#قصص_الأنبياء(٢)
#السيرة_النبوية
#الحلقة_مائتين_وثلاثة
#أحداث_السنة_التاسعة_من_الهجرة
#تخيِير_زوجات_رسول_الله
وقفنا المرة إللي فاتت عند عمر رضي الله عنه لما دخل على رسول الله ﷺ في المَشْرُبَةِ، إللي هي الغرفة إللي بيطلعوا لها بسلالم دي وإللي كان رسول الله ﷺ معتزل فيها،
لما دخل عمر رضي الله عنه لقى رسول الله ﷺ مُضْطَجِعٌ علَى رِمَالِ حَصِيرٍ ليسَ بيْنَهُ وبيْنَهُ فِرَاشٌ، قدْ أثَّرَ الرِّمَالُ بجَنْبِهِ مُتَّكِئٌ علَى وِسَادَةٍ مِن أدَمٍ حَشْوُهَا لِيفٌ،
يعني عمر شاف رسول الله ﷺ نايم على جنبه على حصيرة مفيش بينه وبين الحصيرة أي فراش، وعلامات الحصيرة مأثرة في جنبه وساند إيده على مخدة من جلد حشوها من الداخل ليف،
فسلم عمر على رسول الله ﷺ وقال له وهو لسه واقف:
طَلَّقْتَ نِسَاءَكَ؟!
يعني انت طلقت زوجاتك زي ما هو الناس بتقول،
فرفع رسول الله ﷺ بصره لعمر وقال له: لَا!
فهنا عمر قال وكأن كان في حِمل وانزاح من على قلبه:
اللَّهُ أكْبَرُ.
كبّر من الفرح إن رسول الله ﷺ لم يطلق نسائه، بس لسه حاسس إن الجو فيه توتر ورسول الله ﷺ لسه غضبان وواضح عليه علامات الزعل😅
فبدأ عمر يلطّف الأمور مع رسول الله ﷺ، زي كده لما يبقى في حد عزيز علينا وشايفينه متضايق فبنحاول نضحكه ونقول أي حاجة تخفف عنه همه وضيقه،
فده إللي عمر رضي الله عنه عمله،
بدأ يحكي له الموقف إللي حصل بينه وبين زوجته قبل كده واحنا حكيناه المرة إللي فاتت،
قال لرسول الله ﷺ:
لو شفت يا رسول الله إللي حصل معايا، احنا معشر قريش بنغلب النساء وبنمشي كلامنا عليهم، فلما جينا هنا المدينة لقينا النساء هم إللي بيمشوا كلامهم، ونساءنا اتعلموا من نساؤهم لدرجة إن زوجتي نفسها لقيتها بتراجعني وبتدخل في شؤوني😳
يعني عمر عايز يقول لرسول الله ﷺ:
انت يا رسول الله أخذت بسيرة الأنصار وسمحت للنساء بالكلام وادتهم مساحة في الحرية فهجرنك ونشزن عليك، لكن لو كنت مشيت معاهم بطريقة القرشيين مكنش الحال وصل للي احنا فيه دلوقتي،
فلما رسول الله ﷺ سمع كلام عمر تبسم ﷺ😊
فعمر كمّل كلامه عشان يلطف الجو أكثر فحكى له إنه بعد الموقف إللي حصل بينه وبين زوجته راح بعدها لحفصة وقالها ميغركيش إن رسول الله ﷺ بيدلل عائشة فتفكري نفسك زيها،
مكانتك عند رسول الله ﷺ غير مكانة عائشة عنده، هو ممكن يتقبل منها إللي ميتقبلوش منك، فمتعمليش زيها،
فتبسم رسول الله ﷺ مرة تانية، وهنا عمر رضي الله عنه قعد بعد ما كان واقف طول الحوار ده كله،
هو خلاص حقق إللي كان عايزه بإنه يضحّك رسول الله ﷺ ويخرجه من إحساس الضيق إللي كان فيه،
لما عمر قعد بدأ ينظر للغرفة إللي رسول الله ﷺ قاعد فيها،
الغرفة دي هي غرفة رئيس الدولة والقائد الأعلى للجيوش الإسلامية،
فلقى إن الغرفة مفيهاش غير:
ثلاث قطع من الجلد غير مدبوغة، وفِراش من حصير، وقبضة من شعير،
فهنا عمر تأثر إن رسول الله ﷺ على مكانته وعظمته مفيش في بيته غير الحاجات البسيطة دي وشاف الحصير أثّر في جنب رسول الله ﷺ فبكى عمر رضي الله عنه،
فسأله رسول الله ﷺ:
"مَا يُبْكِيكَ يَا ابْنَ الْخَطَّابِ"
فقال له عمر:
"يَا نَبِيَّ الله وَمَا لِي لَا أَبْكِي وَهَذَا الْحَصِيرُ قَدْ أَثَّرَ فِي جَنْبِكَ وَهَذِهِ خِزَانَتُكَ لَا أَرَىٰ فِيهَا إِلَّا مَا أَرَىٰ وَذَاكَ قَيْصَرُ وَكِسْرَىٰ فِي الثِّمَارِ وَالْأَنْهَارِ وَأَنْتَ رَسُولُ الله وَصَفْوَتُهُ وَهَذِهِ خِزَانَتُكَ"
وفي رواية تانية قال له:
"ادْعُ اللَّهَ فَلْيُوَسِّعْ علَى أُمَّتِكَ، فإنَّ فَارِسَ والرُّومَ وُسِّعَ عليهم، وأُعْطُوا الدُّنْيَا وهُمْ لا يَعْبُدُونَ اللَّهَ"
يعني عمر بيقول إزاي يعني يا رسول الله لا أبكي وانت الحصير مأثر في جنبك ومعندكش خزين غير قبضة من شعير وقيصر وكسرى بيتنعموا في القصور والثمار والأنهار،
وانت رسول الله وصفوته من خلقه عايش في فقر،
فادعو الله يا رسول الله إنه يوسع على أمتك فهو وسّع على فارس والروم وعايشين متنعمين على الرغم من إنهم لا يعبدون الله.
فهنا رسول الله ﷺ جلس بعد ما كان متكئ على جنبه وقال لعمر عشان يعلمه ويعلمنا قاعدة مهمة جدا👌
قال رسول الله ﷺ:
"أَوَفِي شَكٍّ أنْتَ يا ابْنَ الخَطَّابِ؟!!
يعني هل انت عندك شك في أن التوسّع في الآخرة خير من التوسع في الدنيا؟!
"أُولَئِكَ قَوْمٌ عُجِّلَتْ لهمْ طَيِّبَاتُهُمْ في الحَيَاةِ الدُّنْيَا"
يعني الناس دي ربنا عجّل لهم المتع بتاعتهم في الدنيا وملهمش حاجة في الآخرة،
"يَا ابْنَ الْخَطَّابِ أَلَا تَرْضَىٰ أَنْ تَكُونَ لَنَا الْآخِرَةُ وَلَهُمْ الدُّنْيَا"
يعني رسول الله ﷺ بيقوله انت متحبش إن يبقى همّ لهم الدنيا إللي مهما طال نعيمها فهي زائلة واحنا لنا الآخرة إللي فيها النعيم الأبدي👌
فعمر قال لرسول الله ﷺ:
يا رَسولَ اللَّهِ، اسْتَغْفِرْ لِي!
يعني بيطلب من رسول الله ﷺ إنه يدعي له ربنا إنه يغفر له جرأته على إنه يقول الكلام ده لرسول الله ﷺ.
