العشق سرا
للكاتبة فاطمة محمد
الجزء الخامس
.
.
.
.
حمد خويه اذا جاك وخذاك الريل
حمد مر على ديرتنه
حمد سولف لهلنه شلون متعوبين
حمد كلهم تراهي الدنيا ذلتنه
حمد مر على ذيج الهزت الكاروك
كللها عزيزج طاح بذلاله
حمد كلها غريب ومحد بحاله
حمد مر على ابوي وياك وحجيله
حمد متعوب ابنك هيج غنيله
حمد كله التسميه ابو الحيل
حمد كله ابشرك مابقه بحيله
حمد كلهم جرحنه الضيم بلوانه
حمد كلهم وكتنه هواي وازانه
حمد كلهم الغربه عيون بجتنه
حمد مر بربعنه وياك
اخاف لانسو شلون لمتنه
حمد كلهم ابد لا مانسيناهم
حمد كلهم يعيش ويانا طرواهم
حمدكلهم ابد ماهانت على الروح عشرتنه
حمد بيتين الهم ذني تقراهن
حمد بيش احلفك موش تنساهن
((هلي ولاطارش المنكم نشد عني
هلي كطوف الجكاير زنجرن سني))
**********
توضيح ***
الي سالوني ليش ما رجعت يمامه لابوهه الشيخ عداي وليش هو ما سال عليهه ...
خالد من أخذ يمامه ما قبل ينطيهم عنوان بيته وكلهم راح اخذهه وسافر لأن حسب حساب راح يجي يوم وتفكر ترجعلهم
وكذلك يمامه ما تندل عنوانهم الي تعرفه هم بالعماره وبس فكرت أكثر من مره تنهزم وتروحلهم بس ما عدهه فلوس وبالنسبه لفلوس الكاع مال احمد ف ابوهه خالد ياخذهن ....
**********
خالد _بنتج رنده
يمامه بصدمه _ شبيهه بنتي
_ اني انطيت كلمه لعمج ازوجهه لابنه بس يسددني فلوس مهرهه
يمامه _ لطمت على وجهي احركك والله وخلص العالم من شرك قبل لا اجي لسجنك كتلك بنتي خط أحمر ممنوع تتقربلهه مو بكيفك ازوجهه ولمنو لهذا الدايح على كص ركبتي اخليك ازوجهه نجوم الضهر أقرب الك من بنتي
خالد _ بكيفج انتي تحجين اني نطيته كلمه وكلمتي ما صير ثنين
يمامه _ لا ثنين وثلاثه واربعه وتخليهه بالك لو فكرت مجرد تفكير تستغل بنتي لمصلحتك احركك وميرفلي جفن ما يصبح عليك الصبح وبنتي متوجعه
خالد _ لججج بنت الكلب هم طلعلج لسان وتجاوزين ادوسج بالنعال اذا اعترضتي وبنتج تزوج ابن عمج غصبا عل كل
يمامه _ والله اخذهه ونهزم منك ولا اخليك تزوجهه ....
رنده _ بقيت مصدومه من موقف جدو شلون بايعني لابن اخو شكد شفت منه بس متوقعت توصل يبيعني شنو من انسان حقير هذا تمنيت بابا عايش ويدافعلي مجان انذلينه اني وامي وبقينه تحت رحمته
من كالت امي انهزم انهد عليهه جدو نزع حزامه ويضرب بيهه هي تبجي وصيح ميفيد سحلهه من شعرهه وحبسهه بالغرفه وقفل الباب عليهه اخذ المفتاح وعافنه وطلع .. كعدت ابجي يم الباب واحجي ويه امي
يمامه _ رنده بسج بجي مو هديتي حيلي
رنده _ ماما انتي بسببي انكتلتي
يمامه _ ميهم كلشي اسوي لخاطرج ما اريدج تعيشين معاناتي ماما هذا ابن عمي بعد أحقر من جدج واذا زوجتي راح شوفين الويل منه
