Curse Or Bless?║ᵇᵗˢ ᶠᵃⁿᶠⁱᶜᵗⁱᵒⁿ (ᶠᵃⁿᵗᵃˢʸ)║

01 Bless✨

ක්‍රි.පූ. 3200

හිස හැරුණු අතේ ඇවිද යනවායැයි සිතිය හැකි තරුණයෙකි. ඔහු දැන් මේ සිටින්නේ විවිධ දේශයන් ගණනාවක සැරිසරා තම අරමුණ ඉටු කරගත නොහී අවසන අත්ලාන්තික් සාගරයෙනුත් එපිට බැබිලෝනියානු දේශයේය. ඔහු තම අතිජාත මිතුරා සොයමින් මේ ඇවිද යන්නේ එසේ මෙසේ කලක පටන් නොවේ. පුරා වසර සියයක පමණ සිට ඔහු තම ප්‍රාණසම මිතුරා විශ්වයේ සැම තැන සෙව්වේය. නමුත් ඔහු තවමත් සොයමින් සිටී. මේ සියල්ලට හේතු වූයේ වසර සියයකට පමණ පෙර සිදුවූ අමිහිරි සිදුවීමකි.

---අතීතාවර්ජනය---

ක්‍රි.පූ. 3300

ජිමින් සහ ඔහුගේ මිතුරු ටේහයුන්ග් සිටියේ කලාවට අධිපති භාවය ඉසිලූ ඒ සුන්දර දෙවඟනන් නව දෙනා සමඟ සංගීත වාදනයේ ගායනයේ යෙදෙමින් ප්‍රීති සම්භාෂණ පවත්වමින්ය. ටේහයුන්ග් ඔහුගේ ගැඹුරු හඬින් ගායනා කරන විට ජිමින් තමාගේ මියුරු හඬින් අත්වැල් ගායනා සපයන්නට විය. දෙසවන මන්මත් කරන ඒ මියුරු ගීත නාදය ඔලිම්පස් කන්ද සිසාරා පැතිර ගියේ සියලු දෙනාගේ හදවත්වලට සැහැල්ලුවක් එක් කරමිනි.

ජිමිනුත් ටේහයුන්ග්නුත් සම වයසේ පසුවූ තරුණ දේව පුත්‍රයෝ වූහ.

ජිමින් කලාවට අධිපති ඇපොලෝ දෙවියන්ගේ සහ දේදුනු දෙවඟන අයිරිස්ගේ පුත්‍රයෙක් විය. එමෙන්ම ටේහයුන්ග් යනු දෙව් ලොවට පහනක් මෙන් විය. ඔහු දේව රජු සියුස්ගේ සහ රැජිනිය හේරාගේ පුත්‍රයෙකු විය. ටේහයුන්ග් මෙන්ම ජිමින්ද උපත ලැබුවේ එකම දිනයේය. එනිසාම ඔවුන් දෙදෙනා ගේ සහෝදර පෙම දිනෙන් දින දළුලා වැඩෙන්නට විය.හේරා උත්තමාවිය මෙන්ම ඇපොලෝ උතුමාණන්ද මේ මිතුදමට අකුල් හෙලීමට ගත් උත්සාහයන් එමටය. නමුත් ඒ සියලු බාධා වියැකී ගියේ මුහුදු වෙරළේ ඇඳි සිතුවමක් රැල්ලට හේදී යන්නාක් මෙන් අසුරු සැනින්ය.

අනාගත සුළු දෙවියෙකුගේ සහ ප්‍රධාන දෙවියෙකුගේ අතර ඇති මේ නොබිඳිය හැකි සොහොයුරු පෙම පිළිබඳ මුළු දෙව් ලොවම හොඳින් දැන සිටියහ.

ඒ අපූර්ව මිතුදමට හෙටට වසර පනහක්! ඔවුන් දෙදෙනාගේම ජන්ම දිනය හෙටයි. ඒ පිළිබඳ ඇති ප්‍රීතිය දැන්ම පටන්ම සැමරීමටයි ඔවුන් මේ ගීත ගයමින් සම්භාෂණ පවත්වනුයේ.