The Song of a Willow Tree ( season 1 + 2 ) |[ COMPLETED ]|

S 2 : Ch 6 - The Past (6)

(Unicode)

သေဆုံးခြင်းနှင့် ရှင်သန်ခြင်း သံသရာတွင် လည်ပတ်နေသရွေ့......
ဖူးစာကြိုးနီလေးသည် ဖြတ်သန်းရမည့် ဘဝအဆက်ဆက်သို့ လိုက်ပါရန် အသင့်... ။

............

ပူပြင်းသော နက်ပြာရောင် နွေညတစ်ညဖြစ်သည် ။
ပုရစ်ကလေးများ တစီစီအော်မြည်နေသည် ။ ငြိမ်သက်သော ကန်ရေပြင်စိမ်းမြမြပေါ်တွင် ကြာပန်းများ လှပစွာပွင့်ဖူးလျက်ရှိသည် ။ လေတချက် အဝှေ့တွင် ဝါးရွက်များ အချင်းချင်းပွတ်တိုက်သံတရှဲရှဲက ဆူညံသွားသည် ။

ဝါးဖြင့်ဆောက်လုပ်ထားသော အိမ်ကလေးအတွင်းမှ အိပ်ခန်းတစ်ခန်းထဲတွင် ကြင်ယာတော်နှင်းလုံးလေး အိပ်မောကျလျက်ရှိသည် ။
အိမ်ဘေးလသာဆောင်တွင် အပေါ်အင်္ကျီဗလာဖြင့် ရပ်နေသော အရှင်ရှင်းက လက်ထဲမှ အငွေ့မသေသေးသော ဆေးတံကို ချလိုက်သည် ။ သပ်တင်ထားသော ငွေမင်ရောင်ဆံပင်များထဲမှ အချို့က နဖူးပေါ်အရိုင်းဆန်စွာ ဝဲကျနေသည်။ ဆေးရွက်နံ့သင်းသော လေငွေ့တို့ကို မှုတ်ထုတ်ရင်း ကောင်းကင်ပြာကို ရှင်း ငေးကြည့်နေသည် ။

သားရဲဘုံမှ သမန်းသားရဲတို့၏ သားရဲအသွင်မှာ မွေးရာပါဖြစ်သည်။ ထိုသားရဲအသွင်သည် မွေးပြီး ၂ရက်အတွင်း... မွေးမိခင်ကို မြင်နိုင်ချိန်မှ စ၍ ပြန်လည်ပျောက်ကွယ်သွားရသည် ။ သားရဲအသွင် နှင့် လူ့အသွင် ကြား စိတ်ဆန္ဒရှိသလို အချိန်မရွေးကူးပြောင်းနိုင်ချိန်သည် သားရဲသက်တမ်း ၇နှစ် တွင်ဖြစ်သည် ။ အယ်လ်ဖာ အိုမယ်ဂါ အဆင့်သက်မှတ်ချက်များကလည်း သားရဲအသွင်၏ အရွယ်အစားနှင့်အတူ ထွက်ပေါ်လာလေ့ရှိသည် ။

သားရဲနတ်ဘုရားများအတွက်ကတော့ သားရဲအသွင်ကို လမ်းလျောက်တတ်ချိန်မှ စ၍ ဆန္ဒရှိသလို အသုံးပြုနိုင်သည် ။ ရှင်း နှင့် ရှေးတ်ို့ ညီအစ်ကိုတုန်းကလည်း ဒီလိုပင် စတင်ခဲ့ခြင်းဖြစ်သည် ။

" အပါး... ပါးရေ ...... " " ပါး ...... "

ကြယ်စင်လေးများ လင်းလက်လျက်ရှိသေးသော နက်ပြာရောင်ညကောင်းကင်ကို တမေ့တမောငေးကြည့်နေမိသော ရှင်း ၏ ဘောင်းဘီစကို သေးငယ်သော လက်ကလေးများက လာဆွဲသည် ။ ရှင်း ငုံ့ကြည့်ပြီး ပြုံးပြလိုက်သည် ။