تالين الشيخ جبل

part 6

تالين/ شفت الساعه ب1 بالليل متت جوع
نزلت اتسحب على أطراف اصابيعي اخاف أحد يگعد...
فتت للمطبخ ودحست راسي بالثلاجه واكل ومندمجه.....
شايله بأيدي لفة وبأيدي الثانيه قوطية بيبسي....
انداريت وشفته مچتف أيده ومتچي على الحايط مبتسم.
بحلگي اللگمه وگلت
تالين/شلونك
جبل/من شفتچ صرت زين
نزلت راسي خجلانه كمل كلامه
/ليش مانزلتي على العشه
/ماصارلي واهس اكل
/اهاا
/ييييي
/والغده؟؟؟؟
/چنت تعبانه من الطريق
/سلامتچ يعمي
/الله يسلمك
تقرب مني وگال
/شدتاكلين
مديتله اللفه وگلت
/لفة تريد؟
/لا مااشتهي
سكت شوي وگال
/شعندچ لسه گاعده
/نمت الضهر مااجاني نوم هسه وهم جوعانه ماگدرت انام
ماردلي ضل صافن بوجهي
گلت
/احم رايد شي
/لا بويه سلامتچ
/اوك لعد يلا تصبح على خير نعست
ابتسم وانخفض صوته وگال
/جعل محد غيرچ يگول لعد.......
توترت مدري شسوي گلت بأرتباك
/راح اصعد تصبح على خير
ابتسم أكثر وگال
/وانتي بخير
مشيت بسرعه اريد بس اطلع من المطبخ اندعمت بالباب صحت بوجع
/اااخ يمه وجهي
اجه عليه بسرعه گال وهو خافي ضحكته
/شمالچ يابا
ارتبكت وخفت ليحچي كلمه لخ مارديتله طلعت من المطبخ اركض... وصلت الغرفه صوت نفسي عالي من الركض الركضته گعدت على فراشي واطرافي ترجف من التوتر
صفنت على اللفه الي بأيدي
/يمه شبيه هذا يتغزل بيه ماخلاني اكل براحتي......
كملت لفتي واتمددت اتذكر كل كلمه گالها وخاصة أكثر كلمة احبها (بويه).......

مر شهر على رجعتي وكلشي ماصار.....
بيوم چنه گاعدين العصريه نسولف....
راحت رقى على جدو وگالت
/جدو حبيبي شو بعد متاخذونه للبر
فهد/يي والله جدي خلنه نطلع نتونس
عمو كامل/اذا حابين نطلع ليش لا خلنه نطلع نونس البنيات ها بويه شگلت
جدو/ هاي هي دز على اخوانك يهيرون رويحتهم باچر نطلع دام الجو بارد موش مثل صيف
الكل وافق على الروحه وصدگ جتي بوكتها لان نريد نطلع نغير جو اختنگنه من جو البيت.......
اجه ثاني يوم والعشيره كلها اجتمعت ببيت جدو حتى نطلع كلنه بنفس الوكت....
جتي السيارات وطلعو كلهم تقريبا بقى بس خاله ام جبل وجبل وفهد وشهد ورقى ومازن
گال مازن
/امشي ويه البنوات بسيارتي
دحگت على جبل شفته خازرني
عادي واني ومااحب اعاند
گتله
/اوك بس لحظه اجيب جنطتي
توني دااصعد سمعت جبل يگول لفهد
/أخذ امي والبنات بسيارة ايوب
إنه شوي وجاي وراكم
ام جبل/ليش يمه مو على أساس انت تودينه
/لا يمه صارتلي شغله
/براحتك يمه.........
راحو واني صعدت فوگ فتت للغرفه اخذت جنطتي وطلعت توني داانزل شفت جبل بوجهي گال
/والعباس ماعوفچ تركبين وياه
/شبيك انت شعليك اني اريد اصعد ويه ابن عمي
شد قبضت ايده وگال بنبرة حادة
/وحگ الخلقچ ماتركبين وياه وهسه تمشين گدامي يلا....
مارديتله ونزلت اركض من الخوف،
شفت مازن ينتضرني گال
/وينچ تأخرتي
/اگلگ غيرت رأيي راح اروح ويه منى وسلوى
/ليش تعالي ويايه
بهالاثناء نزل جبل گال
/متريد تروح وياك لتلح على البت
طلع مازن گالب وجهه انداريت على جبل
گال
/والعباس لو رايحه چان محد فكچ من ايدي
گلت بنبرة استفزاز
/هو ابن عمي مثل ما انت ابن عمي ما الك حق تمنعني من الروحه وياه
باوعلي وحواجبه معگوده راد يحچي جتي سلوى نقذتني
/هاي وينكم صارلنه ساعه ننتضركم ترانه تأخرنه
اني استغليت الموقف وطفرت يمها
/يييي صدگ تأخرنه يلا نمشي اباوعله حواجبه بعدها معگوده
ابتسمت بداخلي من حسيته يغار عليه....
طلعنه للسياره واني ومنى گضينه الطريق نعلگ اغنيه وانطفيها ليما بزع جبل وگال
/والكعبه إذا مااختاريتو اغنيه بيها حظ اكسر الموبايل
گتله
/لا هسه لگيت اغنيه حلوة
شغلت اغنية وحق الرب
اسمع بالاغنيه ومندمجه ادندن بيها
توترت لمن شفته يباوعلي من المرايه ومبتسم سكتت وضليت بس اسمع كلمات الأغنية.........
صار المغرب و وصلنه لمزرعه بيها بيت يعادل بيتنه بالبصره مرتين هل گد ما چبيييييير
الكل نزل من السيارات والنسوان فاتن يرتبن البيت ويحضرن العشه.....
اكو مكان گبال البيت شلون الگعده العربيه كلش حلو راحو گعدو بيه عمامي وجدو وجده أما الولد راحو يحضرون النار حتى يبدون بالشوي.......
گاعده بالمطبخ اسوي زلايط وملتهيه گالت خاله ام جاسر
/تعاي شهد اندهي لفرح ومريم يجن حتى تودن السمچات والدجاجات للولد يشووهن...
سمعت بأسم فرح وفز گلبي ادري بيها تحب جبل ومدري ليش گمزت بسرعه گلت
/خاله اني اوديها وياهم
/لا يمه كملي الزلايط هسه البنوات يودوهن..
هزيتلها راسي وگعدت على اعصابي اكمل الزلاطه....
طلعت روحي على ماكملت الزلاطه گمزت بسرعه اشوف وين فرح...
طلعت اركض يم الولد شفتها واگفه وجبل يحچي وياها ومبتسم وهي الابتسامه من الاذن للاذن
گلبي اشتعل نار اريد اعرف شحچالها
ردت اروحلهم صاحتني خاله اوديلهم السمچه الاخيره رجعت فتت للمطبخ اخذت السمچه وركضتلهم....
وصلت يمهم عاگده حواجبي وضايجه
ردت أبعدها عنه بأي طريقة، مديت السمچه لجبل
/هاي اخر سمچه
توه مد أيده دياخذها سحبتها فرح من ايدي وانطتهيا......
شطت للسمه بمدي اكفشها
باوعت لجبل مبتسم الا شوي اكفخه بالطاوة بس شفعتله خاله من صاحت
/يلا يمه تعالو افرشو المشمع
صحت
/يي خاله جينه
سحبت شهد وردت اروح شفت فرح ماتحركت
صحتلها
/شنو بأيدچ حنه تعاي ويانه
فرح بمياعه
/لا گلبي اخاف الولد يحتاجون شي
عفت شهد ورحتلها
/الولد ممحتاجين شي امشي يلا
جريتها من أيدها ومشيت بسرعه...
خلصو الولد شوي وگعدو وبدينه احنه البنات نفرش الاكل على المشمع....
اباوع لفرح كلسع رايحه لجبل بحجه شكل وهو ماشاءالله مكيف...
متت قهر لمن شفتها بهالقرب منه......
كملنه اكل وگمنه نضفنه المطبخ وگعدنه ، گعدت واني السيف ميگص وجهي أشوف جبل گاعد ويتبسم
للرايح والجاي گلت بيني وبين نفسي هذا شبيه مستخف فرد نوب.......
گاعده ومكتئبه گال مازن
/شبيها بنت العم ضايجه
رفعت اكتافي وگلت
/هيييچ
/تريدين نلعب؟
/لا مالي خلگ
/هسه دحچي شبيچ
ردت اكفخه بگفه ايدي هلگد ما لح بس لزمت نفسي وضليت ساكته مالي خلگ اردله
هو سكت شوي وچان يگول
/بيبي ماتغنيلنه
جده/شني شغنيلكم
باوعلي مبتسم جاوبها وهو موجهلي نضره
/غاب الگمر وثريته....
شو جده بسرعه اتحمست وبدت تغني هي وخاله ام جاسر و خاله شيماء مرت عمو صدام وخاله فاطمه مرت عمو جاسم
ومازن يباوعلي كلما يوصلن مقطع
[واني الي مگابل عمي بلكي ينطيني بنيته]
كرهته هلگد ماباوعلي.....
باوعت لجبل طابگ حواجبه
گال بصوت عالي
/غيرنها موحلوة
جده/ليش يمه
/غني اي شي غيرها
توها جده اتحمست تريد ترجع تغني گال جدو
/بسكم عاد خلنه ننام ماتعبتو
جده أيدت كلامه وسكتت و صاحت بينه..
/ماسمعتن گومن فرشن حتى ننام...
النسوان گامن يتطافرن يفرشن للولد برا واحنه ننام جوة بالبيت.....
كملنه فرش وكل وحده نامت بفراشها....
استهضمت من تذكرت جبل لمن حچه ويه فرح والدمعه صارت بطرف عيني....
گمت رحت على جدو گلت
/عادي افتر شوي هناك
وأشرت على البستان
/افتري يبويه دام ماكو احد هالبستان النه بس لتبتعدين هواي البر يخوف
/ماشي جدو
رحت أخذت موبايل وتمشيت بأتجاه البستان....
مشيت وشفت گدامي بحيرة صغيره گعدت يمها وصفنت على الأشجار،
ارتاحيت لمن حسيت بهوه بارد يداعب وجناتي وضوه خفيف مصدره الگمر.....
ضليت صافنه نص ساعه تقريبا وحسيت أحد گعد يمي درت وجهي شفته مبتسم
گلت بضوجه
/شعندك هنا
/افاا شمالچ حاقده عليه
/محد گلك حاقده
/چا شمالچ متكدره(ضايجه)
من گال هيچ دموعي نزلن
رجع گال
جبل/شمالچ يبويه منو مكدرچ
باوعتله وگلت
/انت
گال
/ليش شسويتلچ أنه
/لا سلامتك ممسوي گوم روح لفروحه لتزعل منك
ابتسم وگال
/شعندي رايحلها
گلت واريد استجوبه
/شحچيتلها من چنتو تشوون
/سر بيني وبينها
گمت واني اعصابي صارت نار
/لعد خوش اني اروح وانت صيحلها وگعدو هنا تساررو.
ضحك وجرني من ايدي وگال
/شمالچ عصبتي
/مابيه شي ويلا هدني اريد اروح
قربني اله وگال بهدوء
/تغارين
/انيي اغااار ومن منوو من فرححح لا عيني ماغيرانه
ضيق عيونه وگال بنبرة شك
/متأكده
/يي متأكده  والله ياالله اني اغار من السحليه؟ هههه لا مستحيل اغار منها ويلا هدني گبل لتجي حبيبة الگلب تشوفك
ابتسم وقربني اله أكثر ونصه صوته وگال
/هذا كله وتگولين مااغار........

لتنسون التصويت ❤️❤️

واسفه اذا اكو اي خطأ إملائي ❤️