رواية خوي👫

الحلقة الاولى^ تاجر المخدارات^

رواية خوي👫 ^ تاجر المخدارات^

الحلقة الاولى

للكاتبة: لولو حبيب

_______________________

اني اسمي رانيا مواليد 2003 نقرا شهادة ثانوية

عيلتي بابا الله يرحمه وحتي امي الله يرحمها ماتو الزوز من هم خوي وعمايله السود كل عملة احرف من اللي قبلها

عندي اختي متجوزة اسمها رهف مواليد 94 وعندي خوي رعد مواليد 98

اختي حولت وسكنت جنبنا بعد وفاة امي وديما اتجي ولا اني نمشيلها احني جيران لاصقين في بعض حياشنا

خوي تاجر مخدارات كان قبل مدمن لكن اتطور وابدي تاجر ههه ديما نسمع في الكلام هادا في المدرسة ديما ايقولولي فيه

//////////////

نضت الصبح توضيت وصليت وبدلت حوايجي ودرت الفطور وفطرت وغطيت فطور رعد وامشيت للثانوية

كملت دوامي وروحت كانت ساعة 2 خشيت للكوجينة لقيت الفطور زي ماهوا

رانيا بهزوة: ههه زي العادة قاعد راقد يرقد النهار ويقيم اليل

خشيت لداري بدلت حوايجي ودوشت وطلعت بندير غدي

رانيا: اعلاش بندير غدي وهوا ينوض العصر نمشي نتغدى عند رهف وخليه يتمرقد

امشيت لداري لبست طرحة الصلاة واخديت مفتاح الحوش وتلفوني وطلعت امشيت عند رهف

/////////

ناض رعد غسل وجه وطلع من داره

رعد: رانيا رانيا وين انتلفت الفرخة هادي

امشي للكوجينة لقي الفطور شبح للغاز مفيش غدي كعمز يفطر شرين تلفونه

رعد: ها... به به ... بعد المغرب بنجي... به هي تشاو

انفتح الباب تلفت رعد وخشت رانيا

رعد: نورتي نورتي وين كنتي

رانيا حطت ايديها في نصها: كنت ندهور امشيت الي اليابان وسويسرا وفرنسا يعني وين بنمشي ماهو حوش اختك

رعد حذف اعليها الموس: ادوي به

رانيا نفخت وامشت وخلاته

رعد بصوت عالي: تبي رباية من جديد

رانيا بصوت واطي: غير اتربى انته قبل

رعد ناض خش لداره بدل حوايجه وطلع

رانيا: تلفه النهار كله وهوا ياراقد يابرا جدري ماجاني من وراك غير الهم

رقدت رانيا شوي اذن العصر صلت العصر وشدت قرايتها

///////////

رعد مكعمز في السيارة ويتفرج علي زحمة الناس قدامه شرين تلفونه