𝗣𝗮𝗻𝗴 𝗱𝗶𝘀𝗶𝘀𝘆𝗲𝘁𝗲 (17)
TULONG aldaw pakatapos kaito, biglang nagduman si Angel samo. Hali s'ya sa CamSur asin nagduman sa harong, diretso sa kwarto ko.
"ANO KAREN? DAE TALAGA MALUWAS?" Yan, dae lamang na hello.
"Ang arin?"
"Ika buda yang namamatian mo."
"Wara man akong hilang." Dipensa ko.
"Igwa. Kahangagan! Kapatalan! Kamanhidan! Kalintiasan ang hilang mo! Jusko! Gabos tiggigibo mi para tabangan ka. Karen! Makanuod manghimati. Padaba mo si JanPol, eu o dae?"
"Dae na kaito. May Rachel na s'ya." Sabi ko saka naguslob sa tamong.
"PATAL TALAGA!!!!!" Maray sana wara pa si mama tas si papa, yaon sa saod. Lintiasan na ngimot ini ni Angel.
"Karen tatao ka maghapot?"
"Nata?"
"Ni minsan ba hinapot mo ako kung nata yaon si Rachel sa birthday ni JanPol?" Namewang s'ya.
Nagkiri ako.
"Oh nata igsabi mo may Rachel na si JanPol?"
"Sabi sako ni Tep!"
Nagpadagpadag si Angel paluwas na binukod ko. Nag gugumod-gumod kaya s'ya na "Lintian ka talaga Joseph, dawa nuarin dae ka naghahapot!"
Pero dae na ako nadagos pagpaluwas ta hinarang ako ni Ace, Daniel at Christian sa may pweratahan mi.
"Nata kamo yaon digdi?" Hapot ko.
"Uya kami digdi para sabihon saimo na, ang saro ming barkada na si JanPol, malain ang pagmati ta dae mo s'ya pigkakaulay-"
"Dae akong labot, hali d'yan. Si Angel-"
"Hep hep!" Sabi ni Ace na pighaharang ako.
"Ano?"
"Gusto mo na chika?" Hapot ni Daniel sako.
"Tungkol sain?"
"Tungkol kay JanPol."
"Labot ko kay JanPol. Si Angel kaipuhan ko mabukod!"
"Karen, magayon uni. Maray na bareta uni hali sa langit." Nakangirit na sabi ni Christian.
Marasapa naging Christian pangaran kang hamal na uni.
"Humali kamo d'yan." Sabi ko.
"Karen kaipuhan mo uni maaraman. Tangani matuninong ika asin ang partido mi."
"Itaram na nindo ang itataram nindo ta bubukudon ko si Angel. Magpapangkulan si Tep tas si Angel, eu???" Sabi ko.
Nag sang-ayon man su tulo.
"Aram mi na gusto mo si Louigie." Sabi ni Ace.
"Oh tapos?" Malditahon na sabi ko.
"Pero may jowa na si Louigie kaya habo mo na kay Louigie. Tapos munyan, may bago ka nang gusto...si Pol." Sabi ni Christian.
"Yuck! Bako lamang-"
"Dae mo kami mabuwaan ta nagchichika samo si Angel." Sabi ni Christian.
Ay nahamal an. Magugunutan ko an tadtaod.
"Tas, naaraman mi na hahabuan mi si Polta sabi mo may Rachel si Pol." Sabi ni Daniel.
"Totoo baga. Sinda na, lakop sa baranggay." Sabi ko.
"Yan ang dahilan kung nata dapat dae nagtutubod sa chismiss." Sabi ni Ace.
"Nata?"
"Imposiblehon ang igiisip mo." Sabi ni Christian.
"Nata sweeton sinda? Ha? Iba ang ulok? Ang hiling? Nata?"
"Chill, dae magselos."
Mararapado ko kuta si Christian kung dae sana itinago ni Ace tas ni Daniel. Naguulok pa ito. Marasapa talaga na Christian pangaran kaan.
"Nagpapasalamat sanang dakula si JanPol ta si Rachel ang nag-asikaso kay Pol sa pagenrol sa TCC. Si Rachel nag-asikaso kay JanPol sa eskwelahan lalo na kang diitang mag fail si Pol." Sabi ni Ace.
"Si Rachel mismo an nagtaram na maghagad na tabang saimo. Aram ni Rachel na makakatabang ka kay Pol. Kaso nasusupog na maray si Pol saimo. Grabe. Hinalon ni Pol su supog n'ya. Aram n'ya na dagit ka saiya. Na maldita ka. Pero dae n'ya pigekspek na dahil ito sa kabuahan na ginibo ka kang saday pa kirita." Sabi ni Daniel.
"Tama na, tol." Sabi ni Christian.
"Kaipuhan uni. Para uni sa katoninungan." Sabi ni Daniel. Hiniling giraray n'ya ako. "Kaya kung pwede, maghuron na kamo."
Aram ko panibagong strategy na naman sana uni. Nalilibong na ako. Dae ko na aram kung matubod ako o inda!
"Si Rachel?" Hapot ko giraray na sinimbag ni Ace.
"Karen. Lesbiana si Rachel. Pano man s'ya mamoot kay Pol kung may piday s'yang babaye?!"
