#خذني_بعيدا
#الكاتبةورودالخالدي
البارت١١
اسمهان::::
من راح عمته كالت:
عمه البيت كدامج..سياح نياح..اختاري اي غرفة الج
خاله اني اخاف انام وحدي..ولو اضوجج يصير انام يمج حتى لو بالكاع..
ياااا..وليش بالكاع اسم الله..جربايتي نفرين ..نامي يمي
صدوك عمه يعني متضوجين مني؟؟
هههه...ليش اضوج شنو خايفة ع الجربايه..
كيفت لان اني فعلا اخاف انام وحدي جان صوفي ينام يمي..وفعلا نمت يمها بالليل الحمد لله عدت اول ليله ع خير وثاني يوم كعدت الصبح بدلت وتمكيجت خفيف كولش ولبست جبه فستقي وحجاب وياها مقلم وعباية ع الراس وكالت:
اني رايحة للسوك انتي تريكي ..بس شتحبين نطبخ اليوم..
من كالت نطبخ كلت عزززة اني ما اعرف اطبخ شكولها؟؟
عمه..تره اني مو كولش اعرف اطبخ بس اعرف اطك بيض واسوي جاي لو اكلي طماطة
.صارلج سنه متزوجة ومتعرفين اطبخين..؟؟من جرمن حليمة شادة وياج..مو مشكله اني اعلمج شويه شويه
ياريت عمه..
وراحت جابت مسواك كعدنا بالمطبخ هي حيل حبابه ومثقفه واجتماعيه كلت اخاف تبدي تسألني وما اعرف اجاوب خلي اسألها اني؟؟
عمه انتي شعجب وحدج..ليش متزوجتي لهسه؟؟
هاي شنو يعني اكرم محجالج عني مكلج اني ارمله..لو همه عيالج محجو عني..ابد؟؟
هلو هلو هاي اول جفصة هسه شجاوبها اضطريت اكولها:
عمه اكرم حجالي عنج وكال مربيتي وهو حيل يحبج ومتعلق بيج بس مجاب طاري مكلي ارمله وعيالي ابد ميجبون طاريج؟؟
اي ناسيني مثل ما اني ناسينهم..؟؟..الحمد لله ممحتاجتهم بحياتي كافي الظلم والقهر الي شفته منهم باول شبابي..
اسفه عمه ..يمكن ذكرتج باشياء تضوجج..
مناسيتها حتى ذكرتيني بيها ..هاج بينما تلكطين التمن اسولفلج:..شويه من قهري..
اخذت التمن العنبر اللكط وهي تحجي..
شوفي جنا كولنا عايشين بهذا البيت اني واهلي اخويه الجبير ذياب الله يرحمه وفيصل ابو اكرم ومرته وجهاله وسميره اختي الزغيره وابويه وامي الله اي بس مجان هيج..جان بيت قديم..بس المرحوم رجلي فلشه وبنا من جديد..
يعني زوجج المرحوم فلش بيت اهلج وبنا؟؟
تجيج السالفه اصبري..
بدايةسنه ٨٨.. فيصل تزوج حليمه ..وجانت سنه فكر علينه لان وره عرسهم بشهر استشهد اخويه ذياب الجبير جان مامتزوج منتظر تخلص الحرب ويعرس بس خطيه قبل منتحل حرب ايران ب٦استشهد ومن استشهد ابويه الله يرحمه تمرض عليه وامي ..سنين ما نشفت دمعتها المهم بسنه التسعين اني جنت اداوم بمعهد معلمات اخر سنه الي بالمعهد عمري بوكتها ١٩سنه اي جنت بعدني زغيرونه وحلوة وعليه العين شفت حجي سليم ..وحبني وحبيته هو كتل نفسه عليه هو اكبر مني ب١٥سنه رجال هيبه وزنكيل بس متزوج ومطلك وماعنده جهال..اجه خطبتي ابويه رفضه بسبب فرق العمر بس ما ايس..ضل بين فتره وفتره يودي مشيات وابويه يرفض بس فيصل قنعه وكله ليش ترفضة الرجال مقاول وزنكيل وعنده فلوس بكد التمن انطيها اله ولان فيصل طماع وحيال كدر يأثر على ابويه ويوافق بوكتها جانت حليمه توها حبلة بأكرم وجابته بنهاية سنه التسعين المهم عرست ..بس من عرست فيصل ضل يدحلب ع الحجي حتى يحصل منه فلوس ويستفاد وفعلا كام ينطيه واشتراله سيارة يشتغل بيها وعاش هو وحليمة من خير رجلي ..وهالكد ماجانت علاقتنه قويه جان اكرم عايش ابيتي ..بس حليمه جانت من وراي تحجي عليه وتكول عاكر متخلف ومخليه ابني يمها يونسها....بس اني مو عاكر اني مابيه شي ..الحجي هو الجان ميخلف وضميت سره كل هالسنين لحد الان محد يدري هو ميخلف وكتلهم الصوج بيه موبيه حتى محد يجرحه بكلمة مات ..ومحد دره ولهسه محد يدري هو ميخلف..
