حبيبى نسر و ٣ نجوم

#الفصل_الخامس

نور كان مبرق لمريم من الصدمة و قفل أيده بغضب و حزن ، بس تمالك نفسه و بص على الموبايل كأنه بيشوف حاجة .

قربت مامت مريم عند ودن مريم و هى بتهمسلها
بقولك ايه انا هسيبكوا مع بعض ،خمس دقائق و ألاقيه جاى بيطلب ميعاد مع ابوكى ادينى بقولك اهو . (الحجة الفرفوشة رزق بردوا ) .

بهمس
ايه يا ماما ألى بتقوليه ده .

بصوت عالى شوية
روحى انتى يا مريم اقعدى مع الظابط نور عبال ما اعمله حاجة يشربها .

حاضر يا ماما .

لا لا يا طنط ملوش لزوم ، أنا اصلا مستعجل و عندى شغل ،(بص لمريم و كمل كلامه)
عموما يا مريم أنا جبت الحاجة ألى بلغتى عليها لو فى اى حاجة ناقصة تقدرى تتصلى بيا فى اى وقت بعد اذنكوا .

مشى نور ناحية الباب و فتحه عشان يمشى ، مامت مريم كانت عمالة تقوله
طيب استنى يا ابنى ميصحش كدة تمشى من غير ما تشرب حاجة .

لا لا شكرا يا طنط كفاية زوق حضرتك ، بعد اذن حضرتك .

روحى يا مريم وصلى الظابط نور تحت عند باب العمارة .

راحت مريم ورا نور بعد ما طلع من الباب .

استنى يا نور اوصلك عند باب العمارة .

نور كان باصص للسلم و هو بيرد على مريم بنبرة صوت حزينة شوية بس بيحاول يخبيها
لا يا مريم ادخلى انتى انا عارف المكان كويس ، شكرا جدا .

مالك يا نور ، انت تعبان ؟

نزلت مريم ورا نور و وقفت وراه و هى بتقوله
بصلى فى ايه ، انت تعبان ، قولى .

بص نور لمريم (ألى كان وشه احمر و عنيه حمرا شويه و باين لمعان اللون الازرق ألى فى عنيه) و هو بيقولها
لا بس حاسس ان الهوا فيه تراب و انا عندى حساسية من الأتربة ، متخافيش أنا كويس ، ارجعى انتى أنا ماشى سلام .

فضلت مريم واقفة مكانها ، باصة على نور ألى نزل بسرعة عشان مريم متنزلش معاه ولا تشوفه اكتر من كدة .

مريم في سرها
هو ماله انا ليه حاسة أنه مخبى عنى حاجة ، اووووف و بعدين فى الواد ألى بحالات ده ، أنا ارجع الشقة اشوف لو ماما عايزة منى حاجة لحسن تنفخنى .

دخلت مريم البيت و ساعدت مامتها فى شوية حاجات و بعدين لقت العلبة ألى كان جايبها نور ، اخدت مريم العلبة و دخلت بيها الاوضة عشان تشوف فيها ايه .

فتحت مريم العلبة و لقت فيها البوك بتاعها ألى اتسرق ، فتحته و لقت كل حاجة موجودة..... ماعدا الفلوس (الحرامى : عيب عليك أنا أسرق اه ، اخد حاجة مش بتاعتى لا يمكن ) ، بعد كدة بصت فى العلبة ملقتش غير قلم و مربوط بشريط على شكل فيونكة .

مسكت مريم القلم باستحقار و هى بتقول بنظرة كلها قرف
قلم قلم ،المعفن ملقاش غير قلم ، يا عم كنت جبتلى حتة سلسلة.....خاتم....شكولاتة....عصير تفاح....برسيم أنا راضية باى حاجة عليها القيمة المهم تتاكل مش قلم ، ياربى هو أنا ليه حظى جاى مع ناس معندهاش مخ .