🎭🪡نكت ليبيه🪡🎭+1

من الخاص 😂😂

أنا أعوذ بالله من كلمة أنا نعتبر مخزن أسرار صحابي، اللي يجي منهم يحكيلي شن يصير معاهم، مش عارف علاش أنا الحق بالرغم وجهي مستفز ومش متاع واحد تحكيله حتى على صايرلك إمساك في بطنك. 😂😂😂😂

المهم هذا في 2016 كيف خشيت لكلية الاداري السياحية وكيف قلنا بسم الله لحياتي الجامعية وبنشد روحي انا والشباب ونقروا ومش موضوعنا بنات على أساس، وبعد شويه أسابيع ولد صاحبي قالي في بنت خشلتي في الخاص تهدرز عليا وقالت تقرا هني في الاداري حتى هي

المهم نسقوا وتلاقوا وقعدوا يهدرزوا ومشت أمورهم ولهني الموضوع ماشي عادي جدًا.

بعدها بشويه أيام في ولد صاحبي ثاني قالي في بنت خشتلي في الخاص وهدرزنا وطلعت تقرا هني في الإداري، وبنتلاقى معاها، انا قلت خيرهم كلهم يخشوا النم وانا سوقي راقد 😂😂😂😂 المهم اتصل بالبنت وقتله مقعمزة في الآثار قاللها اهو جايك ( الآثار مكان في كلية الإداري يعرفوه اللي يقروا غادي، نظام النافورة في الأهلية 😂😂😂) المهم قالي تعال برا معاي مشينا وكيف وصلنا غادي كانت زحمه شويه، الولد قعد يتصل بيها باش يزبطوا بعض لان اول مرة يتلاقوا.

نشبح في بنت شاده التليفون وتتكلم قعدت نقول إن شاءالله مش هي بس، تي هادي كانت تكلم في صاحبي الأول اليومين اللي فاتو،😂😂😂 قعدوا ينعتوا في بعض ويأشروا ويقيموا في الشيتات لين وصلوا في بعض.

طلعت هي نفسها اللي تكلم في الولد الأول وتوا تربط مع الثاني، وأنا الوحيد اللي نعرف الشي هذا، والولاد الزوز ما يعرفوش بعض ومش صحاب، قعدت حاير نقوللهم ولا نخليهم تجري بيهم 😂😂 ما هانش عليا الحق وجمعت الولاد الزوز قتلهم يا ولاد والله مش عارف شن بنقوللكم البنت اللي تهدرزوا عليها هي نفسها تهدرز عليكم الزوز وتجري بيكم وكنت نتمنى تجري بيكم أكثر باش نتشمت فيكم لكن ياسركم الحق😂😂😂 ناضوا الزوز شاطوها بحظر ثلاثي الأبعاد.

الموضوع مش هني واللي نبي نوصله أن البنت بعد أسبوع خشتلي انا في الخاص والله 😂😂😂😂 المشكلة أنا عارف كل شي ونعرف البنت شن نوعها 😂😂😂 كانت أقصر محادثة في حياتي نديرها، كلمة وقص وفصلت عليها الخط طول.

بعد المواضيع هادي تقول ياريتها دارت عقلها في راسها واهديت، لالا بعد اسبوع القيتها واقفه على ولد وتهدرز عليه في واحد من التراكين. 😂😂😂 البنت هادي تبي زوز دكاترة إحصاء يتابعوا معاها باش يحسبوا كم تتعرف على ولد في الاسبوع وكم ملخبطة ولد في السيمستر😂😂😂