عذبتنى الحياة💔😔

{ الحلقة الثانية 2}

فرح كنت سرحانه وماإنتبهتش إنه وصلنا للحوش، لحد ماتكلم صاحب الباص
سعد: فرح شكله عجباتك التقعميزه وماتبيش تنزلي لحوشكم ولاكيف
فرح: هااااااا، أسفه سامحني باللهي عليك، مانتبهتش إنه وصلنا
سعد: لا عادي ولايهمك مادوري شي

فرح نزلت وإنتبهت للسيارة اللي واقفه قدام الباب
لا ياااااااااربي مالقاش أمتي يروح إلا اليوم😵
فرح: ياربي توا بيشوفني بيعرف إني باكيه طول شني بيسلمني من لسانه
رنيت الجرس وندعي ان شاءالله مايفتحش هوا يارب،فتحلي عامر وخشيت طول نجري للحمام الخارجي،نبي نغسل وجهي قبل مايشوفني حد
غسلت وجهي، وخشيت من باب المطبخ اللي في الجنان،لقيت نعمه إتوتي في الغذي،ومنسجمه وتغني
فرح: ياعيني الحمامه زاهية اليوم
نعمه: بسم الله أمتي جيتي
فرح: توا كيف خشيت،وينه هالمعقد شفت سيارته برا؟
نعمه: خش إرقد قال نوضوني على الغذي،إنتي خيره عيونك هكي؟
فرح: تنهدت براحه الحمدلله اللي راقد قصدك واضح عليا
نعمه: أي واضح،أسمعي بنقولك على حاجه حلوه صارت معاي اليوم (( الباين إنها فرحانه هلبا واضح في عيونها))
فرح: مادامك فرحانه معناها محمد في الموضوع
نعمه: أسكتي ياحيوانه يسمعك حد،توا بعدين نهدرزو بروحنا
فرح: باهي ورأس وخيتي أني رأسي يوجع فيا بنخش إنبدل وبنرقد شويه ماتنوضينيش علي الغذي،وخليهم الماعين توا إنوض نغسلهم
نعمه: خلاص بري إرتاحي توا نغسلهم أني،بس مش راح تهربي مني راهو،بتقوليلي شن صار معاك وخيره عيونك هكي
فرح: صحيتي سلم وخيتي،باهي بعدين نحكو (( نعمه أقرب وحده ليا وحنينه عليا واجد،مرات نحس إنها واخذه دور ماما في حياتي))

خشيت بدلت وصليت وغميت رأسي بالورغان مانبيش إنفكر في أي شي صار معاي اليوم حاسه روحي ميته من الداخل

*********************************

وليد من هذاك اليوم تجنبت ندى ومعاش حكيت معاها،حاس روحي قاعد على نار،نبي نعرف شن صار معاهم هذاك اليوم وشن قصة أحمد هذا،بس خايف روحي نتهور وندير حاجه ونندم علاها
اليوم بوي وأمي مروحين من دبي.
طلعت من داري وتفاجأت بالزحمه والدوشه اللي صايره في الحوش،شني هذا!
زعمااا مش متلخبط في الحوش؟وقفت في نص الدروج وقعدت إنادى
وليد: ندى ياندى
جتني نسرين تجري
نسرين: وخيرنا إحني ماننفعوش ولا كيف تبي ندى بس
وليد: باهي اللي إذكرتي إنه عندك عيلة،معقولة ثلاثة شهور مانشوفوكش،وأحني في نفس البلاد
نسرين تنهدت: الله غالب نور الدين مايفضاش وإنت عارفه مايحبش أرفع وجيب
وليد: ومن جابك؟
نسرين: جابني حافظ، بابا مكلمه ومكلم حتي العيلة كلها،عمامي وعماتي
وليد: بصدمة تحكي جد ان شاءالله خير
نسرين: مافي شي بس قال بابا إنه لينا فتره ماجتمعناش مع بعض بس
وليد: باهي باهي قتلك نبيك في موضوع ضروري أمتي بتروحي إنتي
نسرين: قاعدة إسبوع
وليد: باهي كويس، أني طالع أبعتيلي''هيا وهنادي''
((بنات نسرين)) إستاحشتهم الكلبات
نسرين: باهي حاضر
روحو بوي وأمي وتغذينا،والعشية إجتمعنا كلنا في المزرعة برا،لأنه بوي قال عنده موضوع مهم يبي يحكيه