عذبتنى الحياة💔😔

{ الحلقة الثالثة عشر 13 والأخيرة}

فاتت سنة ثانيه بأحزانها وبأفرحها، وتغيرت فيها هلبا حاجات، كل واحد منا حاول يعيش ويتعايش ويتأقلم مع الحياة سواء كانت اللي هو إختارها :- زي عمران اللي نادم على سنين عمره اللي راحو على الفاضي، وبعد ماتزوج عرف أنه كان ظالم روحه وحرم نفسه من هلبه حاجات، وخصوصا فرحة أنك تشيل قطعه منك بين إيديك ( ولده ) بس هذا كان إختياره
^^^^^^^^^^^^^^^^^^^^^^^^^^^^^^^
وزي أمال اللي تحاول تقنع روحها أنها ماليهاش ذنب في كسرة قلب جلال اللي الباين كسرته واعره، وبالذات لما تشوف خالتها اللي تبكي ومشتاقه لشوفته وليه قريب السنه ونص ماروحش،
بس هيا أختارت الحياة اللي تبيها
^^^^^^^^^^^^^^^^^^^^^^^^^^^^^^
وزي جلال اللي عرف أنه الحب اللي زرعه ربي في قلبه لأمال هو كان إشارة تنبيه ليه باش يرجع على الغلط اللي كان يدير فيه، ويعرف أنه كسرة القلب واعره وحس بكل واحده عشمها من قبل وكسر قلبها ولعب عليها، وكأنه قاعد يعاقب في روحه بعزلته عن الناس وإنشغاله بالعمل،
وهذا كله كان بإختياره
^^^^^^^^^^^^^^^^^^^^^^^^^^^^^^
وزي عفاف اللي تشوف في بوها كل يوم عمره في الناقص، وتفكر لو صار فيه شي كيف راح تعيش من بعده، ومني اللي راح يتحملها، لو كانت رضت بواحد من العرسان اللي جوها راهي عندها عيلة زي غيرها وعندها سند يحميها من غدر الأيام،
بس هذا كان إختيارها
^^^^^^^^^^^^^^^^^^^^^^^^^^^^^^
وزي أمل اللي مانهزمتش وماسلمتش في حبها وخدت حبيبها عبدو وحاسه روحها أسعد واحده، وصابره معاه على الحلوه والمره، وهذا كان إختيارها
^^^^^^^^^^^^^^^^^^^^^^^^^^^^^^
وزي سالم اللي ندم على السنين اللي قضاهم في الحبس، نتيجة طيشه وتهوره وحس روحه ظلم روحه هلبا وخلا قلبه يتحكم فيه ويجره لطريق الهلاك، بس كان درس مستحيل ينساه، وتعلم أنه يرضي بنصيبه اللي كاتبهوله ربه، وهذا كان إختياره
^^^^^^^^^^^^^^^^^^^^^^^^^^^^^^
والبعض الأخر يحاول يرضي بالحياة اللي إنفرضت عليه، وماكنتش من إختياره
زي محمد اللي تزوج وطلق مرتين نتيجة لعدم التفاهم بينهم، ونادم أنه ضيع نعمه من إيديه، سمع كلام خواته وفي الأخير كلهم تزوجو وعايشين حياتهم، وهو اللي خسر كل شي،
^^^^^^^^^^^^^^^^^^^^^^^^^^^^^^
وزي نسرين اللي حاولت ترضي وتتأقلم مع نور الدين وصبرت عليه وتحملت على خاطر بنياتها، بس في الأخير سلبوهم منها نتيجة غلط أمها اللي هيا ماليهاش ذنب فيه
^^^^^^^^^^^^^^^^^^^^^^^^^^^^^^
وزي عامر اللي يحاول ينسي اللي صار ويتأقلم مع سناء وولادها اللي عبو عليه حياته الفارغه، وبالأخص لما حاول يعالج وإكتشف أنه العيب منه هو مش من سناء، وقتها عرف أنه كل شي قدر ونصيب، وفعلا وعسى أن تكرهوا شيئا وهو خير لكم، لولا السحر اللي دارهولهم وفرقوهم عن بعض وزواج سناء وجابت ولدين ووفاة زوجها، ورجعت لعامر مكتوب أنهم يربو الصغار معا بعض وربي ماينسي حد وعوض عامر بصغار سناء
^^^^^^^^^^^^^^^^^^^^^^^^^^^^^^
وزي ندى اللي فقدت بوها وأمها ودراستها وكل حياتها السابقه بهمومها ومشاكلها بس كانت فيها نوع من الراحه عكس حياتها توا وهيا مش عارفه كيف راح تواجه الناس والمجتمع بعد القصه اللي صارت معاهم
^^^^^^^^^^^^^^^^^^^^^^^^^^^^^^
وزي علاء اللي من كثر ماصديته قرر ينساني ويشوف حياته معا غيري، وقال لأمه تخطبله على ذوقها، ويحاول بكل جهده أنه يتأقلم مع البنت اللي ماأختارهاش قلبه، بس كل شي نصيب
^^^^^^^^^^^^^^^^^^^^^^^^^^^^^^
وزي وليد اللي إنجبر أنه يتحمل ويعيش حياة فرضوها عليه غيره، وتحمل كسرة قلبه وضحي بكل شي على خاطر خواته