🎭🪡نكت ليبيه🪡🎭+1

امي وصتني

أمي وصتني على باكو شاهي وانا مروح قلت خلي نخش لسوبر ماركت ونعيش الدور متاع تجر الكروسه والاتيكيت هذا، خديت باكو الشاهي ومشيت نخلص قالي بستة ونص حسيته غالي شويه لكن واضح الديكور مكلف ويبي يرد راس ماله بسرعة وانا لحظتها البرسيج عالي عندي ما قدرتش نرد الباكو، اعطيته عشرة ومفروض يردلي ثلاثه ونص وانا ما نحبش الحديد خديت وحده حلوه لحاسه باش نغير بيها طعمة فمي، في بالي بربع وكان طارت بخمسين قرش، الراجل ردلي زوز دينار بس، استكيت شويه وقعدت نحسب قتله بكم الحلوه هادي قالي بكل صحة وجه دينار ونص، في سري وات دا فاك واحترامًا لحرمة يوم الجمعة كنت بنديرله حركة الزوي، رجعتها وخديت فلوسي ثلاثة ونص، درت الثلاثة في جيبي والخمسين لوحتها في فمي قتله اهو تغير طعمة فمي وبدت طعمته خمسين قرش نحاس. 😂😂😂

طلعت وكلي آسف لمحل شارعنا اللي تخش بعشرة يعزمك على الغدي وتحلي معاها.