عذبتنى الحياة💔😔

{الحلقة الثالثة 3}

وليد تعبت ياربي همومي كثرت وحاس الدنيا كلها ضدي، من وين بنلقاها، من فرحة روحي اللي مكتئبة وماتبيش تحكي شن صار معاها هذاك اليوم، وشن دارلها الواطي هذاك، دماغي بيتفجر من كثر التفكير في الموضوع لو يطلع مسها بس ندفنه دفن كان غير تتكلم وتريحني،
وإلا من الحكي اللي قالاته نسرين!!!!

تعالو نردو قبل إسبوع ونشوفو شن صار معا وليد لما مشي بيجيب نسرين

وليد وصلت قدام حوش خالي الناجي ورنيت علي نسرين باش تنزلي، مانبيش نخش ونشوف البلوة هذيكا قدمي، أستغفر الله كرهوني في البنت من غير مادير حاجه.
وليد: هيا ردي يانسرين، شن شكلها ماتت هذي خمسة مرات وماتردش، خلي ننزل وخلاص
وليد طقيت علي الباب ونقول في خاطري الحمدلله شكله خالي ونور الدين مهناش سياراتهم مش برا، وشوية وإنفتح الباب،
فتحية: أهلين ياوليد تفضل أنستنا
وليد: كيف حالك يامرت خالي
فتحية: الحمدلله كيف حال أمك وبوك وخوتك
وليد: الحمدلله كويسين، كيف حال خالي ونورالدين
فتحية: بخير ونعمه، هي تفضل شن بتقعد واقف علي الباب
وليد: واللهي إلا مستعجل، ناديلي نسرين كان مافيهاش تعب
فتحية: حاضر توا إناديها،لكن واللهي تخش تأخذ طويسة قهوة، جاي المسافة هذي كلها وتولي علي قفاك والله مايصير
وليد: باهي باهي
خشيت وقعمزت في الصالة اللي كانت إطل علي الحوش كله والدروج اللي يرقو لشقة نسرين

فتحية: أمل ياأمل تعالي فيسع ديري قهوة
أمل: مني جي
فتحية: وليد ولد عمتك تركية، ديريله قهوة فيسع نمشي إنادي المصيبه أخته
أمل: اااف هالبلوه هذا غير شن جابه، هذي فرصتك ياأمل تكلميه توا

وليد زعما شن صاير لنسرين، مرت خالي عادية شكلها ماتندريش ولاكيف، ولمحت البلوة هذيكا فاتت من قدامي ولاعبرتني، أني مش ميت علاها بس علي الأقل تقول السلام عليكم
شوية وخشت جايبه سفرة القهوة رفعت رأسي نحسابها نسرين بس بسرعة نزلت رأسي لما شفتها هيا ومن غير وشاح وفي بيجامة الحوش أستغفرالله هذي خيرها
أمل: كيف حالك ياوليد، وحطت سفرة القهوة على الطاولة
وليد: الحمدلله، وقاعد حاط رأسي لوطه نستني فاها تطلع، بس صدمتني لما قعمزت علي الصالون اللي قدامي
أمل: تفضل القهوة ياوليد
وليد رفعت عيوني للسفرة وتفاجأت شن هذا خيرها السفرة هكي مش مرتبة ولا القهوة اللي واضحة مزرطة ومن غير وجه : لا شكرا مانشربش فاها القهوة
أمل: باهي على راحتك، أسمعني نبي نكلمك في موضوع ضروري قبل مايجي حد ومانبيش حد يسمع اللي بنقولهولك
وليد إنصدمت من وقاحتها، معقولة هذي شن تبي مني،
أمل لما شافت أمها ونسرين نازلين من الدروج ناضت بسرعة:أسمعني ياوليد خديت رقمك من تليفون نسرين نكلمك الليلة رد عليا وطلعت تجري
وليد شني هالوقحة هذي كيف يبوني نعيش معاها عمر؟ طول جت في بالي فرح وإبتسمت الفرق بينهم بعد السمي علي الأرض، على خشت نسرين ومرت خالي
نسرين: أهلين وليد كيف حالك
وليد: الحمدلله(نسرين كان شكلها مش طبيعي وجهها احمر وعيونها منفخات)
فتحية: خيرك ياوليد ماشربتش قهوتك ولا ماعجباتكش قهوة مرتك وضحكت
نسرين شبحتلها بهزوة: غير يولد ويسموه هوا، وبعدين وليد مايشربش في القهوة
فتحية: هيييي إنوض نجيبلك طاسة عصير
وليد حتي هيا أوقح من بنتها بيلصقوها فيا بالسيف: لا صحيتي والله مانبي، ماعدلتش عليا ومشت تجري(العيلة كلها مطفوشة)
نسرين: ياوليد ان شاءالله غير ماقلتش قدامها إنك بترفعني مانبيش حد يعرف لين نمشي
وليد: لا ماقلتش بس مانقدرش نرفعك من غير علم راجلك إنتي عارفتيه خرا حشاك، واللهي يديرلنا مشكلة بعدين بوك يلزني
نسرين: باللهي ياوليد ماتقوللهم أني تعبت نقعد شوية ثانية في الحوش هذا لما ننتحر
وليد لما قالت ننتحر شفت فرح قدامي طول إذكرت شن صار فيا وقتها وخوفي أني نفقدها، شفت لنسرين بعصبية: سكري فمك شني اللي تقولي فيه تحسابيها ساهلة
نسرين قعدت تبكي: تعبت ياوليد خلاص معاش عندي طاقة نتحمل، أسمع تعالا نرقو فوق زعميتك بتشوف البنات
وليد وجعتني نسرين الله أعلم شن صاير معاها أول مره نشوفها ضعيفة هكي، كانت في عيني نسرين القوية اللي مايهزها شي، القوة هذيكا كلها كانت تصنع!!!! باهي هيا نوضي
فتحية وهيا طالعة من المطبخ وفي يدها طاسة عصير: خيركم وين ماشيين
نسرين: وليد يبي يشوف البنات
فتحية: باهي بري نزليهم وقعمزو معانا لوطة
نسرين بعصبية:وليد يبي الحمام ويستريح في حوش أخته أحسن
وليد إبتسمت حشمتني نسرين ياعليك تزريطة، بس تكلمت لما حسيتها ممكن تولع بين مرت خالي ونسرين: أني مستعجل يامرت خالي بنشوف البنات بسرعة وبنطلع، مرة ثانية إنجي بإذن الله، وشحيت نسرين اللي قاعدة مفنصه في مرت خالي وركبنا طول