهشه: نواف
امها :أي نواف..نواف اللي خطبك وقال انه يبيك من زمان بس استنى لين تخلصي الثانويه ..يقول انه حطاك في باله من يوم كنت صغار ,, ويتمنى اليوم اللي تكوني فيه مرته
هيفاء تطالع امها بنظره حزينه "يما بس انا توني صغيره على الزواج وقدامي مستقبل وطموحات في نفسي اسويها ..والزواج بيعطلها
ام فهد:لا بس ولا شى ..الولد بخير ونعمه ..ولا تنسين انه من عيال منصور الضاوي ..مستعد يخليك تدرسين في احسن الجامعات وبرع زي ماتمنيتي وكفايه النسب اللي بنستحقه من وراه ..كل بنت تتمنى تاخذ من عيال الضاوي..هذه فرصه وماحد يضيعها
هيفاء وهي حزينة: يما ..بس كذا انت تبعيني ..انا غير عن كل البنات ماتهمني الفلوس والجاه ..انا يهمني اخلاقه تفكيره شلون ..يما نواف مايناسبني
امها وبنظرة اندهاش:انا ابيعك!!انا ابيع الناس ولا ابيعك.. انت بنتي.. شمعةالبيت انا يا يما اتمنى اليوم اللي اشوفك فيه بسعاده في بيت رجلك ,,ونواف لو ماشوف انه يناسبك ماقلت لك اخذيه بعدين لاتنسين هذا ولد اختي
هيفاء:يما ,,بفكر بس بشرط ..انه ماراح املك عليه الحين بعد ماخلص ثاني سنه جامعه
بس انا قلت بفكر
امها وبابتسامه عريضه:استخيري يابنتي وفكري زين لاتستعجلين اخذي راحتك
هيفاء:ان شاء الله يما بفكر في الموضوع
امها وهي تطلع من الغرفه التفت لها:الا هيفاء..وش فيك خفت من طاري تركي ..لا تنسين انه بيصير حماك ولا زم تتعودين عليه
هيفاء وهي ترتجف : ها أي ..تركي لا يما بس ماتخيلت يوم من الايام انه بياخذني ..وحتى انا مابيه
ام فهد:ليش وش مسويلك عشان تاخذين منه هذا الموقف ..بالعكس تمنيت انه ياخذك ..بس النصيب..يلا ياحبيبتي ..بخليك تصبحين على خير
هيفاء:وانت من اهله يالغاليه
هيفاء اول ماطلعت امها من الغرفه طاحت على السرير من الرجفه اللي تسري في جسمها ..قعدت تطالع السقف يارب انا في كابوس ..انا مافكرت في الزواج واذا فكرت ..مب من عيال خالي منصور..(تركي...كل ماسمعت هالاسم كوابيس الماضي ترجع لي ..اوبالاحرى الذكريات الحلوه اللي انقلبت فوق حدروصارت ذكريات حزينه للحين من جروحها اعاني وغيرت كل الموازين واولها مشاعري ..تجاه تركي ..اللي تغيرت من مشاعرصداقه الى الكره..) ليش يارب ..ليش وش معنىنواف اخو تركي ..كل ماتذكرت وجه امي وفرحتها ارجع اغير راي ..لا لا تصيرين انانيه ..فكري في ابوي وامي..اه تنهدت هيفاء.. في هالليله النوم ماقاربها قعدت تفكر في القرار.. اللي بغير مصير حياتها كله.. قامت هيفاء الظهر وهي تحس بثقل بجسمها وبتعب لانها مانامت الا كم ساعه حست انها مافيها حيل تنزل تحت ..الا سمعت الباب يطق عليها
هيفاء بصوت مبحوح :ادخل
الاوجه ابوها السموح يطل:صباح الخير ياحلى بنت في الدنيا.. (وفي يده صينية فطور
) وهي تطالعه بنظرة صدمه:يبا وش له متعب عمرك تجيب الفطور بنفسك ؟ كان خليت الخادمه تجيبه..ههههههههههههه تصدق ماتخيلت يوم من الايام اشوفك كذا
ابوها:هههههههههههه ليش مايليق علي اشيل صينيه..وش اسوي ماشوفت وجهك على الفطورالصبح ..قلت اجيبلك الفطوربنفسي.. فيها شى اذا اشتاق اب لبنته
هيفاء:ههههههههههه لا مافيها شى يالغالي ..بس ماراح اكل الا بشرط ..؟
بوفهد:وشوالشرط....؟
هيفاءوهي تضحك:انك تاكل معي ..لان الاكل معك يابوهيفاءيفتح النفس
بوفهد:بس هذا ..انت ماتطلبين ..انت تامرين امر..يلا يابنتي سمي بالرحمن واكلي
بدات هيفاء وابوها..ياكلون بصمت ..حست هيفاءفي نفسها ان ابوها يبي يكلمها عن موضوع امس بس ماعرف شلون يفاتحها .. الجو اللي بينهم كان مشحون بالمره
استنى ابو فهد لمى تخلص هيفاء من فطورها
ابو فهد :هاخلصت يابنيتي..(هيفاء هزت راسها موافقه)في العافيه يا بنيتي
هيفاء:الله يعافيك..ها يبا جيتك هنا فيها شى ..شكلك تبي تقولي حاجه
ابوفهد:أي يبا ..على ماظن امك كلمتك امس ..عن نواف..ووجيت اليوم اشوف وش نويت عليه والصراحه ابي اريحك من هواجيسك..اللي تفكرين فيها
هيفاء:هواجيس ..اي هواجيس؟
ابوها:يابنتي انا على خبري فيك من يوم كنت صغيره وانت تفكرين في غيرك قبل نفسك ..وانا اعرف انك ناويه توافقين عليه عشان تفرحين امك .. بس انا جاي اقولك انه مهما كان قرارك احنا راضين فيه واذا رفضتيه راح تكملين دراستك وتاخذين الدكتوراه اللي وعدتيني فيها ..اما اذا وافقت عليه راح تفرحينا.. والله راح يوفقك معه ان شاء الله
هيفاء :مادري وش اقولك يبا انت كذا ريحتني من هم ثقيل
ابو فهد:لا تقولين شي..بس احذرك اذا بتوافقين عليه وافقي لاسباب تخصك انت مو عشانا ..احنا مانبغي الا سعادتك..يلا انا بخليك تفكرين على راحتك
هيفاء والعبرة خانقتها: يبه ..(ماقدرت تكمل اللي تبي تقوله فقامت وضمته
بو فهد منصدم:ههههههههههه..اللحين ابغيك تفكرين تروحين تبكين..اذا البكى هو الحل كان قلت لك ابكي من زمان.. بس امسحي دموعك لا تخليني ازعل عليك تدرين اني ماقدر عليها.. في هالليلة قررت هيفاء انها توافق بعد تفكير طويل لانها راح تظلم نواف اذا حكمت عليه من خلال اخوه..
* * * * * * * * * * * * * * * * * * * *
في حي راقي في الرياض على بعد شارعين من شارع العليا فيلا لفتت انتباه الناس بجمال تصاميمها للي كان على شكل تصميم هندي..كان بيت منصور الضاوي من اكبر التجار في الخليج وسمعته اللي تهز السوق هز..الفيلا تكون من ثلاث طوابق ..في الطابق الارضي كانت العمه لطيفه تكلم ام فهد بالتلفون
العمه لطيفه :صددددق الله يبشرك بالخير والله انه هذا احلى خبر سمعته
ام فهد :والله انه هذه الساعه المباركه اللي ناسبناكم فيها
العمه لطيفه:خل اروح ابشر نواف بيطير من الفرحه
الا باب الصاله ينفتح ويدخل نواف وهو تعبان من الشغل
العمه لطيفه ماسكه السماعه:الطيب عند ذكره.. تعال ياولدي ابشرك
نواف مستغرب:بو وشو عمتي؟
العمه وبفرحه واضحه:هيفاء وافقت عليك ولدي
نواف مازال مومصدق اللي يسمعه:هيفاء وافقت..انافي حلم ولا في علم
مدت له بسماعة التلفون :وهذه خالتك ام فهد على الخط كلمها باركلها
كان نواف متحمس خذا السماعه:هلا خالتي ام فهد
ام فهد:هلا بولدي نواف ..مبروك مبروك..يولدي..تستاهل
ضحك نواف:الله يبارك بعمرك ياخالتي..وش اخباركم..ان شاء الله طيبين
ام فهد بخبث :وش اخبارنا ولا وش اخبار هيفاء ..عالعموم احنا بخير
نواف:هههههههه بالعون سؤالي عنكم عامة ماقصد فيه حد.. بس مادامك جبت طاريها وش اخبار الغاليه .. ام فهد:ههههههه من الحين غالييه..مانت بهين يانواف
نواف:والله ياخالتي غلاها بقلبي ماتغير..الاخالتي اذا ماعندك مانع اكلمها ابارك لها
ام فهد حست بارتباك:ها..اي هيفاء بنتي طالعه لبيت عمتها اذا ردت بخليها تكلمك يلا حبيبي ما اطول عليك سلم على عمتك لطيفه ومع السلامه
نواف حس بخيبة امل :الله يسلمك نشوفك على خير
ام فهد حست براحه انها ماكلمها لان هيفاء من يوم وافقت وهي ساكته ماتكلم تمشى مثل الميته حست انها ظلمتها بس ماحد جبرها تاخذه..الله يهديها.. وتقتنع.. سكر فهد السماعه وهو مكتئب
وعمته تطالع فيه.. رفعت راسها له:وش فيك ياولدي اختبصت
نواف بهدوء :لاولاشى كنت ابي اكلم هيفاءبس طلعت مب موجوده
العمه لطيفه وفيها ابتسامه:لاحق عليها ان شاء الله الا ماكلمنا اخوك تركي نقول له
نواف وهوسرحان:أي لازم نقوله خبر مثل هذا لازم يعرفه
العمه لطيفه:بس اناكل ماكلمته مايمسك الخط شكله مسافر بلاد بعيده
نواف باهتمام:متى اخر مره كلمتيه
عمته وهي تفكر:اخر مره قالي انه في اليابان عنده صفقه بعدين بيروح لندن عنده اجازه هناك
نواف :اجل شكله عاده في اليابان لان الخطوط صعبه من هنا لهناك
ونواف بينه وبين نفسه يقول وهو يبتسم ابتسامة خبث :وينك ياخوي تسمع هالخبرية.....
*
*
*
*
لا تنسون تعطوني رأيكم بالتعلقيات ❤❤
دمتم سالمين...
