The World of Discipline

Part 02

(unicode)
အလုပ်ကိစ္စမို့သာ ခြေချရသည်၊ ဒီအိမ်ကြီးတစ်ခုလုံးဟာ Kyle အတွက် စိတ်ရှုပ်စရာ ရွံရှာစရာတွေချည်းပါပဲ။ ရှူနေရသည့် လေထုကိုက အဆိပ်အတောက်တွေလို သူ့အဆုတ်ကို မွန်းကြပ်စေတော့ နှင်းဆီပင်တွေဘက်သာ လျှောက်လာခဲ့လိုက်သည်။ ဒီအိမ်နှင့်ဒီခြံကြီးတစ်ခုလုံးမှာမှ သူသဘောခွေ့တာ နှင်းဆီမေတွေပဲဖြစ်​သည်။ လေပြေအေးက တစ်ချက်ဝေ့တော့ နှင်းဆီငွေ့က သူ့နှာဖျားကို ကျီစယ်​၏။

အခု Kyle ရောက်နေသောနေရာသည် ပန်းခင်း​၏ ချောင်ကျသော ထောင့်တစ်နေရာမှာပါ။ မနည်းတော့သည့် တိုက်ပွဲအတွေ့အကြုံတွေကြောင့် မှောင်ရိပ်ကျသည့် နေရာကိုပဲ လက်ဦးတတ်တာ အကျင့်တစ်ခု ဖြစ်နေပြီ။ ရန်သူ့ပိုင်နက်ထဲမှာမို့ အသိနှင့်သတိက ကိုယ်နှင့်ခွာမရ။ မျက်လုံးတို့ကို အနားပေးစဉ် ခပ်သုတ်သုတ် ခြေသံတစ်စုံဟာ သူ့နားစည်ကို လာရိုက်​၏။

Kyle မှိတ်ထားသည့် မျက်လုံးတွေကို ဆတ်ခနဲဖွင့်မိလိုက်သည်။ ကျောင်းစိမ်းဝတ်စုံနှင့် ကောင်လေးတစ်ယောက်က သူ့အမြင်ကို နှုတ်ခွန်းဆက်​၏။ သန့်ပြန့်နေသော အဝတ်အစား အသုံးအဆောင်များကြောင့် ဒီကောင်လေးက တစ်ခုခုတော့ တစ်ခုခုပဲဟု Kyle ရိပ်မိလိုက်သည်။

သို့ရာတွင် ကောင်ကလေးက ဒီအိမ်​၏သခင်၊ သူ​၏ရန်သူတော် အဖိုးကြီး David (ဒေးဗစ်) ​၏ မျက်နှာပေါက်နှင့် တစ်စက်ကလေးမှမတူ၍ စိတ်ဝင်စားသွားပြန်သည်။ ဒါပေမဲ့ ဒီလောကကြီးမှာ အဖေနဲ့သား ရုပ်ချင်းမဆင်တဲ့ သားအဖတွေမှ အများကြီး။ ကောင်လေးက သူ့အမေနှင့်တူတာ နေမယ်ပေါ့။ ဒါလည်း တစ်မျိုးတစ်ဖုံ ကံကောင်းခြင်းပါပဲ။ လူရှုပ်အဖိုးကြီး David နှင့် ရုပ်ချင်းလာဆင်နေမှ ဒီကောင်လေး ဒီတစ်သက် ဗျာများရချည်ရဲ့။

ကောင်ငယ်လေးက Kyle ကို မမြင်။ မျက်နှာကဲခတ် ကျွမ်းကျင်လှသည့် Kyle ဟာ တောင်မြောက်ပြေးလွှားနေသည့် မျက်လုံးဝိုင်းဝိုင်းလေးတွေကို သတိပြုမိလိုက်သည်။ ဒီကောင်လေး ဘာမဟုတ်တာတွေ ကြံစည်မလို့လဲ။ Kyle ဘာရယ်မဟုတ် စိတ်ရှည်လက်ရှည် ရပ်ကြည့်နေလိုက်သည်။

မကြာလိုက်ပါ။ ကောင်လေးလက်ထဲ ပါလာသည်က report card နှင့် ခဲဖျက်တစ်ခု။ ကောင်လေး ဘာဆက်လုပ်မလဲ Kyle သိလိုက်ပြီ။ ဒါ သူ ငယ်ငယ်က လုပ်ခဲ့သည့်  အကွက်တွေပဲ။ ခပ်တည်တည်နှင့် အဆင့်ပြင်ထားသည့် report card ကို Kyle ပါပါးရှေ့ထိုးပေးတော့ ပါပါးက တစ်ချက်သာကြည့်ပြီး ကြိမ်နှင့်ဆယ်ချက်ဆော်ချလိုက်သည်။ ကဲ မှတ်ကရော။