𝗣𝗶𝗺𝗲𝗿𝗼 (1)
Ini istorya tang duwa, na nagkahilingan giraray sa may 7Eleven digdi sa Tiwi. An huna ko pati dae taka na mahihiling ta hale ka baga sa manila, huna ko duman ka na maistar poreber and eber sabi mo. Mala nata ka nag-uli digdi giraray?! Grabe pa man ang pasali mo. Nata ighiling mo ako na arog kaan?
Hamalan ka, huna mo malingawan ko su sabi mo sako kang mga saday pa kita. Su kang grade 1 pa sana kita, sinabihan mo ako na makanuson ako. Na dae ako nanunukray. Na ampon sana ako kang magurang ko. Sisay ka na makaram? Tugang ta ka?
Huna mo kun sisay na dae nagnunu ang sipon yak. Dae man nani na pamunas na bitbit.
Huna mo malingawan ko pa su kang dati, kinastahan mo pag warairaka su baktot kong teks sa bado. Biyo mananggad na iwinagas garu bagas. Na hamalan ka, pinurumpon kang mga kasta kong nadaog sa dururuhan. Dae na ibinalik sako. Ang nakaputan ko na san su manga napunpon ko na dae na ngani nagsampulo. Ata ipapabakal ko pa ito tangani may sintabo ako pambakal na paper dolls.
Ay deputa, su paper dolls! Su ginirisi mo! Eu dae ko ito malingawan. Kaingat-ingati ko ito tas kinastahan mo sana pag pak-iti. Ta ano ang sabi mo? Bararato sana ang mga kawatan ko? Bako arog saimo na pirme hali sa saod. Duh!
May saro pa na depota ka. Pinasa mo su Coron na binakal ni May sako kang pista sa Tiwi. Ugmahon ako kaito! Biyo kong igluluto su mga mga bunay na binunay kang mga manok ni Pay. Ang rapado mananggad sako.
Ika dae kang supog, pinaintra taka tas sabi mo may bitbit kang kalunggay. Dae kang supog ito palan sinapi mo su kalunggay mi. Ako pa lugod su nasalaan ni May ta ako daa su nagluluto. Ang rapado mananggad sako kaito, malanit ito sa lubot na hamalan ka. Magayunon ka ilublob sa baybayon bako sa tubig. Dae ka bagay sa tubig ta dimunyu kang ibingan ka.
Su mga barados bados kong kisses na isinaray sa irarom kang kubo kang tambayan mi ni Angel kinasta mo pag urulaa buda tuntungan. Dae mo aram su pambakal ko kaito inilampaso ko kang salog nani sana tawanan ako ning dos.
Urualdaw pa ito.
Muya taka na kaito ulublob naman sa dugi o kaya sa udo.
Tas kang medyo dakula na kita, sinabihan mo akong tomboy ako. Dae kang supog! Ang sabi ni Pay ako ang pinakamagayon nyang aki! Ako ang Pinaka magayon nyang aki! Tas sa sabihan mo akong tomboy. Nem bakong nabukulan ka kang pagarapo ko saimo kang mga Jolens. Ika kaya grabe ang kapatalan mo. Dae ka tatao maghiling kang kagayunan ko.
Su inagaw mo sakong isnakan na turon na paslo ka. Ika nani dae ka nanao. Minuda mo pa ako kaito, garu su nakapasiba ka. Bago nangangarog ka sana ngani kay Angel na inarugan man sako ni Angel na inarugan ko man sana kay Tep. Dae kang supog.
Igwa pa, su igulukan mo ako magbayle dati kang gangnam style. Huna mo kung isay na tatao man mag bayle, tuog-tuog man ngani. Yak. HOY DAE KA MAN TATAO MAG BAYLE. GARU KA ULOD NA WINISIKAN KI ASIN.
Hapon pa kaito, urulian. Nagbayarawas kami na Angel kaiba si Tep. Ika man na hambugon ka grabe ang supon mo sabi mo ngata taga purot sana ako kang bayawas. Kuminasta ka pag sakat man, nagpasikat nem. Bakong natuhog ka kang sanga kang patalon ka magsakat.
Pero grabe ang ulok ko kaito kang bagong tabas iyan na lusi mo. Pirme ka kaito nakasulot na palda. Dae ka nakakaintra sa Tumba Lata, Biringkay, buda sa Taragaan (Taragkan). Nem bakong eu na an.
Su kang nahulog ka sa kanal ta binukod ka kang ayam. Nag-ula-ula ako kaito ki ulok. Nalion ka kaya sa ayam mi. Biyo mo pig-asar asar. Nem binukod ka nakashoot ka sa kanal.
Buda durudustaon ka kaito, nanlalahid ka ki tungay na ayamak ka. Ang tsinelas mo pirme yaon sa kamot, dae man tiggagamit. Kaya ka kaito na bote tas ang hulangag mo garu su maaki na kanding.
Nagkakaranta kita kaito kang graduation song kang grade six, grabe man ang suru-saluso mo. Ako ang lider kaito ta ika sintunado ka. Nem, eu makua mo. Ako dawa dae tatao mag bayle, tatao magkanta. Buda ako, pede ako makanood mag bayle. Ika, dawa pakalakagaan na ang lawas mo tuog man an giraray. Bleh.
Aram mo an dae ko malingawan? Su sabi mo sako kaito bago ka magpamanila.
"Dae man na magkakagusto saimo. Dae man na may mapiday saimo ta makanos ka."
Grabe ang hibi ko kaito. Nata? Kamili an pandok ko may turutuldok? Kamili an ngipon ko, surungal? Kamili kurong ako? Ika nani, maputi ka man kuta, halangkaw, magayon an mata, magayun an dungo, kaso ang ugali mo mabataon, dae man na may madulok saimong baye.
Kaya nata ka munyan nakahiling sako? Nata arog kaan ang mata mo? Nata biyo ka na magriliwoy.
Nata ko nadangog saimo an mga tataramon na, "Karen, guminayunon ka na baga."
Ngata? Aber? Ngata baya, Jan Pol?
