🎭🪡نكت ليبيه🪡🎭+1

هد الواقع 😂💔🤦🏻‍♂️

في نوعين من التربية تربينا بيها وحني صغار:

النوع الأول: تنوض شاخ على روحك وتبدا فيك أمك بالعياط والضرب باش تمشي للمحل تجيب بضاعة وتمشي للمدرسة على رجليك وامك اديرلك نص بالطن وتحطهولك في شكارة خمسة قروش كان فيها فلفل احمر ولما تاكله طعمته تتلخط تحساب روحك تاكل في امبكبكه بايته، توصل امخر للمدرسة وتبدا يومك في طابور التأخير وتأكل الجلد على ايدك لين تقول ياسر، في الاستراحة تخالط وتلعب وتنقز وتلبز لان عارف بتاكل طريحة في الحوش في جميع الحالات.

النوع الثاني: ينوض الصبح بكري على صوت زقزقة العصافير ويغسل وجه بصابون دوڤ ويفطر بكامل الرواقان والاتيكيت، يبدل حوايجه ويلبس هديكا السورية المحددة وتمشيطه الشعر على جنب يلقى الباص يكلكس قدام الحوش، ياخد بوكس الماكلة اللي فيه نص تفاحة وموزة وتصت وسنتوب وطرفين كلينيكس، وياخد طرمس الامية اللي مرسوم عليه سابق ولاحق، يمشي للمدرسة ويقعمز في المقعد الاول والابلات كلهم يحيوا فيه لان بوه متسمي.

بعد السيناريوهات هادي كلها النوع الأول ينجح ترتيب الأول والنوع الثاني رغم الحياة الحلوه تلقوه ناجح بالدفان.