𝗣𝗮𝗻𝗴 𝘀𝗶𝘆𝗮𝗺 (9)
NAKAHILING sana ako sa kisame kapot kapot ang pidaso ki papel.
Saiya ba uni hali? S'ya man sana ang nagsubli kang lesson plan ko. Dae nang iba.
Halaba ang buhok? Halaba ang buhok ko. Kurong sana ngani. Maamo ba ang pandok ko?
Bungkaras ako asin diretso hiling sa salming. Sabi ni papa, magayun gayon daa ako. Tubod man ako duman ta bako man buwaon ang ama ko. Pira naman na nagsabi na magayon ako. May nanligaw na nani sako dati. Dae sana kinaya su isog ko. Kaya nagtutubod akong magayun ako. Pero maamo ba talaga ang pandok ko?
Nata may surat? Para kiisay ining surat? Oara sakuya ba talaga ini? Saiya ba uni hali? Hala! Sabi ko na.
May gusto sako si JanPol.
Kaya s'ya mabuot sako.
Pero dae ko s'ya magugustuhan kang ugali n'ya. Huna n'ya, dae ko pa nalilingawan ang mga panglalait n'ya sako kang mga aki pa kami. Bahala s'ya dyaan.
SUMUNOD na simana, yaon na naman s'ya sa samo.
"Karen!" Gasod n'ya puon duman sa kudal mi. Nahiling n'ya kaya ako sa may balkon.
"ANO?" gasod ko man.
"Hain si mama mo?" Hapot n'ya.
"NATA?" NATA MO PIGHAHANAP? HAHAPUTON MO NA SI MA KUNG PWEDE AKONG AGUMON? AWENDA KA.
"MAKITUKAL DAANG MASITAS SI MAMA!"
Dae ko aram kung kasuarin pa pero namangnuhan ko na sana, nasa kataid ko na si mama.
Uni man si mama basta man masitas ang hururuon bungkaras man pirme. May lapot kapot pang kutsara na dakula, mahiling mo na may lana. Kung urukudan, naggigisa si mama sa kusina. Kudi nadangog su word na ✨ masitas✨ kaya nakadalagan.
"Ano daa Pol ang itukal?" Hapot ni mama.
"Magpili ka na sana daa po duman tiya. Basta daa po, itukal daa po kang chrysanthemum mong yellow." Sabi ni Pol saka nagnguris.
"Padumanon ko na sana si Karen, nagluluto kaya ako." Sabi ni mama.
"Ma..." Pagprotesta ko.
"Aw nata? Dae ka man na gibo. Dali-dali. Kuon mo su pipabuhay ko pa sanang chrysanthemum sa sarong paso kulay yellow ito. Para mananggad ito ki Tiya mo Gina. Ang itukal mo su white angel. Muya ko su buhay na ta dae ako kaito nakakabuhay. Dali!" Halos ituplang na ako ni mama ta naeexcite kang masitas n'ya.
Dae pa daw nakukuntento si mama kang masitas? Garu na gubat ang natad mi.
Nagkagaw-kagaw sana akong nagsunod ki mama. Kinua ko su igsabi n'yang masitas asin nagsunod si JanPol.
"Ako na kaan mabitbit." Sabi n'ya saka tinuro su bitbit kong masitera na may tanom na chrysanthemum.
"Ako na." Sabi n'ya.
"Aw ang mga magagayon dae pigpapara padara ki magabat." Sabi n'ya saka aagawon kuta su masitera kaso nairayo ko.
"Bako man ini magabat. Aram ko na magayon ako." Saka umininot pasiring sa inda. Malaog na kuta ako kaso bigla akong binatok kang ayam n'yang dakula pa sa tawo.
Inulukan n'ya ako. "Sabi ko saimo magdangog ka sako. Inot-inot na kaya."
Nagpaparabatok pa su ayam.
