تالين الشيخ جبل

part 4

اسمع اصوات يمي والضوه كلش قوي بعيني گوة فتحتهن
حسيت اكو احد يمي ميزته هاي امي...
/ها يمه الحمدلله على سلامتچ خوفتيني عليچ حبيبه
مابيه حيل احچي گوة گلت
/اني وين
/طحتي وشالچ عباس جابچ للمستشفى هو وابوچ
واني وجبل لحگناكم ماگدرت اعوفچ وحيدچ هين
گلت بوجع
/راسيييي
/بيه ولا بيچ حبيبتي.......
فات أبويه ووراه الدكتور
الدكتور/الحمدلله على السلامه
تالين بتعب/الله يسلمك
اندار على أبويه وگال
الدكتور/شنو متوكلوها؟!! دمها مصفر وعدها هبوط حاد بالضغط والسكر!!
/هي متاكل صارلها فتره
اندار عليه وگال
الدكتور/ميصير ياعيني جسمچ محتاج تغذيه.
ابويه حچه
/شگد ونكدر نطلعها
/يخلص المغذي وتطلعون
طلع الدكتور وفاتو عباس وجبل
بس مدري ليش حسيت اكو نضرات خوف بعيون جبل
باوعلي وابتسم گال
/الحمدلله على سلامتچ بويه خوفتيني.....خوفتينه عليچ.
ابتسمت وگلت
/الله يسلمك....
خلص المغذي وسندتني امي وطلعنه من المستشفى
ركبت السيارة ويه عباس ورجعنه للبيت
رادن البنات يسندني ماگدرن
امي گالت لعباس يجي يشيلني
عباس/نشيلها ليش منشيلها تدللي يخيتي
ابتسم وابتسمت وياه
شالني وصعدني فوگ....
حطيت راسي على المخده ودمعتي نزلت
فكرت بحياتي الي انگلبت بين ليلة وضحاها ونزلت دمعه ثانيه شهد شافتني ابچي طلعت گالت
/اذا تريدين اطلع حتى تأخذين راحتچ
هزيتلها راسي وطلعت راحت تنام يم خواتها
گعدت وحطيت راسي بين رجليه وابچي بصوت عالي
فجأة اندگ الباب
تالين/منو
/اني عادي افوت
تالين/يي تفضل
فات وطبگ الباب
جبل/شلون صرتي
/تعبانه
گلتها وگمت اشهگ بالبچي
دحگ عليه وتقرب مني وگال
/لتبچين بويه گولي شني التردينه واني اسويلچياه
دحگت عليه وگلت بقهر
/اريد حياتي اريد دراستي اريد اهلي الي حرمتوني منهم
/انطيني مجال بس هالاسبوع واني اوديچ لأهلچ بس لتبچين يبويه
ضحكت وگتله
/وجدو؟
ابتسم وگال
/معليچ بويه اني اقنعه وهسه يلا امسحي دميعاتچ
ابتسمت على ابتسامته وگلت
/يلا گوم اطلع خاف أحد يجي ويشوفك هنا
/ماشي بويه يلا نامي وارتاحي تصبحين على خير
ابتسمت وگلت
/وانت بخير
طلع واني احس دگات گلبي بدت تسرع ابتسمت واني اتذكر كلمة بويه الي احبها لمن يگولها الي...
بهاي الليله نسيت اهلي ونسيت دراستي وفكرت بس بجبل......
گعدت ثاني يوم متأخره وچان يوم خميس وهم كل خميس تتجمع كل العشيره ببيت جدو ضاري علمود متنگطع صلت الرحم بينهم...
نزلت جوة شفت عمه سعاد بوجهي
تالين/صباح الخير
سعاد/يا صباح هذا عيني الدنيا ضهر
عفتها ومشيت مالي خلگها
رحت للصاله لگيتهم كلهم متجمعين بيها
سلمت وگعدت باوعلي جبل وگال
/بويه متصبيلي چاي
هزيتله راسي بأي وتوني اريد اگوم گمزت فرح
/انتي مو مريضه هسه اني اصبله
/لا اني اصبله
مشيت اريد اروح للمطبخ چان تجي وتدفعني خفيف
گالت
/اني رايحه أصب لنفسي واصبله بطريقي گعدي انتي باوعتلها واني بمدي اذبحها رجعت لمكاني گالبه وجهي شفت جبل مبتسم اشرتله بحواجبي بمعنى شكو
دز رساله وگال ماكو شي......
كملنه الغده ونضفن البنات المواعين وگعدن يمي شوي واجه مازن گال
/تلعبون؟
البنات/يييي شنلعب
/اسم جماد حيوان
شهد/شگد قديم
منى/ لا لا حلوة اللعبه صارلنه هواي مالاعبين
مازن/يلا بس راح نسوي سباق بينچن منهي الي تجاوب صح
البنات/اوك
بده بريام اخت فرح ووراها بده بفرح ووصل يم شهد گال
مازن/بسرعه حرف ز اسم بنيه؟
شهد/ززززززز
مازن/بسرعهههه
عاطت شهد
/زينببببب
مازن/وجععع يلا اسم ولد
شهد/زيد
/كفووووووووووو يلا اسم حيوان
/زمال
/ايا زماله يلا نبات
تأخرت شهد بالجواب
گال مازن
/دحچييييي
/عاااا مدريييييي
صاحت منى /زعفراااااااان
شهد/وجع عليش جاوبتييييي
منى/انتي تأخرتي انه شعليه
وضلن وحده تناگر باللخ واني اضحك على سوالفهن
گال مازن/يلا تالين دورچ
تالين /اوك
مازن/يلا حرف ال ف اسم بنيه
/مممممممم مدري شسمههه
مازن/بسرعهههه
/فاطمههههه
/كفو يلا اسم ولد بحرف ال ف
/اااااا فاضلللل
/كفووووووووووو
مازن/يلا اسم حيوان
صفنت وأشرت على فهد ابن عمو كامل وگلت بحماس
تالين/فهدددددددد
ضحك فهد وگال/شكرا
اني استوعبت گلت
/عااا والله مو قصدي
ضحك وگال
/ لا عادي........
كملنه لعب وصدگ تونست بوكتها ضحكت من كل گلبي
تعشو كل الخطار يمنه و نص الليل راحو دگت عليه امي گالت ابوچ مريض
تالين/ليششش شبيه
/والله مدري ييمه اليوم المغرب تخربط ووديناه للمستشفى گالو صاعد عنده الضغط
بچيت وسألت امي
/ضايج من شغله؟؟؟صاير شي؟؟
/مشتاگلچ..
گالت هيچ واني طگيت بچي وهي هم بچت....
حچيت وياها وامنتها تنقلي اخبار ابويه
سديت المكالمه ودزيت رساله لجبل ب11 ونص تقريبا گتله
/موجود
💌جبل/خير بويه شمالچ بيچ شي؟
/لا مابيه شي بس انت گتلي اني اقنع جدو
دگ عليه رفضته خفت أحد يسمعني گتله
تالين/لتدگ اخاف أحد يسمعني
دگ مره لخ جاوبته
/هلاو
/هلا بيچ بويه شمالچ هسه تذكرتي تسأليني
گتله وصوتي گوه يطلع
/جبل أبويه مريض
/ليش شماله
/مدري بس امي تگول ضغطه صاعد الله يخليك اخذني عليهم اشوف أبويه گلبي ورم من وراكم ومن ورا تقاليدكم
گلت هالكلام وبچيت
سمعته تنهد وگال
/وداعتچ ينحرگ گلبي من اشوف دموعچ
شو أني فجأة بطلت بچي وردت استوعب الي گاله
گتله
تالين/هاه؟
جبل/لا سلامتچ ماكو شي
/زين يمته اروح لأهلي
/گتلچ هالاسبوع
/اوك بس امانه حاول ويه جدو
/افاا ماتثقين بكلامي؟
ابتمست وگلت
/لا منو گال مااثق
ضحك خفيف وگال
/يلا روحي نامي ولتفكرين بشي
/اوك تصبح على خير
/وانتي بخير بويه

سد المكالمه واني طلگت نفسي على الفراش اباوع على شهد نايمه وتشخر...
ابتمست وحطيت ايدي على جهة گلبي وگلت
تالين/يارب هالاحساس مو الي ببالي.............

لتنسون التصويت ❤️❤️

واسفه اذا اكو اي خطأ إملائي ❤️