Dhoop bhut kadi thi, chaanv ka naam bhi nahi tha
Yun hi dosto ke saath idhar udhar ghoom raha tha, kuch khaas kaam nahi tha
Chalte chalte dekha ki shoe lace khul gaya
Usko baandhne ke liye neeche jhuk gya
Fir jaise hi upar uthkar dekha maano waqt tham sa gaya ho
Dhoop chubhni band ho gyi, maano dil toh dhadkana hi bhool gaya ho
Sooraj se bhi zyada chamakta chehra lekar woh meri taraf badh rahi thi
Uske meri ore badhte ek-ek kadam ke saath meri saansein kam ho rahi thi
Apni dost ki baaton mein woh poori tarah khoyi huyi thi
Masoomiyat toh uske chehre ke har hisse mein samayi huyi thi
Dekhte hi dekhte mere man ki khwahish poori ho gyi
Aur hum dono ki nazrein yun hi takra gayi
Ek pal ke liye na toh usne palkein jhapkayi thi na maine
Aas paas ki saare aawazein achanak bilkul shaant ho gyi thi jaise
Fizaon mein uski khoosboo chaa gyi
Itni garmi mein bhi uski maujoodgi thandak ka ehsaas kara gyi
Uski dost ke bulaane par uska dhyaan mujh se hat gaya
Uski ek jhalak mein mujhe apna saara jahan mil gya
Meri kismat bhi kya kamaal hai nhh jo-jo chaaha sab ho gya
Hawa ka ek jhonka aaya aur uska dupatta udkar mere paas aa gya
Usne meri taraf dekhkar "sorry" jaisa shayad kuch kaha
Honth toh uske fadfada rahe the par maine kahan kuch suna
Apna dupatta aur mera dil dono lekar woh chalne lagi
Uske aage badhte hi meri dhadkanein bhi badhne lagi
Kaun kambakht kehta hai ki pehli nazar mein pyaar nahi hota
Shayad unhe itne khoobsurat nazare ka deedar nahi hota
Sirf uski ek jhalak mujh par aisa jaadu kar gayi
Hosh-chain sab kho gya, dil ko bekaabu kar gyi
Na jaane kitne ghanto tak mai wahin khada raha
Dost bulaate rahe par mai toh usi ke khayalon mein khoya raha
Kismat saath rahi toh fir zaroor milenge apni kahani aage badhane k liye
Warna ishq mein toh mehboob ki ek jhalak hi kaafi hoti hai zindagi bitaane ke liye
Aankhein takrayi, dil dhadka aur yun hi mujhe us se pyaar ho gya
Ek hi pal mein uski muskurahat, uska chehra mera saara sansaar ho gya
~~~~~~~~~~~~~~~~~~~~~~~~~~~~~~~~~
Do you all believe in love at first sight?
Vote, comment and share
YOU ARE READING
KALAM Se DIL Tak
Poetrychhoti chhoti kahaniya kavitaon ke roop mein Any kind of similarity with any person or incident is a mere coincidence. Please support my efforts and vote for my story.
