صحت العنود من النوم مفزوعه من الحلم اللي شافته والعرق يتصبصب من جبينها وقلبها يدق بسرعة التفت تشوف هيفاء لقتها نايمة ..الحمدالله ماحست فيني،لبست الروب الصوف فوق البيجاما وطلعت من الغرفة راحت وقعدت فوق السطح الوقت كان لساته بدري كانت الساعه 6 الصبح فقعدت تراقب البيوت وتأمل هدوء الشوارع ..ورجعت تفكر في الحلم اللي شافته ياترى ايش يكون تفسيرة لا والغريبة انه تحلمت فيه اهو بالذات ..شوي الا هيفاء جاية وقعدت بجنبها قعدوا الثنتين ساكتين وكل وحده سارحه بافكارها الخاصة..كانت هيفاء تفكر بالسايق وماتدري ليه تحس انه مب غريب عليها..بس هي لو تعرفه كان من المستحيل تنسى وجه..
العنود التفتت عليها:ماقدرتي تنامين؟
هيفاء التفت على العنود اللي كان وجهها اصفر:لا..وانتي؟
العنود نزلت راسها:شفت حلم خلاني اقوم من النوم..
هيفاء:ايش كان الحلم عنه؟
العنود وهي تحس بدقات قلبها تسارع ومحتارة اذا تقول حق هيفاء ةلالأ؟بس هي عمرها ماخبت على هيفاء شي
العنود:تحلمت بفواز..
هيفاء تطالعها بصدمة:فواز..
العنود وهي تهز راسها :ايه لكن الحلم كان يخوف..
هيفاء:كيف يعني يخوف؟
العنود:متحلمه اني قاعده امشي بضباب وامد ايدي عشان اعرف طريقي لكن الضباب كل ماله يزيد وقفت مكاني خايفة الا ايد تمتد لي من الضباب واحد يقولي لا تخافين..مسكت ايده ولما بين الشكل الا هو فواز يطالعني بابتسامه غريبة..
سكتت العنود..
هيفاء وهي معقدة حواجبها:وبعدين...كملي يالعنود؟
العنود وهي تبلع ريقها:انا ضحكت ومشيت معاه شوي الا يوم هدني وخلاني لحالي وانا اركض وراه انادية لكنه اختفى..
تمت هيفاء ساكته ماتعرف تفسير لها الحلم..وبعدين طرا ببالها انه ممكن يكون تحذير علشان العنود تتجنبه..
هيفاء:العنود انتي لازم تتجنبين فواز باي طريقة ممكن يكون ناويلك شر وانتي ماتدرين.
العنود:تظنين كذا؟
هيفاء وهي تهز راسها:ايه..
العنود تنهدت وهي موافقه مع كلام هيفاء المره الجاية اللي تشوف فيها فواز بتسفهله حتى ولو فشلها ولا قط عليها كلام بتحاول تمسك لسانها..
العنود التفتت على هيفاء وهي مستغربه:الا انت وش عندك قايمه من صباح الله خيره..غريبة.
هيفاء وهي تهز كتفها:لا بس قاعده افكر بالسايق اللي مأجره ابوي..
العنود بأستغراب:خالي مأجر سايق؟
هيفاء:ايه..لا والسيارة بنتلي بعد..
العنود بابتسامه:والله منت بهين ياخالي بنتلي مرة وحده..بس غريبة انا اخبر انهم قالوا ان السيارة اللي ماجرينها مرسيدس فان..
هيفاء هنا خافت:العنود انتي متأكدة؟
العنود:لا والله بس هذا الكلام اللي سمعته ..بس احسن انه اجر بنتلي عشان نكشخ فيها..
هيفاء ماكانت مع العنود كانت تفكر اذا كان كلام العنود صحيح معناته ان السايق كان صادق وانه مش سايق..ياربي انا ركبت مع رجل غريب الله يافضيحتي ..
العنود لما شافت وجه هيفاء تغيرخافت:هيفاء شفيك..بطنك لساته يعورك؟
هيفاء:هه..يعني شوي بس ابي اسال ابوي عن السيارة ابي اتاكد اذا كانت بنتلي ولا لأ؟
العنود :شفيك كذا مهتمة لهالدرجة بالسيارة..
هيفاء وهي شوي بتصيح:العنوووود اذا كان اللي في بالي صح باموت..
العنود وهي خايفة:هيفاء شفيك تراك خوفتيني؟
هيفاء وهي قايمة بتنزل تحت :بعدين بقولك بس الاول اتاكد..
راقبتها العنود وهي تركض نازلة تحت ..لا البنت شكلها جنت..
