حبيبى نسر و ٣ نجوم

#الفصل_الثامن

رن تليفون مريم ، بس مريم مكنتش سامعة حاجة بسبب صوت الدى جى العالى فا خرجت وقفت جنب عمود من اعمدة المدخل برة القاعة عشان ترد ، من الناحية التانية عند رامز و نور .

بيخبط بدراعه فى دراع اخوه و هو بيقوله
نور نور .

ايييه يا بنى ، نعم نعم .

ألحق مريم طلعت لوحديها ، روح شوفها لحسن يحصلها حاجة ولا حد يعاكسها .

و انا مالى هى مش صغيرة .

بقا ككككككدة ، طب خليك انت قاعد و انا اروح أشوفها ولا اقولك أنا مش قادر اقوم هروح اقول لأمير يروح يشوفها .

خلاص يا عم هروح أشوفها ، اتهد بقا .

بضحكة خبيثة على اخوه و هو بيقول فى سره
هههههه كدة خطتى هتمشى ذى ما أنا راسمها .

عند مريم ألى طلعت عشان ترد على التليفون
الو الو ، مين معايا ، الوووو.....

بس مفيش صوت نهائيا من المتصل ، لا دا كمان قفل السكة .

ايه دا يعنى ترن و تقومنى عشان متردش لا و كمان تقفل فى وشى السكة دا انت بجح .

لفت مريم عشان تدخل القاعة ، بس لقت نور واقف وراها ، بصتله مريم باستغراب و هى بتقوله
ايه ألى جابك يا نور ؟

لقيتك خرجتى لوحدك فا خوفت يجرالك حاجة فا طلعت اشوفك .

لا أنا كويسة ، مش محتاجة مساعدة من حد ، شكرا .

و لسة هتمشى ، رد نور بسرعة
ممكن نتكلم شوية يا مريم .

اتفضل .

احنا من وق......(تليفون نور بيرن ).

لحظة واحدة بس ارد على التليفون .

وقف نور على جنب بعيد شوية عشان يرد على التليفون
نعم عايز ايه انا مش لسة سايبك .

رامز بدلع
الله وحشتنى يا نونو ، قولت لما اسأل عليك .

ولاااا والله ادخل اجيبك من قفاك على نونو دى ، اخلص عايز ايه ؟

أهدى يا عم ، بص عندى ليك مفاجأة ، انت مع مريم دلوقتي صح ؟

اه .

طب بص ، بأى شكل تخليها ترقص معاك دلوقتى قبل ما يخلصوا رقص اسلو .

ليه يعنى ؟

ملكش دعوة انت ، كل ألى عليك تقولها انك عاملها مفاجأة و عشان تشوف المفاجأة لازم ترقص معاك بالمقابل .

انا ايش ضمنى مفاجأتك دى مش كارثة ولا مقلب من مقالبك بتاعت كل مرة .

يا عم متخافش على اساس هروح منك فين لو كارثة فعلا ، يلا بسرعة خليها ترقص معاك لانهم قربوا يخلصوا ، سلام يا نونو .

قفل رامز السكة بعد ما قال يا نونو و نور كان بيقول فى سره
حسابك معايا على نونو يا جذمة .