حبيبى نسر و ٣ نجوم

#الفصل_الثانى

ملامح الصدمة على وش مريم

اتفضلي يا آنسة ، ايه ده ؟!
هو مش انتى اللي كنتى واقفة قدام القاطر من كام يوم ، هههههه ايه ، جاية تشتكي فى سواق القطر ولا ايه .

مريم حست بسخرية من كلامه و مستحملتش وفضلت تعيط اكتر .

يا نهار ابيض، ايه ده ، انا اسف ، انا مكنش قصدي ، انا كنت بهزر معاكى مكنتش اعرف ان الموضوع هيضايقك كده ، انا اسف ، انا بجد مش قصدي ، تعالي اقعدي اتفضلي .

قعدت مريم والدموع مالية وشها ، فضلت تدور بعصبية في الشنطة على علبة المناديل بتاعتها بس ملقتهاش و قالت بغضب
اوف هو ده وقته حبكت انسى المناديل النهاردة .

اتفضلي علبه المناديل بتاعتى .

شكرا .

تشربي ايه بقى ؟

اي حاجة .

يا شاويش .

تمام يا فندم .

2 عصير تفاح بسرعة .

حاضر يا فندم .

مريم في سرها
هو عرف منين ان انا بحب عصير التفاح ، ده حتى المرة ألي فاتت بردوا جابلي عصير تفاح ، يكونش بيحب عصير التفاح زي و يكون ما بينا حاجات مشتركة ياااااه ، ايه العبط ده ، هو ده وقته ، بقولك اتسرقنا و انتى تقوليلى تفاح ، إنشاء الله شجرة تفاح تقع على دماغك يا شيخة و تسكتك .

حضرتك كويسة ؟

هااا ، اه .

طب اتفضلي ، اكيد حضرتك كنتى جاية عايزة حاجة .

كنت جاية اعمل محضر سرقة .

خير ايه اللي حصل ؟
اتفضلي احكي .

حكيت مريم اللي حصل كله بالتفصيل .

تمام انتى سيبى عنوانك و رقم تليفونك و اي اخبار جديدة عن الموضوع هنبلغك بيها .

عطته مريم رقم تليفونها وعنوانها و سألته
مش عايز رقم بابا بالمرة ؟

لا و اعوزه ليه ، مش حضرتك اللي اتسرق منك الحاجة ، يبقى هعوز رقم الوالد في ايه ، ولا الخط فيه مشكلة ؟

مريم بتكشيرة
لا مفيش مشكلة فى الخط ، انا قولت يمكن تعوز الرقم في المستقبل ولا حاجة ، بس خلاص ملكش فى الطيب نصيب .

ابتسم و هو بيكتب بعض البيانات الخاصة بمريم فى المحضر و بصلها بصة سريعة و قال
لا لا مش هنعوزه في المستقبل ان شاء الله .

مريم بعصبية فى سرها
طبعا هتعوز الرقم في ايه ما انت تلاقيك مصاحب واحدة ولا خاطب و انت حلو كدة و زي القمر الله يقرفك ، بس بردوا الواحد المفروض يشكر الحرامى على السرقة الجميلة دى ، ده لو السرقة بالحلاوة دى دا أنا هاجر واحد يسرقنى كل يوم .