The World of Discipline

Part 06

(unicode)
Kyle သူ့အခန်းထဲ ပြန်ရောက်လာတော့ စိတ်ရောကိုယ်ပါ ချုံးချုံးကျချင်နေပြီ။ ရန်သူတော်ကြီး​၏ ရွံရှာစရာ သွေးညှီနံ့တို့ ကပ်စွဲနေသည့် အဝတ်အစားများကို ခပ်မြန်မြန်ပင် ဆွဲကာချွတ်လို့ ရေချိုးခန်းထဲ တန်းဝင်လိုက်​၏။

ယခုဖြစ်ပေါ်နေသည့် စိတ်အခြေအနေအရ Kyle တစ်ယောက် bathtub ထဲတွင် ဇိမ်ခံလို့ စိမ်ပြနပြေ ချိုးမနေချင်တော့။ နံရံပေါ်က ရေပန်းကို ဆတ်ခနဲဖွင့်ကာ ဆံပင်တို့ကို ဖွပစ်လိုက်သည်။ ခပ်ကြမ်းကြမ်းမှ တကယ့်ကို ခပ်ကြမ်းကြမ်းပေမို့ ဆံသားတို့သည် တစ်ခဏအတွင်း စိုရွှဲကုန်ကာ နွေးမနေသည့် ရေအေးတို့က မေးရိုးတစ်လျှောက် လှိမ့်ကာဆင်း​၏။

တောက်!

ဘာကို ဒေါသထွက်လို့ ထွက်မှန်းမသိ။ တောက်ခေါက်သံ ခပ်ပြင်းပြင်းက မှန်သားနံရံထက် ပဲ့တင်ထပ်လို့၊ တဖွဲဖွဲဆင်းနေရှာသည့် ရေစက်ကလေးတွေပါ တုန်တက်ကုန်ရသည်။ စိတ်မရှည်စွာပင်၊ Kyle ​၏လက်ဖဝါးက နံရံပေါ် ဖောင်းခနဲရိုက်လေတော့ အပြစ်မဲ့သော ရေပေါက်ငယ်တွေ ငါးပါးမှောက်ကုန်ရ​၏။

ဘာလို့များလဲ။ ပါပါးကို coma ဝင်အောင် ချောက်တွန်းခဲ့တဲ့ ဟိုအဖိုးကြီး David ကို လက်စတုံးနိုင်လိုက်လို့ Kyle သည် ဝိုင်တစ်ခွက်နှင့် အောင်ပွဲခံနေရမှာ မဟုတ်ဘူးလား။

ဟုတ်ပါသည်။ တကယ်က အဲဒီလိုဖြစ်နေသင့်တာပါ။ သို့ပေမယ့် ယခုကတော့ ထင်ထားသလို မဟုတ်။

တရားခံက ဘယ်သူလဲ။

Kyle ​၏အကြည့်စူးစူးတစ်ချက်အောက်မှာ ရေစက်ငယ်တွေ ကြောက်လန့်တကြား ဝေးဝေးပြေးကြ​၏။ ပါးစပ်ကလည်း ရေရွတ်ပါသည်။ "ကျွန်တော်တို့ မဟုတ်ရပါဘူး" တဲ့လေ။

တရားခံဟာ ဟိုကောင်လေး။ စစ်ငယ်။ အရွယ်ဟာ ငယ်သလောက် Kyle ​၏ ဒေါသမီးကို ဟုန်းဟုန်းတောက်စေ​၏။

ထိုကောင်လေးအား နာရီဝက်အတွင်း အခန်းထဲ ပြန်ခေါ်ထားတာကြောင့် Kyle ကိုယ်လက်သန့်စင်ခြင်းကို လျင်မြန်စွာ အဆုံးသတ်လိုက်သည်။ သူတစ်ပါးအား စောင့်မနေစေချင်သလို သူကိုယ်တိုင်ကလည်း စောင့်ရခြင်းကို သိပ်မုန်း​၏။