𝗣𝗮𝗻𝗴 𝘄𝗮𝗹𝗼 (8)
Pirang aldaw pagkatapos kang pagrarabas mi, nagpuon naman ang klase. Pirang aldaw kami dae nagtinuhan ni JanPol dahil duman sa gagadanon gayud ako kang bigbike n'ya. Pinangaranan n'ya pang Karen ang motor n'yang ito na dae ako nauugma.
"Tiya, yaon po si Karen?" Nadangog ko pa sana ang boses n'ya garu ko na s'ya barabadon kudi yaon si mama. Nadangog kong pighahanap ako, kahuron si ma sa balkon.
"Yaon sa laog naghihiling ki TV." Sabi ni mama. "Dagos na..."
Nakadangog ako ki tanog kang naglalakaw na bitis.
"Hi, Karen."
"Ano?" Sabi ko.
"Malditahon talaga sako pero kay Louigie..."
"Nata tabi???" Saekastikong paglalambing kong hapot.
"Masubli man sana po ako kang lesson plan mo."
"Ki tep ka na sana magsubli."
"Nasubli na."
"Ki Angel?"
"Eu naman."
Dae sa buot na nagbuhat ako saka kinua su lesson plan ko sa kwarto. Tinao ko ito saiya asin nagbalik sa paghiling ki TV.
Pirang simana n'ya ito bago inuli. Matatapos na ngani su September. Sa mga laog kang aldaw na ito, napasyar man ako kila Tep. Kataid man sana na tep ang harong ni JanPol. Dakula ang harong ninda asin nahiling ko na nagpupunas s'ya kang bike n'ya. May tugang manggad si Tep na ang pangaran Francis pero ang arapod, kapitan. Arog baga kaan ang tawo, ang lulo hararayuon sa pangaran.
Inapod s'yang kapitan ta kang nangganang kapitan si papa ni Tep, bagong pangaki si mama n'ya. Kaya junior ang luwas kang aki. Asin may lulo na kapitan.
Si Francis Junior aka Kapitan, second year na sa TCC. Nangyari na palan ang pinakamaogmang school activitiy, ang intrams. Pano ko naaraman? Naabutan kong naghaharaha ang duwa sa hampang kang selpon na pig kakaputan ni Francis.
"Hoy! Nag-aano kamo? Ano an?" Sabat ko sa duwa.
Kuminiling sako ang duwa.
"Ate Karen, mari ka." Paypay sako ni Francis Junior aka Kapitan. "Hilingon mo uni."
Pinahiling n'ya sako ang cellphone n'ya. May naka pose na lalaking naka pink na dress asin naglalakaw sa stage. Grabe ang paralakpakan ang tawo alagad sa tahaw kung video, biglang napalos ang lalaki asin natumba pero nakabuhat tulos, nagnguris na garu dae sana. Nagparaharaha ako.
"Isay an?"
"Si Kuya JanPol baga." Sabi n'ya.
"Siisay?!" Dae ako makapaniwala.
"Si kuya janpol! Ka team ko sa intrams. Representative mi sa shady pink." Sabi ni Francis. Inapod si Francis kang mama n'ya kaya nawalat sako ang cellphone. Padagos man kami sa paghiling ni Tep.
"Good evening everyone, my name is John Paul...in the morning. Because tonight, I am Juana Paulina De Guzman of Team YELLOW! Na naniniwala sa kasabihang, "mapipilitan kang gawin ang iyong kahinaan kapag grades na ang usapan"...I, thank you!"
Napundo ang video asin itinao ko kay Tep ang cellphone. Nag-isturyahan man lugod kaming duwa kung gurano kaugma an intrams mi kang college kami. Si Louigie kaito ang representative kang team mi. Nagparaulok kami asin ako, kiligon man kaito. Aminon ko na mas magayon palan sako si Louigie pag naging babaye pero ano ko, crush ko man giraray s'ya. Narumduman ko pa kaito, nag-iiriwalan kami dahil sa dayaan asin palaban ang gabos na team. Dae nanggad tugot na magpadaog. Makaugmahon ang year na ito jusko hahaha. Nagpuli man sana tulos ako ta mabanggi na alagad pagluwas ko ka Tep, hinarang ako ni JanPol. Tinao n'ya sako ang Lesson Plan na sinubli n'ya.
"Salamat tabi, Miss Sungit." Sabi n'ya.
"Welcome man tabi, Juana Paulina." Nag kindat pa ako asin mahihiling mo na magulat s'ya. Namulaag s'ya, literal. Nagpuon ako pagulok.
"Naghiling ka?" Hapot n'ya sako.
"Dae. Nahiling ko. Nagvideo su tugang ni Tep, ka team mo. Second year." Sabi ko.
Naghiling s'ya sa ibang direksyon dahil sa kasusupgan. Nagulok s'ya asin nagtaram. "Magayon man baga ako."
"Eu." Sabi ko.
"Gana man kami." Paghahambog n'ya.
"Congrats."
Nag offer s'ya na ihatod ako pero naghabo ako. Naglakaw na sana ako hanggang sa dae ko na s'ya mahiling. Na bored man ako sa dalan kaya nagbuklit ako kang lesson plan. Pagbuklit ko, may nawaltak na papel. Nakatiklop.
Pinarong ko ito asin parong s'ya kape. Dae akong narurumduman na may papel na parong kape sa lesson plan ko nakaipit.
Binuklit ko ito asin may nahiling na nakasurat.
Dear Padaba,
Halabaon ang buhok mo pero haliputon ang pasensya mo.
Kung ano ang ikinaamo kang pandok mo, ikinasungit mo man.
Pero dawa arog ka kaan.
Padaba takang tunay.
