قسر الرواسن

بارت ١٤

أنه المتعـــوب بس مابيــنت تعبي
انه بياض ذنوبي يشبهني
أنه البــيه الـــحزن يدبي ..

بـارت- 14- من قصة "قـسَـر الـرواسَـن"
.
.
.

لعد شنو جنت تسوي بالعمارة؟

عدل كعدته وجاوبني بهدوء .. بس ثلاثة مرات دخلتلها

رفعت حواجبي وكتله .. وشنو الجبرك تدخل لهيج مكان وانتَ تصلي وتصوم !

تنهد ورد .. اول مرة جان ابن عمي حيدر سكران وبوقتها جان عمي متبري من عندة وحتى اخوته
فـ انجبرت اروحلة يبقى ابن عمي ومرجعه علينه لا يفضحنه واحنه عائلة معروف اصلها مو تالي وقت حيدر ينزل روسنه

والمرة الثانية خالتج الشريفة دكت عليه وجذبت كالت حيدر متخربط وهم رحتله بس جانت جذابة وحاولت تجر رجلي لهذا الطريق وخوش ربيتها

وثالث مرة اتصل حيدر بنفسه وماقبلت اروح كلت يطبة مرض واتصل مرة ثانية مكثر بالشرب ويتقيئ حشاج ،وهم ماقبلت اروحلة
ولمن اتصل اخر مرة جانت حالته تعبانه فدنوب وحلفني بألخوة البيناتنه اروحلة لان مايكدر يسوق
وكذلك انجبرت اروح وبوقتها جان الشفية فاقد ومتحرش بت خالتج، وبعد الباقي تعرفينه

عكدت حواجبي وكتله .. لعد ليش نجوى تكول متعود تجي وتطلب بنات وصعب تختار لان ذيج من ذيج التعجبك

ضحك بصوت وكال .. هي الي تشتغل بهيج مكان عدها الجذب ياكل ويشرب وياها

ضليت ساكته جان يكول .. حاولي تنظمين حياتج وطريقة تفكيرج ،رواسن لا تخسرين مُتعة الحياة ولا تمشين بكلام الناس وتحكمين ع شخص من وجهة نظر وحدة اليوم انا كدرت انصحج ويمكن باجر مكاني فارغ وماعندج اليعيد نصيحتي
والقرار بعد قرارج

عافني وكام وانا ضليت كاعدة وافكر بكلامة وضميري يكلي كلامة صح وانتِ الغلط
ضليت اهز برجلي بتوتر لمن تعبت وكمت طلعت ورقة وقلم وكعدت ارسم

نسيت نفسي ونسيت وين كاعدة ونسيت شنو جاي ارسم

ماحس غير وكف فوك راسي سحب الورقة من ايدي وضل يباوعلها بأبتسامة .. رسمج؟

هزيت راسي كال .. مُمكن اخذها

كتله .. اي عادي بس شنو الي عجبك بيها

جنت راسمة، هيكل جسم انسان والمخ بي خيوط مترابطة بعض
خيط الماضي ،وخيط المستقبل ،وخيط الحاضر
تُعبر الرسمة عن ،خربطة افكاري حالياً

رفعت راسي وكتلة .. الرسمة بسيطة

هز راسة .. نعم ودوم البساطة تفوز شوفي شنو راح اسويلها وصدكي امامج مستقبل باهر بالرسم

رفعت كتوفي وكتله .. ماعندي كُل هل امل بيها مجرد تقضية وقت

كعد وكال .. سمعي ماذا تقوله الأبحاث عن الهوايات:
مجلة (ريدرز داجست) كتبت: (( الهوايات تجعل الشخص يشعر بالسعادة والتحكم في حياته لذلك فهي تساعده على النجاح )).
وهناك باحث سويدي قال: (( الأشخاص الذين ينشغلون في هواية يحبونها لا يصابون بأمراض نفسية, ومعدل إصابتهم بأمراض القلب أقل من الأشخاص الذي لا يمارسون أي هواية )).
وكتب الملياردير الأمريكي شارلز جيفينز في كتابه (الذات الحقيقية) : (( لولا هواياتي لما استطعت أن أفكر بوضوح ولما كان لي هذا النجاح )).
وكتب العالم الأمريكي دكتور واين داير في كتابه (الأسرار العشرة للنجاح والسعادة): (( لكي أستطيع أن أكتب يجب أن أدخل في مرحلة تأمل تامة ))