عذبتنى الحياة💔😔

{الحلقة الخامسة 5 }

طلع سالم من غير مايحس بيه حد وكأن على بالهم أنه رجع لصاحبه اللي كان قاعد عنده
ومر يوم وأني بالي مشغول ومش مرتاحه وخايفه بنموت على سالم اللي مش عارفه عليه شي
يوم الخميس
طلعت من المطبخ لما سمعت بابا ينادي
علي: فرح يافرح تعالي بسرعه
فرح: نعم يابابا
علي بفرحه: مشيت جبتلك النتيجه، الف مبروك نجحتي والأولى على المدرسه ماشاء الله
فرح من كثر مابالي مشغول نسيتها بكل النتيجه: أها باهي كويس، يبارك فيك يابابا
نعمه: خيركم شني فيه
علي: أختك نجحت وجابت الأولي على المدرسه
نعمه بفرحه: بجد ماشاء الله ألف مبروك يافرح، خيرك أنتي نفس العاده كل نتيجه مطرمه وتقولي جايبه عشرة كعكات
فرح ماكنتش تهمني النتيجه بكل عارفه روحي بننجح: عادي يعني شني الجديد نفس كل سنه
علي طلع باكو مغلف من الكيسه: ماتبيش تشوفي هديتك!
فرح قربت من بابا وبست على رأسه: شكرا يابابا، أكيده شكلاطه زي كل مره، توا نفتحها بعدين خلي إنوض نكمل المطبخ
علي: لا توا قدامي أفتحيها هيا
فرح إستغربت من إلحاح بابا وقعمزت نفتح في الغلاف وجت حتي ماما قعمزت بحدانا، تفاجأت لما شفت الباكو: بابا أكيده اللي غلفلك الهديه تلخبط في الباكوات شوف شن حاط ومديت الباكو لي بابا
علي: ههههههه لا مش متلخبط يافرح هدي هديتك شدي أفتحيه
فرح مش مصدقه وقعدت زي المسبوهه، نشوف لبابا وبعده لماما وبعده لنعمه: بجد هذا ليا ولاتبصرو
علي: بجد يافرح توا أنتي كبرتي ولا حاجه ضروريه وخصوصا الوقت هذا اللي أصغر منك عندهم، وخودي هذي ركباها فيه وهاك هذا عبيه
فرح حضنت بابا بسرعه ونزلو دموعي بجد ماكنتش متوقعه أنه ممكن يجيبلي تليفون هوا صح حاجه عاديه ومش مستاهله هالدراما كلها بس كانت حاجه شبه مستحيله عندي وخصوصا في عمري هذا، حتي خواتي داروه بعد ماتزوجو، ونعمه بعد ماأنخطبت، نضت طول نجري للدار وقعدت نفتح فيه ونركب في الشفره وقاعده مش مصدقه، عبيت الكرت وقلت أول شي لازم نكلم ندى، أنفتح الباب وخشت نعمه
نعمه: ههههههه خيرك زي المفجوعه اللطف راك تأكليه
فرح: مش مصدقه بصراحه لا ولمس وفيه كاميرا، هلبا هكي ياناري بابا أشبح كم دفع حقه
نعمه: معليشي مش خساره فيك، قتلك بابا قالك مش لازم توريه قدام خوتك وخصوصي جلال فكينا منه هالنفسيه
فرح: أصلا مش راح نطلعه بكل فكيني منهم كلهم
نعمه شافت تليفونها بخيبة أمل ورجعاته تحت المخده
فرح: شني اللي صاير يانعمه وين محمد الوقت هذا كله قداش ليا ماسمعتكش تكلمي فيه
نعمه تنهدت: اااااه خلاها في القلب وخلاص، خلي إنوض نكمل المطبخ أنتي عاد توا شن مازال ينوضك
فرح: ههههههه سلم وخيتي
طلعت نعمه وإتصلت بندى
ندى كيف نايضه من النوم: أيوا مني
فرح: هذا أنا فرح ياندى، عطيك السلامه قاعده راقده قصدك
ندى شافت للتليفون ورجعاته: أنتي خيرك كل مره طالعتيلي برقم لمني هذا
فرح: تي ياسرك نوم شكلك حتي النتيجه ماتندري علاها طلعت، هذا رقمي ياحنه
ندى قفزت بسرعه: بجد طلعت النتيجه خلي نكلم وليد يمشي يشوفهالي، حقا هذا رقمك؟
فرح: أي رقمي، خلاص إمالا كلميني طمنيني لما تعرفي نتيجتك
ندى نزلت بسرعه تجري زي البرق لوليد اللي مقعمز في الصاله يبربش في تليفونه: خليك شويه يافرح
وليد قمت عيوني لندى بخوف: خيرها فرح شني فيها
ندى: لاحول ولاقوة الابالله وأنت زي المفجوع مافيش كان فرح في هالدنيا شوره، مافيها شي بس النتيجه طلعت نبيك تمشي تشوفهالي
وليد: إنفجعت من منظرك تي غير لمي شفاشيفك وأغسلي وجهك، باللهي هذا وجه واحده بتنجح
فرح كنت نسمع فيهم ونضحك
ندى: تضحكي باهي يافرح، وأنتي شني نتيجتك يافالحه
فرح: هههههه الأولى على المدرسه وبكل فخر
ندى قعمزت من الصدمه: كذبه قولي والله تحكي جد
وليد وقف بفزع: خيرها شن فيه أحكي
فرح: هههههه والله خيرك مش مصدقه
ندى: حييييي على ياحشمتي ،أقلبي وجهك كان نسقط لاعاد صاحبتي ولانعرفك
فرح هههههههه هالبلوه سكرت عليا
وليد: خيركم شن فيه، شني الكلام اللي قلتيه هذا
ندى: ههههههههه فرح جابت الأولي على المدرسه، كان سقطت زي كل مره نتحشم نقعد صاحبتها
وليد: خزي على وجهك رعشتيني نحسابه أشبح شن فيه