Haath se phone chhootkar zameen par gir gaya
Us ek phone call mein mera sab kuch bikhar gaya
Sudh-budh sab kho gyi, waqt hi nahi mila kuch sochne ka
Na baal sanwarne ka hosh raha, na hi aansu pochne ka
"Hospital, hospital pahuchna hai" Bas dimaag mein yehi ghoom raha tha
Aankhon ke aage andhere chaa gya, sirf uska chehra dikh raha tha
Girte, ladkhadate kadmo ke saath hospital ke us kamre tak pahuch gyi
Uske chehre par woh oxygen mask, haathon mein IV tubes dekhkar meri saari duniya palat gyi
Mujhe dekhkar uske chehre par chhoti si muskaan aa gyi
Meri taraf haath badhaya toh aansuo se meri aankhein bhar aayi
Bhaagkar maine uska haath thaam liya, kareeb se uski halat dekhkar dil ro diya
Aansu toh ruk nahi rahe the par sirf uski khaatir maine muskura diya
"Tum dhokhebaaz ho, tumne kaha tha ki tum aur tumhara dil sirf mera hai
Fir kyun tumne is bimari ko apne dil mein jagah di, tumne apna vaada toda hai"
"Mujhe maaf kar dena zindagi bhar saath dene ka vaada kiya tha par beech mein chhod kar jaa raha hoon
Aaj jaane se pehle sirf ek baar tumhe dekhna chahta tha, saare vaadein jo todkar jaa raha hoon"
Uski aawaz mein dard chalak raha tha, is bimari ne uski saari himmat tod di
Aur uske in lafzon ne mera dil aur meri bachi-kuchi saari ummeedein tod di
"Kahan jaana hai? Tum kahin nahi jaa rahe ho, tum sirf mere saath ghar chaloge" maine sisakte huye kaha
"Mai kisi ko bhi humare beech nahi aane doongi, yeh chhoti si bimari kya cheez hai...tum theek ho jaaoge, pakka vaada raha"
Usne mera haath aur bhi kaskar pakad liya
Bhut rokne ki koshish ki usne par woh aansu gir hi gya
Kuch bolne ke liye jaise hi uske honth hilne lage, mere haath se uska haath chhoot gya
Achanak waqt tham gya, dil sehem gya, sab kuch bikhar gya, sab toot gya
Doctor aaya, uska haath dekha, apna sir hilaaya aur chala gya
Mere aas pass kya ho raha tha, kuch theek se samajh hi nahi aaya
Maine usko jhanjhoda, zor se naam bhi pukaara, gale bhi lagaya
Uski dhadkono ki aawaz na sunne par bhi mujhe hosh na aaya
Roti- bilakhti huyi mai wahin farsh par gir gyi
Sir chakrane laga aur aankhein band ho gyi
Kuch der baad hosh aaya, par tab tak woh mujhe chhod kar jaa chuka tha
Uske saath hi mera sukh, chain, mera dil sab tabaah ho chuka tha
Meri beintehaa mohabbat bhi uske dil ke chhed(छेद) ko bhar na saki
Uska haath mere haath mein hi tha par usey rokne ke liye mai kuch kar na saki
Ek aansoo gira, ek sapna toota, ek zindagi gyi, ek rishta chhoota
Us ek pal mein na jaane kya kya bikhra, kya kya simta
Aansoo ab sookh chuke hain, aur yeh chehra muskurana bhool gaya hai
Jo kabhi zor-zor se uska naam pukarta tha, woh dil dhadakna bhool gaya hai
Ae khuda tujhse bas itni si fariyaad hai, itni si dua hai
Kabhi kisi aur ke saath aisa na ho jaisa aaj mere saath hua hai
~~~~~~~~~~~~~~~~~~~~~~~~~~~~~~~~~
Some incidents make us and the others break us.
Vote, comment and share.
YOU ARE READING
KALAM Se DIL Tak
Poesíachhoti chhoti kahaniya kavitaon ke roop mein Any kind of similarity with any person or incident is a mere coincidence. Please support my efforts and vote for my story.
