عذبتنى الحياة💔😔

{الحلقة السادسة 6}

بسرعة ماأنتشر الخبر وألتمو الأهل والجيران، وتعالت أصوات العياط، والحزن خيم على كل الحاضرين
كنت في حالة اللاواعي مش مستوعبه كل اللي صار ثواني قلبت كل شي، خشو خالاتي والبنات يبكو ويعيطو، خشتهم علينا في هالوقت رجعتلنا ولو شوي من طاقتنا اللي إنهارت فعلا الأهل عزوه مهما كان اللي صاير بينكم بس في وقت الشدة تلقاهم أول من يوقفو معاك،
أمال: فرح ردي عليا ورأس وخيتي تكلمي قولي أي شي
فدوى: حرام عليك ماديريش في روحك هكي لازم تقوى روحك حتي على خاطر أمك شوفي حالتها مسكينه
فرح فيه حاجه كاتمه على لساني ومانعاته من الكلام، كنت في حالة مايعلم بيها إلا ربي حاسه بالذنب لأني سكتت لو كان تكلمت من الأول راهو منعوه وماخلوشي يمشي، مستحيل نسامح روحي

خالي مفتاح: كيف حالك ياعلي ربي يجيركم في مصيبتكم
علي: بارك فيك يامفتاح
خالي مفتاح: أمتي وصلكم الخبر
علي: واللهي بعد العصر واحد من صحابه كلم صالح
خالي مفتاح: كيف صار هكي معناها مش أكيده الخبر
علي: والله ماني عارف يامفتاح
خالي مفتاح: نوض ياعامر كلم العويله يسكتو كيف إديرو هكي وأنتم مش متأكدين، مادامه مافيش جثة معناها مازال فيه أمل أنه يكون عايش تفائلوا خير
علي وكأنه خدي جرعة أمل: زعما صح!! أحني متأكدناش بس كيف بنتأكدو مني بنسألو
خالي عمران: ولايهمك ياعلي توا كل واحد يدير إتصالاته ويشوف معارفه وأصحابه لو كان يعرفو حد عنده حتي معلومه تفيدنا

دخل عامر وقعد ينادي
عامر: فاطمه يافاطمه يانورا
خالتي عفاف: ها ياعامر شني تبي البنات الداخل معا أمك ونعمه
عامر: ياخالتي قوليلهم مازال فيه أمل يكون عايش مافيش خبر أكيد أنه ميت
خالتي عفاف بفرحه: بجد ان شاءالله يارب ان شاءالله، وخشت تجري وهيا فرحانه والكل مستغرب فيها
خالتي عفاف بفرحه: إضبطت أمي ياوخيتي ربي مايوريك حرقة القلب على كبيدتك، يابنات قالوا مازال فيه أمل أنه يكون عايش تفائلوا خير ان شاءالله يطلع عايش ان شاءالله

كان هالكلام جرعة أمل للكل رد فينا الروح بس ضلت الكأبه مخيمه على الموجودين

**جرعة أمل ولو بسيطه قادره علي أحياء القلوب الميته ولو لدقيقه **

^^^^^^^^^^^^^^^^^^^^^^^^^^^^

ندى: غريبه ياوليد قاعد مش قلت بتطلع للإستراحه معا صحابك
وليد: واللهي ماعندي جو حاس روحي مضايق وجوي معكر
ندى بقلق: خيرك ياوليد مريض تحس في حاجه توجع فيك
وليد أبتسم: لاياماما أنا كويس بس محتاج جرعة حنان هههههه
ندى ضرباته على كتفه: يابارد خزي خوفتني
وليد: لابجد جوي ملخبط بروحي مش عارف خيرني، كلماتك فرح اليوم؟
ندى: أيواه هذا اللي تبي توصله أنت، لا ماكلمتنيش
وليد: باهي خيرك إضايقتي إنتي نشم في ريحة غيره تجوب الأرجاء
ندى: بطل بلا برادتك، مش ملاحظ أنه كلامك ديمه على فرح، معاش حكينا زي قبل
وليد بإستغراب: معقوله تغاري من فرح ياكاتي، أنتي أكثر واحده عارفه فرح شني بالنسبه ليا وبعدين كل واحده فيكم وليها مكانتها في قلبي شني التفكير المسوس هذا، وبعدين هذي صاحبتك ولانسيتي
ندى: لامانسيتش، بس كنت نجرب فيك، والله تحبها أكثر مني نقلبها عليك راهو ماتنساش إنها صاحبتي
وليد: هههههههه باهي بركاتك ياأختي كل شي إلا هذا، أتصلي باها شوفاها
ندى: باهي توا نتصل ان شاءالله ماتكونش راقده بس س10 توا ، ورنيت ثلاثة مرات لين فصل مافيش رد
وليد بقلق: زعما خيرها ماتردش معقوله راقده من توا