##قصص_الأنبياء(٢)
#السيرة_النبوية
#الحلقة_مائتين_وأربعة
#أحداث_السنة_التاسعة_من_الهجرة
#قصة_إفشاء_سر_رسول_الله
هنتكلم النهاردة إن شاء الله عن السر إللي رسول الله ﷺ أسرّه لإحدى زوجاته وبعدين هي أفشت السر ده،
ربنا بيقول في سورة التحريم:
"وَإِذْ أَسَرَّ النَّبِيُّ إِلَى بَعْضِ أَزْوَاجِهِ حَدِيثًا فَلَمَّا نَبَّأَتْ بِهِ وَأَظْهَرَهُ اللَّهُ عَلَيْهِ عَرَّفَ بَعْضَهُ وَأَعْرَضَ عَنْ بَعْضٍ فَلَمَّا نَبَّأَهَا بِهِ قَالَتْ مَنْ أَنْبَأَكَ هَذَا قَالَ نَبَّأَنِيَ الْعَلِيمُ الْخَبِيرُ ۩
إِنْ تَتُوبَا إِلَى اللَّهِ فَقَدْ صَغَتْ قُلُوبُكُمَا وَإِنْ تَظَاهَرَا عَلَيْهِ فَإِنَّ اللَّهَ هُوَ مَوْلَاهُ وَجِبْرِيلُ وَصَالِحُ الْمُؤْمِنِينَ وَالْمَلَائِكَةُ بَعْدَ ذَلِكَ ظَهِيرٌ"
العلماء اختلفوا في السرّ إللي قاله رسول الله ﷺ لإحدى زوجاته على قولين:
◇القول الأول هو قصة العسل وهي:
إن رسول الله ﷺ كان بيحب العسل والحلوى وكان من عادته ﷺ إنه بعد العصر بيطوف على نسائه ويقعد مع كل واحدة شوية،
فدخل عند زوجته زينب بنت جحش رضي الله عنها فتأخر عندها على غير المعتاد والموضوع اتكرر فالسيدة عائشة غارت واتضايقت فسألت عن السبب إللى بيخلى رسول الله ﷺ يتأخر عند زينب فعرفت إن عندها عسل وكانت تسقيه رسول الله ﷺ،
ففكرت في حيلة عشان متخليهوش يشرب العسل تاني وبالتالي ميتأخرش عند زينب،
فكلمت السيدة حفصة وقالت لها خلينا نحتال عليه حيلة،
وإللي يدخل عليها الأول تسأله:
أكلت مَغَافِير؟!
☆والمغافير دي عبارة عن عسل طعمه حلو لكن له رائحة كريهة،
فهمّ لما يقولوا كده لرسول الله ﷺ هيفهم إن العسل إللي أكله عند زينب رائحته كريهة،
ورسول الله ﷺ كان حريص إن رائحة فمه تكون رائحة طيبة، فكده هيمنع نفسه من إنه يشرب عسل تاني وبالتالي ميتأخرش عند زينب رضي الله عنها😅
فلما دخل رسول الله ﷺ على حفصة وعائشة كل واحدة في بيتها، هم الاتنين سألوه نفس السؤال،
فرد عليهم رسول الله ﷺ وقال لهم: لا، ولكني شربت عسل عند زينب!
فهنا رسول الله ﷺ فِهم إن العسل رائحته كريهة فحلف بالله إنه مش هيشرب منه تاني وقال لحفصة متقولش لحد على الموضوع ده،
لكنها قالت لعائشة رضي الله عنها على نجاح الخطة بتاعتها بإن رسول الله ﷺ مش هيشرب عسل تاني عند زينب👌
☆ملحوظة:
في رواية تانية بتقول إن إللي كان بيشرب رسول الله ﷺ عندها العسل هي حفصة وإن إللي كانوا في الخطة مع السيدة عائشة هنّ السيدة سوْدة والسيدة صفية،
لكن الرواية الأصح هي إللي احنا حكيناها؛ لأنها توافق ظاهر القرآن، ربنا بيقول:
"إِنْ تَتُوبَا إِلَى اللَّهِ فَقَدْ صَغَتْ قُلُوبُكُمَا وَإِنْ تَظَاهَرَا عَلَيْهِ"
فالكلام هنا بصيغة المثنى، ولو كانوا أكثر من اتنين كان ربنا خاطبهم بصيغة الجمع،
وكمان في حديث عبد الله بن عباس لما سأل عمر رضي الله: مَن المرأتان من أزواج النبي ﷺاللتان قال الله تعالى:
"إِنْ تَتُوبَا إِلَى اللَّهِ فَقَدْ صَغَتْ قُلُوبُكُمَا"
قال عمر: هما عائشة وحفصة👌
