عذبتنى الحياة💔😔

{الحلقة الأولى 1}

مرحبا أنا فرح😊
مايغركمش الإسم طبعا لأنه حياتي غير عن الفرح 😔
نعرفكم عليا عمري 15 سنه
مواصفاتي :- بيضاء وعيوني سود وشعري أسود طويل يوصل لنهاية ظهري وناعم هلبه ، عندي غمازة علي خدي اليسار تبان حتى من غير مانضحك ، طولي يعتبر متوسط مش طويله ومش قصيره ، كل اللي شافني يقولي ملامحك ملامح بيبي مهما كبرتي قاعده نفس الشي ماتغيرتيش،

لحد العمر هذا حياتي كانت ماشيه في هدوء وثبات لحد مادخلت على مرحلة جديده في حياتي واللي هيا الثانويه
راح تعرفو كل شي عليا معا باقي القصه

^^^^^^^^^^^^^^^^^^^^^^^^^^^^^^^
((((عائلة فرح))))
الأب: علي عمره 62 سنة كان يشتغل مدير مدرسة إعدادية كان حنين هلبا على صغاره وبالأخص فرح لأنها كانت أصغر واحده وهاديه وشاطره ، كان يحترم في صغاره هلبه ، ومايحب يدخل في خصوصياتهم، عقليته متفتحه شويه ومثقف هلبا
الأم: سعده عمرها 58 سنة حنينه هلبا على صغارها بس عقليتها شوية صعبه ، للأسف مش متعلمه
الأخ الأكبر: صالح عمره 38 سنة يشتغل في الأمن ملتزم وعقليته متشدده هلبا متزوج زينب من سنتين عندهم بنت عمرها سنة ((شدى))
الأخت الكبري: فاطمه عمرها 37 سنة مدرسة ومتزوجة يوسف مدرس معاها في المدرسه ،عندها 3 ولاد(( عمر 7 سنين))و(( عماد5 سنين)) و(( علاء 4 سنين))
الأخت الثانيه: نورا عمرها 35 سنة متزوجه ناصر، ولد مدرس صاحب بابا، يشتغل في الشرطة ،عندها ولد(( نبيل 5 سنين)) وبنت ((غادة 3 سنين))
الأخ الثاني: عامر عمره 32 سنة يشتغل موظف في شركة، ماشي على حاله ومش مهتم إلا بمظهره بس متزوج سناء أخت صاحبه عصام وحتي هيا تشتغل في شركة نفط ليهم سنتين متزوجين وماعندهمش صغار
الأخت الثالثه: نعمه عمرها 26 سنة ليها 3 سنين متخرجه وقاعده في الحوش
الأخ الثالث: جلال عمره 24 سنة يشتغل في الصحراء واعر بكل معنى الكلمة ومن جماعة قال الله وقال الرسول(( عليه أفضل الصلاة والسلام))
الأخ الرابع: سالم عمره22 سنة هادي شويه وهو أقرب واحد لخواته يأخذ ويعطي ويبصر معاهم وحنين عليهم، عكس خوته الثانيين ، يخدم معا صاحبه فى مصنع كيكه

^^^^^^^^^^^^^^^^^^^^^^^^^^^^^^
طبعا سجلت انا وصديقتي في نفس الثانويه ونفس التخصص ((إقتصاد))
سحر هوا إسم صديقتي او اللي إنفرضت عليا إنها تكون صديقتي بحكم إنها بنت جيرانه ولأنها من أول سنة في الدراسة وهيا تتلصق عليا،
شخصيتها مختلفه عليا كل الإختلاف الكل يقولولي كيف تقبلي إنها تكون صديقتك وهيا مصلحجيه ((مشكله صح))
بس المشكله الأكبر إني كنت عارفه إنها مصاحبتني على خاطر تستفيد مني في الإمتحانات وحل الواجبات فقط😔 ومعا هذا ماقطعتش صحبتي معاها
بسلامتي طبعا كنت شطوره هلبا لين إمفسده😅
مانحبش المقدمات هلبا خلينا نبدو على بركة الله

^^^^^^^^^^^^^^^^^^^^^^^^^^^^^^^
((أول يوم في الثانوية))
أنا: نضت س 7 نومى كان متقلق ومارتحتش بكل بصراحه خايفه ومتوتره دخلت الحمام (أكرمكم الله) درت روتيني وطلعت صليت ركعتين لبست ملابسي وخذيت شنطتي وطلعت من الدار لقيت ماما وبابا مقعمزين في وسط الحوش يفطرو
أنا: صباح الخير ، كيف حالكم اليوم؟
بابا: صباح النور
ماما: صباح الخير ، الحمدلله يابنيتي هي تعالي أفطري معانا
أنا: لا لا صحتين عارفتيني مانحبش نفطر الصبح بكري ،وبعدين بطني توجع فيا وخايفه مانبي شي
بابا: ديمه نفس الحاله تقولي أول مره تقري خيرك يابنتي إرخي روحك وخليها على ربي
ماما: معليشي غير أول يوم بس وبعدين توا تتعودي
أنا: ان شاءالله خير ( حاسه روحي مش مرتاحه كأنه ماشيه بنتعذب ، طبعا قلت هكي في خاطري)
أنا: شني بابا وقت راهو مازال بنخطمو على سحر
بابا: هي أني واتي شوفي صاحبتك
أنا: باهي ، خذيت تلفون ماما وقعدت إنرن علاها وهيا ماتردش، واااااااك هذي من أولها هكي عارفتها بتعبني معاها خلي إنرن على تلفون أمها ، ورنيت شويه وردت ،
أنا: صباح الخير خالتي سالمه كيف حالك؟
خالتي سالمه: صباح النور الحمد لله يابنيتي
أنا: خالتي ممكن تنوضي سحر إنرن علاها ماتردش معاش في وقت تأخرنا
خالتي سالمه: هيييييييي واللهي نسيتها بكل هالفرخه هي شويه وتلقوها واتيه
أنا: إحني كيف طالعين من الحوش توا، بسرعه باللهي عليك
خالتي سالمه: باهي باهي وسكرت عليا
أنا: أف ياشينك هم على الصبح
بابا: هيا شن صار فيك
أنا: أهو جايه ، عطيت لماما تليفونها وطلعت لبست السبيدرو وإني طالعه لقيت خوتي نازلين من فوق هما وإمساوينهم ماشيين للعمل صبحت عليهم وطلعت جري