🎭🪡نكت ليبيه🪡🎭+1

نكت ليبيه 🤣صح

أمي مرأة كبيرة في السن وما ليهاش حتى سنة خاشة على الفيس وقاعدة ما تفهمش هلبا فيه، المهم مرة قاعدة هي في الحوش ومدايره عركة مع خوي الكبير وقعدت تناقش فيه وتمخمص في التليفون من غير تركيز وفتحت بث مباشر 😂😂 وأمي ما تعرفش شن هو بث المباشر وما تعرفش تصكره، حطت التليفون على جنب والبث مفتوح ودورة العركة زادت وبدا الصوت دوشة أكثر 😂😂😂 بدوا يخشوا خالاتي وعماتي اللي تضحك واللي تعلق غير استهدي بالله يا سعاد، فكونا من المشاكل يا عيلة، طبعًا هذا كله صاير وأنا ما نندري على شي كنت قاعد في الخدمة راقد على وذاني 😂 عندي أختي مسافرة اتصلت بيا قتلي وين انت قتلها في الخدمة قاعد صكرت في وجهي طول، استغربت قلت خيرها هادي، وانا ما نندريش أن حوشنا طالع في البث ونص الليبيين يتفرجوا علينا ويتشموا فينا 😂😂😂

●▬▬▬▬๑۩ عطينه رايك ۩๑▬▬▬▬▬●

من بداية السيمستر ما مشيتش للجامعة بكل، الا في تنزيل المواد نزلت موادي وروحت ومعاش نندري عليهم شن صاير فيهم، الناس يمشوا يقروا ويحضروا ويكتبوا في واجبات وبحوث وأنا والله ما نندري عليها من وين زارقة، المهم في النص الاخير في رمضان انبني ضميري وناضت عليا النخوة وقلت والله عيب ضروري الواحد يمشي ويدير دورة عليهم ويشوف شن صاير، وحددت يوم وقلت تو نمشي فيه، نضت في هداكا اليوم في الصيام والنو وشطبت أموري وتوكلت على الله ومشيت وكيف خشيت للجامعة، نشوف فيها فاضية مافيش ولا انسان ولا سيارة، نحساب روحي في فيلم رعب والناس ماتوا ولا ترا شن صار فيهم ودورة جاني شاهد العقل أن اليوم عطلة عيد العمال وأنا غبي ما خطرتش الا اليوم هداكا ومشيت فيه،😂😂😂
المشكلة مش هني، المشكلة اليوم اللي قبله في الليل نرد على الناس في قروب الجامعة ونقوللهم راهو غدوا عطلة مافيش قراية ما يجي حد، كلهم خدوا بنصيحتي وأنا مشيت نهز في راسي. 😂😂😂😂

●▬▬▬▬๑۩ عطينه رايك ۩๑▬▬▬▬▬●

القيت ولد صاحبي حسيته كأن في حاجة يبي يقولها ومش على طبيعته قتله هدرزلي يا برو مش بيناتنا عادي، قالي صاحبتي تقرا معاي من السيمستر الأول هي نقشتها حلوه وقنينة وعاجبتني لكن البنت كان لونها قهوي زيني وزيادة أنا أبيض منها بشويه لكن توا البنت بدت بيضة تللش زي جبنة أبو الولد وحتى من غير مكياج نفس الشي، قتله كيف صار بالك في حاجة غلط ولا في غش تجاري، دورة جاني شاهد العقل وتفكرت الفترة اللي خدمت فيها في محل الاكسسوارات كانوا في بنات يجوني قبل الفطور عاديات لدرجة أنا احلى منهم (طبعًا كان قلت أنا احلى منهم معناها هما كساد لان أنا ادنى مستويات الجمال 😂😂😂) وبعد الفطور شكل ثاني بكل مش نفس الشكل واللون، تقول طالعه من مسلسل صبايا والعياذبالله 😂😂
مشيت درت شويه بحوث واستبيانات باش نعرف من وراء المخطط الماسوني هذا، اكتشفت في حاجة إسمها(  تنت ) الحاجة هادي يا معشر الشباب ردوا بالكم منها تعتبر اكبر خازوق في العالم، هادي تحول العبسي ولد شارعك لدكتورة خلود متاع السناب لين راسك يدوخ 😂😂😂
المشكلة مش هني، المشكلة لما تتزوج وتجيب صغار بيطلعوا على الاصدار القديم