#قصص_الأنبياء(٢)
#السيرة_النبوية
#الحلقة_مائتين_واثنين
#أحداث_السنة_التاسعة_من_الهجرة
#اعتزال_رسول_الله_لنسائه
وقفنا المرة إللي فاتت عند رسول الله ﷺ لما كان رجع من تبوك وأمر بحرق مسجد اتبنى في المدينة،
إيه قصة حرق وهدم المسجد ده🤔
هنرجع بالزمن شوية كده ونفتكر قصة أبو عامر الراهب أو أبو عامر الفاسق زي ما كان سمّاه رسول الله ﷺ،
احنا كنا اتكلمنا عنه في الجزء الخمسين لو تفتكروا وقلنا إنه
كان بيقول عن نفسه إنه راهب وعنده علم وإنه كان على الحنيفية دين إبراهيم عليه السلام،
ولما رسول الله ﷺ جاء للمدينة قعد اتكلم معاه وقال عن رسول الله ﷺ إنه حرّف في دين إبرهيم عليه السلام وإن رسول الله ﷺ كاذب،
وبعدين أبو عامر ده قال لرسول الله ﷺ يارب الكذاب يموت طريد غريب وحيد، فرسول الله ﷺ قال يارب فعلا الكاذب ربنا يعمل فيه كده،
وبعدها خرج أبو عامر من المدينة وراح قعد في مكة وفي غزوة أحد كان هو إللي حفر الحُفر إللي وقع رسول الله ﷺ في واحدة منها،
وقلنا إنه قعد في مكة لحد فتح مكة وفي الآخر راح قعد في الشام،
لما راح الشام قابل هرقل واستنصره على رسول الله ﷺ، يعني قعد يطلب من هرقل إنه يجهز جيش عشان يقاتل رسول الله ﷺ في المدينة،
فكان هرقل بيوعده ويُمَنّيه، يعني يقوله طبعا طبعا هنروح نقاتل محمد ﷺ ونقضي عليه بس هنستنى الوقت المناسب،
يعني من الآخر كده كان بياخده على أد عقله😅
فِضل أبو عامر الراهب موجود في الشام وفي نفس الوقت بيراسل المنافقين إللي في المدينة ويقولهم إنه هييجي ومعاه جيش يقاتل به رسول الله ﷺ ويغلبه وينتصر عليه ويتخلص منه وترجع لهم المدينة بقى زي زمان،
فأمرهم إنهم يعملوا زي مقر كده ييتجمعوا فيه ويرسل لهم عليه الرسايل بتاعته وكمان لما يرجع يكون المقر ده هو المكان إللي يتحرك منه ويدير منه المدينة،
فبدأوا يبنوا مسجد بجوار مسجد قباء،
بنوا المسجد ده وخلصوا بناؤه في وقت خروج رسول الله ﷺ لتبوك،
فجاءوا لرسول الله ﷺ يطلبوا منه إنه يصلي في المسجد إللي بنوه ده،
يعني عشان ياخدوا شرعية قصاد الناس احنا تمام أوي وإللي بنعمله صح حتى إن رسول الله ﷺ جاء صلى في المسجد بتاعنا😎
وقالوا لرسول الله ﷺ إنهم بنوه عشان الضعفاء وإللي ملوش مأوى يقعد فيه، وطبعا كده محدش هيقدر يعترض على أي تجمعات تحصل داخل المسجد،
يعني همّ حبكوا خطة مُحكمَة عشان ينفذوا إللي همّ عايزينه👌
سبحان الله بقى يمكرون ويمكر الله والله خير الماكرين،
ربنا عصم رسول الله ﷺ من إنه يصلي فيه،
لسه لحد دلوقتي رسول الله ﷺ ميعرفش حاجة عن المسجد ده والوحي مجاش بأي حاجة،
رسول الله ﷺ ساعتها رد عليهم بإنه دلوقتي مشغول بالسفر والخروج لتبوك، وفعلا مفيش مجال إنه يترك الجيش إللي خارج ده ويروح يصلي في مسجد بعيد عن مكان الجيش وينشغل بحاجة تانية،
فقال لهم إنه لما يرجع هيبقى يصلي فيه،
بعد غزوة تبوك ما خلصت ورسول الله ﷺ راجع للمدينة قبل ما يوصل للمدينة بساعة نزل الوحي يخبر رسول الله ﷺ بحقيقة مسجد الضّرار،
قال الله عز وجل في سورة التوبة:
"وَالَّذِينَ اتَّخَذُوا مَسْجِدًا ضِرَارًا وَكُفْرًا وَتَفْرِيقًا بَيْنَ الْمُؤْمِنِينَ وَإِرْصَادًا لِمَنْ حَارَبَ اللَّهَ وَرَسُولَهُ مِنْ قَبْلُ وَلَيَحْلِفُنَّ إِنْ أَرَدْنَا إِلَّا الْحُسْنَى وَاللَّهُ يَشْهَدُ إِنَّهُمْ لَكَاذِبُونَ ۩
لَا تَقُمْ فِيهِ أَبَدًا لَمَسْجِدٌ أُسِّسَ عَلَى التَّقْوَى مِنْ أَوَّلِ يَوْمٍ أَحَقُّ أَنْ تَقُومَ فِيهِ فِيهِ رِجَالٌ يُحِبُّونَ أَنْ يَتَطَهَّرُوا وَاللَّهُ يُحِبُّ الْمُطَّهِّرِينَ"
ربنا أخبر رسول الله ﷺ بالمنافقين إللي بنوا مسجد الضرار ده عشان يفرقوا بين المسلمين؛
لأن المسلمين كانوا كلهم بيصلوا في مسجد قِباء فلما يبنوا مسجد تاني جنب مسجد قباء كده هينقسم المسلمون، فهيبقى في فريق هيصلي في مسجد قباء وفريق هيصلي في المسجد إللي المنافقين بنوه،
وكمان يكون مكان ينتظروا فيه أبو عامر الراهب،
ولو رسول الله ﷺ سأل المنافقين عن المسجد هيقولوا له والله احنا بنيناه عشان احنا عايزين نوسع على المسلمين ومش عايزين إلا الخير،
فربنا بعد ما وضّح لرسول الله ﷺ إن المسجد إللي اتبنى ده مسجد ضِرار أمره إنه لا يصلي فيه أبدا ولكنه قاله إنه يصلي في مسجد قباء إللي اتأسس من البداية على التقوى أو مسجد رسول الله ﷺ على اختلاف بين العلماء أنهي مسجد مقصود في الآية :
《لَمَسْجِدٌ أُسِّسَ عَلَى التَّقْوَى مِنْ أَوَّلِ يَوْمٍ أَحَقُّ أَنْ تَقُومَ فِيهِ》
بس عامة يعني همّ الاتنين كان تأسيسهم على التقوى وعلى طاعة الله ورسوله من أول يوم👌
