تالين الشيخ جبل

part 8

احس الدم جمد بجسمي من سمعته ضليت متصنمه بمكاني..
گلت
/هاه
ابتسم وتوة ديحچي اجه الكنغر..
مازن/شدتسوون هنا
التفت جبل عليه وگال بنتر
/انت شعليك
/شدتسوون وحدكم
جبل ديحچي وگلت
/ماكو شي يلا مع السلامه تصبحون على خير
باوعلي جبل بخزره
/ضلي هنا
/لا لا تصبح على خير
عفتهم ورحت اركض.....
طلعت روحي على ما وصلت البيت وفتت بفراشي ارجف من الخوف خفت من مازن يحچي لأحد نمت واني لازمه گلبي خايفه من مازن وبنفس الوكت افكر بكلمة جبل ووعدت نفسي مااتقرب من جبل وابتعد عنه ليشوفنه أحد مره ثانيه.....
گعدت الصبح وچان هذا اليوم اخر يوم النه بالبر...
حضرنه غراضنه والعصر انطلقنه شفت جبل يأشرلي اصعد بسيارته بس غلست ورحت لسيارة عباس......
وصلنه للبيت تعبانين نمت وماحسيت بشي وراها
گعدت ثاني يوم ونزلت جوة صبحت عليهم...
شفت جبل گاعد يم جدو بس سويت نفسي مامنتبهتله......
مرت ايامي واني اتجاهل جبل مااريد اتعلق بيه احس علاقتنه مستحيله...
بيوم وورا شهرين من رجعتي من بغداد
چنت گاعده بالمطبخ واندگت الباب انتضرت أحد من الولد يطلع بس محد طلع......
گمت اني طلعت اشوف منو بالباب
/منو
/اني
فزيت من سمعت صوته فتحت الباب بسرعه
وانصدمت من شفت زيد ابن خالتي گدامي ويمه ابويه گمزت على أبويه حضنته وسلمت على زيد...
اجه عمو كامل وسلم على ابويه وزيد ، شوي واجه جبل خزرني حتى افوت جوه بس ضليت واگفه
زيد/ ول يعيوني شو ماكو
ابتسمت وگلت
/موجوده انت الگاطع ومتسأل
/ذاك الاسبوع رجعت من السويد
/اي صدگ مبروك على الماجستير
/الله يباركلچ.
اباوع لجبل طابگ حواجبه ويخزر
عمو كامل أخذ بابا وزيد وفاتو للديوان أما جبل اجه يمي گرصني گرصة شاغت روحي من وراها گال
/والعباس اذا عدتيها مره ثانيه اذبحچ
گتله واني متوجعه من گرصته
/وانت شعليك ابن خالتي وسلمت عليه ماالك اي حق تمنعني منه.
عفته ومشيت گلت لأبويه وجدو على جية أبويه القديم وابن خالتي
(أبويه القديم يمهه متت😂😂😂😂😂😂😂😂).....

اخذت مي ورحتلهم ضيفتهم وگعدت شوي وگال ابويه..
عمر/جايك بطلب واتمنى متردني
ضاري/أأمر من هاي العين گبل هاي العين
/تسلم والله والنعم منك حجي ، رايد تالين تجي وياي لبغداد امها شوي مريضه وتريد تشوفها
/ گتلك بنيتنه مانگدر نعوفها ببيت غريب.
/ادري والله بس امها تعبانه حيل وتريد تشوفها واحنه هم مشتاگيلها عاشت ويانه كل هالسنين مو هينه علينه نعوفها.
زيد/ها حجي لتردنه خايبين
جدو باوع لبابا وبابا اشرله بمعنى اي
/چا هاهيه گومي بويه هيري نفسچ
گمت واني أشوف جبل وجهه احمر ويهز برجله وعيونه تخزرني....
صعدت فوگ حضرت جنطتي ولبست ونزلت جوة سلمت على اهلي وطلعنه
وگضيت الطريق كله مندمجه احچي واضحك ويه زيد ليما وصلنه بغداد... وصلنه وسلمت على اخواني وخواتي وامي ومر يومي طبيعي....
مرن 4 ايام واني ببغداد وچانت ايامي مليانه ونسات وطلعات...
وبيوم قررنه نروح زياره للإمام الكاضم، حضرنه غراضنه وانطلقنه احنه وبيت خالتي ام زيد...
وصلنه الامام وابويه گال
/روحن زورن ونلتقي يم الامانات
ردتله امي
/ان شاء الله
توة أبويه يريد يروح اندار على امي وگال
/ديري بالچ على البنات....
استغربت ليش هيچ أبويه مبين خايف....
رحنه زرنه وبديت اصلي كملت صلاة
واباوع حواليه امي وخواتي ماكو
مرت ساعتين واني افتر ودموعي تجري وارجف اريد بس المح احد من اهلي ماكو اختفو
تأخر الوقت وتعبت من المشي گعدت ارتاح على الرصيف اجتي بأتجاهي مره متوسطة بالعمر گالتلي
/يمه شعندچ هنا وحدچ
بچيت وگلت
/تيهت امي
باوعتلي وگالت
/تعاي يمه اوديچ للامانات بلكي يذيعون اسمچ ويسمعوه اهلچ
باوعت عليها گلبي مامرتاح بس رحت وياها عسى ولعل الگه اهلي.
دنمشي واجاها اتصال
/الو ها عيني
سكتت تسمع جواب المتصل وگالت
/اي اي لتخاف يلا أن شاء الله مو گلنه اي يا عيني ميخالف يلا مع السلامه، نهت الاتصال واني افكر احس سالفتها مو خاليه....
شوي ووصلنه لمكان اول مره اشوفه
سألتها واني بگلبي خوفه
/خاله وين صارت الامانات
/لتستعجلين ماضل شي
سكتت وكملت مشي وياها وصلنه لفرع شبه مهجور گتلها
/خاله شنو هاي وين جبتيني دتحچي و اجو شباب ثنين بأتجاهنه شفت واحد منهم غمز للمره متت خوف ردت ارجع لزمتني من ايدي وأشرت للولد دفعتها كل قوتي وردت اركض عثرت ووگعت گمت اعيط اريد احد ينقذني اجه الولد بسرعه قيدني بين أيده واني ارافس جواه شالني وفوتني لوحده من الشقق والمره والولد الثاني اختفو.....
بهاللحظه متت خوف ارافس بين ايده اريد انهزم مااريد افكر باللي راح يصير عيوني تحرگني من گد ما بچيت حلگي رابطيه مااگدر اعيط.... فوتني الغرفه وشمرني على السرير وهجم عليه تخبلت نقطة دم ماضلت بيه دفرته كل قوتي بين رجليه عافني وهو يتوجع ركضت بكل سرعتي حتى اطلع من الغرفه شالي وگع ماشلته وقميصي انشگ مااهتميتله الشي الوحيد الي ببالي انو اطلع من هالمكان........

______البصرة_____الساعه 9 مساءً

شهد/گاعده بالصاله اجه اتصال لعمو محمد
/الو السلام عليكم منو وياي
/الو ها حجي اني زيد رحنه زياره وتالين ضاعت من عدنه شايفها ولد تمشي ويه مره واكو احتمال 80 بالميه مخطوفه
اشوف عمو محمد ملامحه تغيرت والصدمه والخوف بينن بوجهه نهى الاتصال وباوع لولده گال
/تالين مختفيه
گمز جبل
/شني شلون مختفيه
گام عمو محمد وگال
/مختفيه مالها اثر من المغرب
گامو ولد عمي واخواني كلهم انتشرو للسيارات وجهتهم بغداد..
أما خاله ام عباس نريد نهديها منگدر اتخبلت على بنتها والوكت كله تهذي بجملة
(يربي مااريدها تروح مني مره ثانيه)......
راحو ابويه واخواني وولد عمو محمد لبغداد واحنه ضلينه الخوف ماكل گلوبنه على تالين..........
____بغداد____3 فجراً

عمر/الخوف ماكلني بنيتي الي ربيتها على أيدي مختفيه الگاع انشگت وبلعتها مالها اثر شفناها بكاميرة واحد من المحلات گاعده على الرصيف واجتي مره اخذتها بس المشكله المره ممبين وجهها بس ضهرها رحنه للشرطه گالو الا يمر 24 ساعه على اختفائها يلا يگدرون يتحركون
گلبي اشتعل نار اريد اعرف وين صارت بنيتي..
گعدت على الرصيف واني دموعي تنزل خايف صارلها شي اجت 4 سيارات نزلو منها أخوان تالين وولد عمها گمت بأتجاههم واني أشوف الشرار يتطاير من عيونهم
تقدم عليه ابن عمها وعباس
جبل/وين راحتتتت شلوووون تضيع منكم
عباس/والعباس اذا صارلها شي امحيكم
زيد/اهدو مو وكت هالكلام
باوع عليه وعيونه حمره دم
جبل/والحمزه اذا ماسكتت اطلع ضيم الدنيا بيك......
.
.
.
.
.
الجو بارد والدنيا ضلمه اسمع اصواتهم شوي شوي دتتقرب عيوني تجري گمت گوة أسند نفسي على الحايط
داامشي وحسيت شي گرصني برجلي شاغت روحي اريد اعيط من الوجع خفت يسمعوني گوة تحملت الوجع ومشيت ، اسمع أصواتهم بدت تقرب مني اكثر واني ابچي من الخوف ومن الجوع ومن الوجع ، صار الشارع العام گدامي واصواتهم اختفت اريد سياره تعبر بس ماكو ،،،
رجلي موتتني وصار مكان الگرصه ازرگ سمعت صوت ورايه درت وجهي وشفتهم يركضون بإتجاهي ركضت بكل قوة واني أناجي رب العرش يخلصني منهم ، فتت لشارع حسيت نفسي شايفته ركضت بين الافرع واني حافيه وماكو شال على شعري و صدري ممستور......
وصلت للشارع الي گعدت بيه لمن اجتني المره تاخذني ، ابوعلهم وروحي فرفحت لمن شفتهم واگفين على الرصيف.........

لتنسون التصويت ❤️❤️

واسفه اذا اكو اي خطأ إملائي ❤️